Hosea 1

Sukuma 2019

Jump to: Chapter 2 →

1Mhayo go ng'wa SEEBA gūkang'wizīīla Hosea ng'witūnja o ng'wa Beeli mu shikū ja būsugi bo ng'wa Uzia, Yotamu, Ahazi na Hezekia, abo baalī batemi ba Yuda; na mu shikū ja būsugi bo ng'wa Yeloboamu ng'witūnja o ng'wa Yehoashi ntemi wa Isilaeli.

2Ū SEEBA aho wandya kūlūngalūnga mu nzīla ya ng'wa Hosea; akang'wīla, “Jaga ūkipandīkīle nkīma malahya wa baana ba mu būmalahya; nguno ī sī īlī mu kwihīga kwa būmalahya būbi no kūlwa kūneka ū SEEBA.”

3Hūna ūja ūūkansola Gomeli nshīke o ng'wa Dibulaimu, atadīlile ūbūūcha nda ūmyalīla ng'wana ngosha.

4Ū SEEBA ūng'wīla ū Hosea, “Ng'wilīkage ī lina lyakwe Yezileeli, nguno negeelaga kwīyinha nsango ī numba ya ng'wa Yehu kūlwa kūbabūlaga banhū mu Yezileeli, ū būtemi bo Isilaeli nakūbūpyagūla būshile ho gete.

5Ū mu lūshikū lwenūlo ū būta bo ng'wa Isilaeli nakūbūbīnzagūlīla mu mbuga ya Yezileeli.”

6Ū Gomeli ūbūūcha nda hangī ūbyala ng'wana nkīma. Ū SEEBA ūng'wīla, “Ng'wilīkage ī lina lyakwe Lo-Luhama, nguno natīchīla shigongo hangī ī numba ya Isilaeli, natūbalekeja nūūlū hado.

7Alīyo ī numba ya Yuda nakwīchīla shigongo, nakūbapīja; gwike ītī mu kūtūmamīla būta, nūūlū līlūshū, nūūlū būlūgū, nūūlū nguzu ja falasa na badamhīji baajo; alīyo mu nzīla ya ng'wa SEEBA Mulungu wabo.”

8Aho wangija ū Lo-Luhama, ū Gomeli akabyala ng'wana ngosha hangī.

9Ū Seeba ūng'wīla, “Ng'wilīkage ī lina lyakwe Lo-Ami, nguno mutī banhū bane, nū nene natī Mulungu wing'we.”

10Alīyo nahene a Baisilaeli bakūkwīla no babize gītī maseni ga ha nyanza, ayo gatadūgije kūgelekwa nūūlū kūsoloojiwa. Ū ng'wipandī īlo ng'wahayiagwa gīkī, “Mutī banhū bane,” bakwitanwa gīkī balī “Baana ba ng'wa Mulungu mpanga.”

11A banhū ba Yuda na a banhū ba Isilaeli bakwisangīja, hūna basole ntongeeji ūmò, na bakūkwīla hangī ū mu sī; nguno ū lūshikū lwa ng'wa Yezileeli lūlī lūtaale no.

Jump to: Chapter 2 →