Ezekiel 17

Tsonga Xitsonga (Bibele) 1929

← Chapter 16 Jump to: Chapter 18 →

1Rito ra Yehovha ri humelela eka mina, ri ku:

2“N'wana wa munhu, vulavula ni yindlu ya Israele hi ntsheketo ni xifaniso,

3u ku: Ku vula Hosi Yehovha: Gama lerikulu leri nga ni timpapa letikulu, leto leha, timpapa leti nga ni tinsiva ta mavalavala, ri tile eLebanoni, ri tshovile makumu ya rhavi ra Kedari.

4Loko ri tshovile rhavi leri ra makumu, ri ri tekela etikweni ra Kanana, ri ri veka emutini wa vaxavisi.

5Ri engeta ri teka mbewu etikweni, ri ya yi byala laha ku noneke, ri yi byala ekusuhi ni mati layo tala, ri yi byala hilaha ku byariwaka nkhuwana.

6Kutani yi kula, yi hundzuka murhi wa vhinya lowu navaka, marhavi ma langutana ni gama, ni timitsu ti ri ehansi ka rona, wu kuma nsinya ni marhavi.

7A ku ri ni gama rin'wana lerikulu, a ri ri ni timpapa letikulu, ni tinsiva leto tala. Kutani murhi wa vhinya wu hundzukela timitsu ni marhavi ya wona eka rona, leswaku ri wu cheleta.

8Wu byariwile emisaveni leyinene, ekusuhi ni mati, leswaku wu kota ku humesa marhavi ni ku veka mihandzu, leswaku yi va vhinya leyo saseka.

9“U ku: Hosi Yehovha u vula, a ku: Xana wu ta kula xana? Xana gama lero rhanga ri nga ka ri nga simuli timitsu ta wona-ke? Xana ri nga ka ri nga susi mihandzu leswaku wu oma? Matluka hinkwawo ma ta oma, kutani wu ta tsuvuriwa hi vanhu va nga ri vangani.

10Vona, wu byariwile, xana wu ta kula xana? Loko moya wa le vuxeni wu ta hunga, xana wu nga ka wu nga omeli makumu xana? Laha wu nga kula kona, wu ta oma kona.”

11Rito ra Yehovha ri engeta ri ta eka mina, ri ku:

12“U ku eka yindlu leyi tiarisaka: Xana a mi tivi ntsheketo ni xifaniso lexi-ke? U ku: Vona, hosi ya Babilona yi tile eYerusalema, yi tekile hosi ya vona ni tindhuna, yi va tekela na yena kwale Babilona.

13Yi tekile n'wana un'wana wa hosi, yi endlile xinakulobye na yena, yi n'wi hlambanyisa, kambe yi susile vakulukumba va tiko,

14leswaku vuhosi byi tsongahatiwa, byi tsandzeka ku tikurisa, byi hlayisa vunakulobye, byi namarhela eka yona.

15Kambe u yi hundzukele, u rhumile tintsumi Egipta, leswaku va n'wi nyika tihanci ni vanhu lavo tala: Loyi a endleke swilo leswo tano, u ta swi kota xana, u ta pona xana? U onhile xinakulobye, xana u ta pona-ke?

16Ndza hanya, ku vula Hosi Yehovha, u ta fa etikweni ra hosi leyi n'wi nyikeke vuhosi, ni xinakulobye lexi a nga xi onha; u ta fa emutini wa Babilona.

17Loko a ri yena Faro, a nga ka a nga n'wi lweli hi nyimpi leyikulu, ni vanhu lavo tala, loko va ta aka tinhulu, ni loko va ta aka makhokholo ku dlaya vanhu lavo tala.

18U onhile xinakulobye, u sorile ku hlambanya ka yena loku a nga ku tiyisa hi ku tshambuluta voko, a nga ka a nga poni.

19“Hikwalaho, ku vula Hosi Yehovha: Ndza hanya! U sorile ku hlambanya loku a nga ku endla hi vito ra mina, u onhile xinakulobye xa mina, ndzi ta rihisa hinkwaswo leswi enhlokweni ya yena.

20Ndzi ta tshambuluta nkukuto wa mina ehenhla ka yena, u ta phasiwa hi ntlhamu wa mina, ndzi ta n'wi yisa eBabilona, kutani kwala ndzi ta n'wi avanyisa hikwalaho ka vumbabva bya yena.

21Lava nga ta baleka va nyimpi ya yena va ta dlawa hinkwavo hi tlhari, lava nga ta sala va ta hangalasiwa hi matlhelo hinkwawo, kutani mi ta tiva leswaku mina Yehovha ndzi swi vurile.”

22Ku vula Hosi Yehovha: “Ndzi ta teka xicapila xa murhi wa Kedari, ndzi xi veka, ndzi ta tshova ni xihluke exikarhi ka marhavi ya wona, ndzi xi byala entshaveni leyo tlakuka.

23Ndzi ta xi byala entshaveni leyo leha ya Israele, xi ta hlukisa marhavi ni ku veka mihandzu, wu ta hundzuka murhi wa Kedari lowukulu; tinyanyana letitsongo ni letikulu ti ta aka endzhutini wa marhavi ya wona.

24Kutani mirhi hinkwayo ya nhova yi ta tiva leswaku mina Yehovha ndzi tsongahatile murhi lowu tlakukeke, ndzi tlakusile murhi lowutsongo. Ndzi omisile matluka ya murhi wa rihlaza, ndzi va ndzi mirisa murhi lowu omeke. Mina Yehovha ndzi swi vurile, ndzi swi endlile.”

← Chapter 16 Jump to: Chapter 18 →