Amos 3

Sukuma 2019

← Chapter 2 Jump to: Chapter 4 →

1Bing'we Isilaeli; pye a banhū abo naabenha kūfuma Misili, gwigwagi ū mhayo ūyū alīgūhaya ū SEEBA, kūlwa kūmukaanīlīja,

2“Ū mu ng'anda jose ī ja mu sī bing'we dūhū h'abo namusolile; hūna lūūlū nakūng'winha nsango kūlwa shibi shing'we shose.”

3A banhū babīlī badūgije kūshimīza dege alīyo batizunīlīgije?

4Ī shimba īkahīīdaga ū mu masaka ūlū ītī na ndimu ya kūlya? Īkūlunduma ū ng'wipilinga ūlū ītadimile shilīwa?

5Ī noni īdūgije kūgwashiwa ū mu ntego ūyo gūtategilwe? Ū lūtu lūkataamukaga sagala dūhū nūūlū shitīho sha kūpuja?

6Ū ng'wano gwa būlūgū ūlū gūlījiwa mu nzengo a banhū bakūleka kūdetema? Ū nzengo ūlū gūgwīlwa mayanga, atī SEEBA ūyo akagenhaga?

7Ū Seeba MULUNGU atīko kwīta mhayo gose gose aho ataalī kūbafuboolela batūmami bakwe a bahangi.

8Ī shimba ūlū īkūpogomaga, nani ū wa kūleka kogoha? Ū Seeba MULUNGU wahayile, nani ū wa kūleka kūhanga?

9Jikumūkījagi ī ng'hambī ja bashilikale ja Ashidodi, nī ng'hambī ja bashilikale ja Misili: Ibilingīlagi kū ngūlū ja Samalia, mugabone a makoye ga wiyugūūji ayo gal'ū mu nzengo gwenūyo; nū wiboneeji wa banhū baamo.

10Batamanile gete ū kwīta ī ya būtūngīlīja, ūlū ītī kūbisa dūhū mu ng'hambī jabo shikolo sha kwiba na sha kūtaaja bo nguzu. Alīhaya SEEBA.

11Alilūūlū, ū Seeba MULUNGU alīhaya gīkī, “Ng'wanishi akūkwihoolekela ū mu sī yako, ajikambagūle ī ng'hambī jako ja bashilikale, nī sha mu mabīkīlo gako ashijane.”

12Ū SEEBA alīhaya gīkī, “Ūmo ndīīmi akataagīlīgījaga tūguha tūbīlī twa magūlū kūfuma mu nomo gwa shimba, nūūlū kamesulwa ka gūtū, na a Baisilaeli bakūpījiwa gīko; a bana Samalia abo bakalaalīlaga būlīīlī būfuuku na kwigasha ha masumbī mamondu ga Damasiko.”

13Alilūūlū, ū Seeba, SEEBA Mulungu wa Būdūla bose alīhaya, “Gwigwagi ū mhayo ūyū, mubize bakaanīji ū mu numba ya ng'wa Yakobo.”

14Ū mu lūshikū lwa kūng'winha nsango ū Isilaeli kūlwa shibi shakwe, nakwīkenaagūla ī myalīlo ya Beeseli; a mapembe ga ha ng'walīlo gakūmogolwa gaponyiwe hasī.

15Nakūjikambagūla pyī ī numba, Ī ja mu shikū ja mbeho nī ja mu shikū ja līīmi isebu; Ī numba ja būlenji bo mapembe ga mhūlī jikūkenaagūlwa, nī numba ī nhaale nhaale jikūholomolelwa ha sī, alīhaya Seeba.

← Chapter 2 Jump to: Chapter 4 →