Ezekiel 3

Sotho 2000 (BIBELE Taba yea Botse)

← Chapter 2 Jump to: Chapter 4 →

1Morena a re: “Wena motho wa nama, eja lengwalo le o le fiwago le, gomme o yo bolela le setšhaba sa Israele.”

2Ke moka ka ahlama, a nteša lengwalo leo.

3A re: “Wena motho wa nama, eja lengwalo le ke go fago lona le, o le khore.” Ka le ja, gomme ka kwa e le le lebose bjalo ka todi ya dinose.

4Ke moo Morena a rilego: “Wena motho wa nama, eya setšhabeng sa Israele gomme o ba botše tše ke go botšago tšona.

5Ga ke go rome go setšhaba se se bolelago leleme le šele le bothata, eupša ke go roma go Baisraele.

6Ge nkabe ke go roma go ditšhaba tše dintši tše di bolelago maleme a šele a mathata a o sa a kwešišego, di be di tla go theeletša.

7Eupša setšhaba sa Israele sona se ka se rate go go theeletša, ka gobane le nna ga ba nyake go ntheeletša. Ka moka ga bona ba na le kgang mme ba a nnyatša.

8Fela le wena ke tla go thatafatša ka ba ka dira gore o be le kgang bjalo ka bona.

9Ke tla go thatafatša wa ba bjalo ka taamane, wa feta leswika ka bothata; o se ke wa boifa batsošampherefere bao goba wa ba tšhaba.”

10Morena a tšwela pele a re: “Wena motho wa nama, tšohle tše ke go botšago tšona o di theeletše gabotse mme o di sware ka pelo.

11Ke moka o ye go mathopša a geno o ba botše tše nna, Morena, Mong wa bohle, ke ba botšago tšona, le ge eba ba ka go theeletša goba ba se go theeletše.”

12Ya ba gona moya wa Morena o nkukago, gomme ka kwa modumo wo mogolo wa lentšu ka morago ga ka le re: “A go retwe letago la Morena legodimong!”

13Ka kwa le diphego tša diphedi tšela di phuphana, le lešata la maotwana ale le dirile modumo wo mogolo.

14Ge moya wa Morena o nkuka o ntloša moo, ke be ke kgopišegile ebile ke befetšwe.

15Ka gona ka fihla Tele-Abibe kgauswi le noka ya Kebara, moo mathopša a bego a phela gona, gomme ka dula fase moo gare ga bona matšatši a a šupago, ke tšhošitšwe ke tše ke di bonego le tše ke di kwelego.

16Ge go fetile matšatši ale a šupago, Morena a bolela le nna a re:

17“Wena motho wa nama, ke go dira moleti wa setšhaba sa Israele. O theeletše mantšu a ke a bolelago gomme o nkgalele Baisraele ka ona.

18Ge nka go begela gore ruri modiradibe o tla hwa, fela wena wa se mo kgale gore a tlogele ditsela tša gagwe tše mpe, a tle a iphološe, yena o tla hwa ka baka la bobe bja gagwe, gomme nna ke tla bona wena molato wa lehu la gagwe.

19Eupša ge o ile wa kgala modiradibe, gomme a se tlogele go dira dibe, yena o tla hwa ka baka la bobe bja gagwe, eupša wena o tla ba o iphološitše.

20“Ge moloki a ka tlogela boloki bja gagwe, a thoma go dira tše mpe, mme nna ka mo wetša kotsing, yena o tla hwa ge o ka se mo kgale. O tla hwa ka baka la dibe tša gagwe – nka se gopole go loka mola ga gagwe – gomme ke tla bona wena molato wa lehu la gagwe.

21Ge o ka botša moloki gore a se dire dibe gomme a go theeletša a se di dire, o tla fela a phela, gomme le wena o tla ba o iphološitše.”

22Maatla a Morena a nkaparela moo, mme yena a re go nna: “Ema, o ye ka moeding. Ke gona moo ke tlago bolela le wena.”

23Ka gona ka ema, ka ya ka moeding, moo go bego go na le letago la Morena la go swana le lela ke ilego ka le bona kua nokeng ya Kebara. Ka itahlela fase ka sefahlego,

24eupša moya wa Morena wa ntsena, wa nkemiša ka maoto. Morena a re go nna: “Eya gae o fihle o itswalelele ka ntlong.

25O tla kgokwa ka dithapo, wena motho wa nama, wa se kgone go tšwela ka ntle wa sepela bathong.

26Ke tla kgomaretša leleme la gago magalagapeng gore o se kgone go bolela wa kgala moloko wo, gobane ke dinganga.

27E tla re ge ke bolela le wena ka go kgomarolla leleme, wa ba botša se nna, Morena, Mong wa bohle, ke se bolelago. Yo a nyakago go theeletša a theeletše; yo a ganago go theeletša a gane, gobane ke wona moloko wa dinganga.”

← Chapter 2 Jump to: Chapter 4 →