Amos 1

Sukuma 2019

Jump to: Chapter 2 →

1Mihayo ya ng'wa Amosi ūyo walī ūmò wa badīīmi ba ng'holo ba mu Tekoa; akībona kūlwa Isilaeli myaka ībīlī aho nyahīnga ītaalī kwilonga. Jalī shikū ja ng'wa Uzia ntemi wa Yuda, na Yeloboamu ng'witūnja o ng'wa Yehoashi, aho alī ntemi wa Isilaeli.

2Akahaya gīkī, “Ū SEEBA akūzuumīīlaga mu Sayuni, alīpalalūka kūfuma Yelusalemu; a madīīmīlo ga badīīmi ba ng'holo gūūmile, Īsho shizwile kū lūgūlū lwa Kalimeli shanyaalile.”

3Ū SEEBA alīhaya gīkī, “Kūlwa būhūbi wa bana Damasiko, ū būhūbi wabo ūbo balemile kūbūleka, natūbūhama ū būpelanu bone. Nguno bakītūla ī Gileadi na matūlīlo gatūūlīlile mino ga chūma, bītūla gītī balītūla būsīga.

4Nakūtūma moto ū kū numba ya ng'wa Hazaeli, gūjinogoteje nī ng'hambī ja bashilikale ja ng'wa Beni-hadadi.

5Nakūlībīnzagūla ī lilugalīlo lya ha mita gwa Damasiko, nanyagaje ū ntemi wa Aveni, nū wa kūgūdima ū nang'ha gwa būtemi ū mu Beti-aveni. A bana Alaamu bakūtwalwa būding'wa mu sī ya Kili;” alīhaya SEEBA.

6Ū SEEBA alīhaya gīkī, “Kūlwa būhūbi wa bana Gaza, ū būhūbi wabo ūbo balemile kūbūleka, natūbūhama ū būpelanu bone. Nguno bakadima ihanga igima, būūkalījinja kū bana Edomu.

7Nakūtūma moto ū kū ndugu ja Gaza, gūjinogoteje ī ng'hambī jaamo ja bashilikale.

8Nakūnyagaja ū ntemi wa Ashidodi, nū wa kūgūdima ū nang'ha go būtemi ū mu Ashikeloni. Ū nkono gwane nakūgūgalūcha gwilwishe nī Ekuloni, kūshisha a Bafilisiti bashile kūcha,” alīhaya Seeba MULUNGU.

9Ū SEEBA alīhaya gīkī, “Kūlwa būhūbi wa bana Tulo, ū būhūbi wabo ūbo balemile kūbūleka, natūbūhama ū būpelanu bone. Nguno bakajinja ihanga igima kū bana Edomu, baalīdalahaga ī lilagane lya būdūgū.

10Nakūtūma moto ū kū ndugu ja Tulo, gūjinogoteje ī ng'hambī jaamo ja bashilikale.”

11Ū SEEBA alīhaya gīkī, “Kūlwa būhūbi wa bana Edomu, ū būhūbi wabo ūbo balemile kūbūleka, natūbūhama ū būpelanu bone. Nguno bakabakūūbīlīja a badūgū babo gīkī babamale bo lūshū, baalī baponya gete pyī ī shigongo; ū būpelanu wabo walī wabaka ilalī, boolī būtī na nzīla ya kapolele.

12Nakūtūma moto ī Temani, gūjinogoteje ī ng'hambī jaamo ja bashilikale.”

13Ū SEEBA alīhaya gīkī, “Kūlwa būhūbi wa bana Amoni, ū būhūbi wabo ūbo balemile kūbūleka, natūbūhama ū būpelanu bone. Nguno baabatuumūlaga a bakīma ba Gileadi abo balī nda, gīkī bigalīhīje ī mbīmbī ja sī yabo.

14Nakūjitiima moto ī ndugu ja Laba, gūjinogoteje nī ng'hambī jaamo ja bashilikale; ū lūshikū lwenūlo lūkūbiza lwa ng'wano gwa būlūgū, lwa mbula ya nyaga ntaale na nsoke gūkwidosaga.

15Ū ntemi wa ng'wenūmo akūsolwa atwalwe būding'wa, ū wei na a bana ng'oma bakwe;” alīhaya SEEBA.

Jump to: Chapter 2 →