Amos 5

Sukuma 2019

← Chapter 4 Jump to: Chapter 6 →

1Gwigwagi ū mhayo ūyū bing'we numba ya Isilaeli; nalīīlīla kūlwa nguno ying'we,

2Ū munhya ū Isilaeli wagwile, atīko kūbūūka hangī, alī mu sī yakwe walekanījiwe, atī na wa kūngūngūmūla gete.

3Ū Seeba MULUNGU alīhaya, “Ū nzengo gwa kūfuma na bagosha ba mbagashūūla shihūmbī shimò ū mu Isilaeli, gūkūlekeelelwa igana līmò dūhū; ū nzengo gwa kūfuma nabo igana gūkūlekeelelwa ikūmi līmò.”

4Ū SEEBA alīyīwīla ī numba ya Isilaeli gīkī, “Nikoobagi nene mukūpīla;

5mutīkoobagi Beeseli, yaya ū kūja Giligali. Yaya nū kūkīla nkīlo mujile Belisheba. Nguno ī Giligali īkūtwalwa mu būding'wa, nī Beeseli īkūlekwa dalali.”

6Nkoobagi ū SEEBA mukūpīla, ūlū ītī chene akūbīta gītī būpī ū mu numba ya ng'wa Yosefu; būkūshilambīla būlī shikolo, na atigela wa kūbūjimya ū mu Beeseli.

7Angalīlagi a bing'we abo mukagalūchaga būlamuji bo wīmà kūbiza būlūlū, na mukabūpandagīlaga hasī ū būtūngīlīja!

8Ū meeja wa Ndīmīla ī ng'hīma nī ng'hosha, ūyo na giiti akashigalūchaga kūbiza dilū, nī likanza lya līīmi akalīgalūchaga kūbiza būjikū, na a minzī ga mu nyanza akagitanaga hūna wagiita higūlya ya sī; ū ng'wenūyo ī lina lyakwe SEEBA.

9A ba nguzu hū ng'wene akabenhelaga ya kūbakenaagūla, akakenaagūlaga nūūlū nzengo gūpīndīlīgije būlang'hani būtaale.

10A bing'we munkolilwe ūyo akafunyaga būhūgūji mu mabanza, nū ng'hayi wa mihayo ya ng'hana mundalahile.

11Ū ng'habī mundalahile no, alīyo hangī mukang'hadīkaga amuhonge shilīwa. Hūna lūūlū nūūlū īkī ng'wizengela numba nhaale ja mawe, mutikala mo; nūūlū īkī ng'walīma migūnda misoga ya mizabibu, ī divai yamo mutīng'wa.

12Nguno nabūmanile ū wingī wa būkenaagūji wing'we ūmo būlī, nū būtaale wa shibi shing'we. Mukahongagwa ng'wayūbiboneela a batūngīlīja, nū mu mabanza a bahabī mukabīngījaga a kalamulīlwe ka wīmà.

13Hūna lūūlū ū mu makanza genayo ū munhū ntengeke akahuumūlaga, nguno galī makanza gabūbi.

14Būkoobagi ū wiza, yaya ū būbi, hū mukūpīla. Hūna ū SEEBA Mulungu wa Būdūla bose akūbiza hamò ning'we, gīt'ūmo mukūhayīlaga, gīkī alī hamò ning'we.

15Ū būbi būkolagwi mutogwe yawiza, ū mu mabanza būlang'hanagi ū būtūngīlīja. Hamo ū SEEBA Mulungu wa Būdūla bose akūbūchīla shigongo ū būshiigo bo ng'wa Yosefu.

16Alilūūlū, ū Seeba, ū SEEBA Mulungu wa Būdūla bose alīhaya gīkī, Kūkūbiza ho kūlīla ng'hūngū hose pye ū mu mapanda, kalīlīle ka būpīna būtaale būlī kwene ū mu gwalugwa ja mu nzengo. Ū nīmi akūkomigwa kūlīla, ū mani wa kūtūla ng'hūngū kūlīla n'ilaka lya higūlya.

17Hose pyī ū mu migūnda ya mizabibu hakūbiza ng'hūngū dūhū, nguno nakūbīta mo ū mu bing'we; alīhaya SEEBA.

18Mulī mu kwihīga a bing'we abo mukūlūkūmbūlaga lūshikū lo SEEBA! Nibūlī mulūkūmbūlile ū lūshikū lo SEEBA? Ū lūshikū lwenūlo lūkūbiza lo giiti, ndūhū ī lisana.

19Īkūbiza gīt'ūmo munhū wa kūshiga shimba alīyo ūmanhya na ndūba, nūūlū gītī munhū kwingīla mu numba gīkī ifuule, wakūhayishindaalīja ha ndugu ūlung'wa ng'hoboko ha nkono.

20Na ng'hana ū lūshikū lwa ng'wa SEEBA lūlī giiti, lūt'isana; giiti sha gamha, ndūhū nūūlū ka būpe kado na kado.

21A mashigukulu ging'we ga dini nagakolilwe, nīyo nagadalahile no; natūdūla ū kwikala niyūmīlījaga nago a malibilinga ging'we.

22Nūūlū munehele shitambò sha kūpemvwa na shitambò sha būsu, natūshanukūla. Nūūlū ng'wenhe shitambò sha būsangī shawiza na kinehe, natūshilola nūūlū ū kūshilola.

23Yīnjagi ī yoge ya mīmbo ging'we a henaha! Na a malaka ga shikolo shing'we Īsho mukūtūlaga natūgadegeleka.

24Alīyo a kalamulīle ka wīmà ni kahūūmage gītī mongo, ū būtūngīlīja būyūsela gītī mongo gūtakamaga minzī!

25Bing'we numba ya Isilaeli, Ī likanza lya myaka makūmi anè aho ng'walī kū matogolo, ng'wanifunījaga shitambò ū nene, nūūlū shakwinha shose shose?

26Tūhaya ng'wabūūchaga iheema lya ntemi wing'we, wigasho wa shiikolile shing'we, na sonda ya ng'wa mulungu wing'we; h'ī shikolo īsho ng'wibeegejaga!

27Nakūmuponya muje kūle kūkīla Damasiko, alīhaya SEEBA, ūyo lina lyakwe alī Mulungu wa Būdūla bose.

← Chapter 4 Jump to: Chapter 6 →