Amos 9

Sukuma 2019

← Chapter 8 Jump to:

1Nūmona ū SEEBA īmīīlile bbihī na ng'walīlo, ūhaya gīkī, “Jitūlage ī ng'hīngī ū kwigūlya lītingine pyī ī libīndo. Jiholomolage bahinwe kū mitwe pye a banhū; abo balasaagīīle nakūbamalīja nene bo līlūshū. Atilonga nūūlū ūmò wa kūpūlūgūka.

2A boi nūūlū basīmbe shigila bashimye kūkīlanīja, gūkūbīnja ko dūhū ū nkono gwane. Nūūlū balinhe ng'wigūlū, nū kwene nakūbicha bīnge ko.

3Nūūlū balinhe kwigūlya ya lūgūlū lwa Kalimeli bakibise kwenūko, nakūbahwīma koi nabadime. Nūūlū bakaniibisa mu gatī ya būjiba bo nyanza; nakūlagīja nzoka ībalume koi.

4Nūūlū būding'wa na banishi babo būtwalwa mu būsaamiwa, nakūlagīja līlūshū lībamale koi. Nakūbalola chiza no na miso gane; kūlwa kūbīītīla mibi, Ītī misoga na hado yaya.”

5Ū Seeba, ū SEEBA wa Būdūla bose, hū ng'wene akīkuumyaga ī sī yaaba, a bikaji baamo baalīla pye, Ī sī nayo yookala pa gītī mongo gwa Nile, hanuma yakama gītī mongo gwa Misili.

6Hū ng'wene wazenga ikūlū lyakwe kwigūlya mu malunde, ū nsingi gwalyo ūgūtūūla hasī. A minzī ga nyanza akagitanaga hanuma wagiita higūlya ya sī; ū ng'wenūyo ī lina lyakwe SEEBA.

7Bing'we Baisilaeli, a Bakushi mubakīlile kīi ū kūlī nene? Alīhaya SEEBA. Ū Isilaeli natang'wenhile kūfuma Misili, na a Bafilisiti kūfuma Kafutoli, a Baalamu nabo kūfuma Kili?

8A miso ga ng'wa Seeba MULUNGU gabūlolile ū būtemi bo shibi ūbū. Nakūbūkenaagūla wīnge ū mu sī; gwike natīkenaagūla gete ī numba ya ng'wa Yakobo. Alīhaya Seeba.

9Nguno nakūfunya shilagīlo, nakwītinginya ī numba ya Isilaeli hamò na a mahanga pye a gose, gīt'ūmo būsīga būkasūngūlīlagwa mu lūhūngo, katūjimīīlīla hasī nūūlū kabeke kamò.

10A bīīti ba shibi ū mu banhū bane bakūbūlagwa bo līlūshū; pye abo bakahayaga gīkī, “Ū būkenaagūji būtūtūpandīka a bise.”

11Ū mu lūshikū lwenūlo nakwīshosha būpya ī numba ya ng'wa Daūdi. Nakūgabeegeleja a mapande gayo ayo gakambagūkile, nībeeje būpya ūmo yahomagūka; nīzenge īshoke hangī ūmo yalī Ī kwandya.

12Hūna īkūbasuga a ba būshiigo wa Baedomu na a mahanga a gangī, ayo gakitanagwa mu lina lyane; alīhaya SEEBA ūyo akwīyīta pyī ī yenīyī.

13Ū SEEBA alīhya, Jikūshika shikū ja kūyandya ilīma na a magesa gataalī ū kūshila; ū ng'hambi nang'hwe akūyūpandīkīlwa mu nzīla nū mpandagīji wa divai. Ī divai mhya īkūyūtoona na kūhūūma pyī ū mu ngūlū ī nhaale nī ndo.

14Nakūbashosha a banhū bane a Baisilaeli abo basaamiwa; bakwiza bīzenge būpya ī mizengo Īyo yasakaala bikale mo. Bakūhamba migūnda ya mizabibu bayūng'wa ī divai yamo; bakūlīma migūnda balye a matwajo gaamo.

15A Baisilaeli nakūbahamba mu sī yabo, na bataladubbūlwa hangī ū mu sī īyo nabinha nene, alīhaya SEEBA Mulungu wabo.

← Chapter 8 Jump to: