Joshua 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1A, ke one maswa a bana ba Iseraele ba ne ba a tsaya mo lefatsheng la Kanana, a Eleasare moperesiti, le Jošua morwa Nune, le ditlhogo tsa makgotla a borra batho ba ditso tsa bana ba Iseraele, a ba a abetseng,

2ka go laolwa ka bola ga boswa jwa bone, jaaka Jehofa a laotse ka Moše, ka ga ditso tse di ferang o le mongwe, le ka ga bontlhanngwe jwa lotso.

3Gonne boswa jwa ditso tse pedi le jwa bontlhanngwe jwa lotso, Moše o ne a bo abile kwa moseja ga Joretane; mme Balefi a se ka a ba naya boswa bope mo go bone.

4Gonne bana ba ga Josefe ba ne ba le ditso di le pedi, Manase le Eferaime; mme ba se ka ba naya Balefi kabelo epe ya lefatshe, fa e se metse ya go aga mo go yone, e na le dintlhana tsa yone, ga dikgomo le ga dithuo tsa bone.

5Jaaka Jehofa a laotse Moše, bana ba Iseraele ba dira jalo, ba kgaoganya lefatshe.

6Foo bana ba Juta ba atamela kwa go Jošua mo Gilegale; mme Kalebe morwa Jefune wa Mokenise a mo raya a re: “O a se itse selo se Jehofa o ne a se bua le Moše motho wa Modimo, ka ga me le ka ga gago, mo Kateše-barenea.

7E rile Moše motlhanka wa ga Jehofa a nthoma ke tswa mo Kateše-barenea ke ya go tlhola lefatshe, ka bo ke le dinyaga di le 40; ka ba ka mo leretse lefoko jaaka go ne go le mo pelong ya me.

8Le fa go ntse jalo bana ba ga rre ba ke ne ke tsamaile nabo ba nyerisa dipelo tsa batho; mme nna ka sala Jehofa Modimo wa me morago ka botlalo.

9Moše a ikana ka tsatsi leo, a re: ‘Ruri lefatshe le lonao lwa gago lo le gatileng, e tlaa nna boswa jwa gago le jwa bana ba gago ka bosakhutleng, ka o setse Jehofa Modimo wa gago morago ka botlalo.’

10Jaana bona, Jehofa o ntshedisitse, jaaka a ne a bua, ka dinyaga tse di 45 tse, go tswa mo lobakeng lwa jale jaaka Jehofa a bua lefoko le le Moše, Iseraele o ntse a sepela mo nageng; mme jaana bona, gompieno ke botsofe jwa dinyaga di le 85.

11Gompieno ke sa ntse ke le thata, fela jaaka mo letsatsing le Moše o ne a nthoma ka lone, jaaka thata ya me e ne e ntse jale, thata ya me e ntse fela jalo le jaana, ya go tlhabana, ya go bolola le ya go goroga.

12Ke gone jaana, ka re: Nnaya thaba e Jehofa o ne a bua ka ga yone ka tsatsi leo; gonne o ne wa utlwa mo tsatsing leo jaaka Baanake ba ne ba le gone, le metse ya bone fa e le megolo e thekeleditswe; e tlaa re gongwe Jehofa a nne le nna, mme ke ba leleke, jaaka Jehofa a ne a bua.”

13Jošua a mo segofatsa; a naya Kalebe morwa Jefune Heberone go nna boswa.

14Jalo Heberone wa nna boswa jwa ga Kalebe morwa Jefune wa Mokenise nako e sa le eno; gonne o ne a sala Jehofa Modimo wa Iseraele morago ka botlalo.

15Gale leina la Heberone e ne e le Kiriathe-areba; Areba yoo e ne e le ene motho yo mogolo mo go Baanake. Lefatshe la bona boikhutso mo ntweng.

← Chapter 13 Jump to: Chapter 15 →