Ezekiel 25

Tsonga Xitsonga (Bibele) 1929

← Chapter 24 Jump to: Chapter 26 →

1Rito ra Yehovha ri engeta ri ta eka mina, ri ku:

2“N'wana wa munhu, langutisisa mombo wa wena eka vana va Amoni, u va profetela;

3u ku eka vana va Amoni: Yingisani rito ra Hosi Yehovha! Hosi Yehovha u ri: Leswi u nga te: ‘Ha, ha!’ Hi vukwetsimelo bya mina siku byi nyamisiweke, ni tiko ra Israele, siku ri onhiwaka; ni va yindlu ya Yuda siku va yisiwaka evukhumbini,

4hikwalaho, vona, ndzi ta ku nyiketa ku fumiwa hi vana va le vuxeni; va ta veka mixaxa ya vona eka wena, va dzima maako ya vona eka rikwenu, hi vona va nga ta dya mihandzu ya wena, va ta nwa ntswamba wa wena.

5Ndzi ta endla Rhaba vupfalelo bya tikamela, tiko ra vana va Amoni ri va vuvundzo bya tinyimpfu; mi ta tiva leswaku hi mina Yehovha.

6“Hikuva Hosi Yehovha u ri: Leswi u phakateke mandla ya wena ni ku raha hi nenge, kutani u tsakele xisolo xa tiko ra Israele hi moya wa wena hinkwawo;

7vona, hikwalaho ndzi ta ku tshalambutela voko ra mina, ndzi ku nyiketa ku onhiwa hi vamatiko, ndzi ku tsema exikarhi ka vanhu, ndzi ku lovisa ematikweni hinkwawo, ndzi ku herisa, u ta swi tiva leswaku hi mina Yehovha.

8“Hosi Yehovha u ri: Leswi Mowabu na Seyira va nga te: Vonani, yindlu ya Yuda yi fana ni matiko hinkwawo;

9loko swi ri tano, vona, ndzi ta kendlusa tsheve ra Mowabu, ku suka emitini ya yena leyi nga makumu ka yena, leyi sasekisaka tiko, Beta-Yeximoto, na Baala-Meoni, ni ku ya fika eKiriyatayimi.

10Ndzi ta ri pfulela vana va le vuxeni swin'we ni tiko ra vana va Amoni; ndzi ta ri nyika vona va ri fuma, leswaku vana va Amoni a va nga ha tsundzukiwi exikarhi ka matiko.

11Kutani ndzi ta humesela Mowabu ku avanyisa, va ta swi tiva leswaku hi mina Yehovha.

12“Hosi Yehovha u ri: Hikwalaho ka ku endla ka va ka Edomu eku tlheriseleni loko nonon'hwa eka yindlu ya Yuda, va tiendlele nandzu ngopfu hi ku tirihisela eka yona.

13Hikwalaho, Hosi Yehovha u ri: Ndzi ta vutla tiko ra Edomu evokweni ra mina, ndzi tsema vanhu ni swifuwo kona, ndzi va ndzi ri endla mananga ku suka eTemani, kutani va ta wisiwa hi fumu ku ya fika eDedani.

14Ndzi ta tirihisela eka Edomu hi tiko ra mina ra Israele va ta endlela Edomu hi vukari bya mina, ni ku hlundzuka ka mina kutani va ta tiva ku rihisela ka mina; ku vula Hosi Yehovha.

15“Kambe Hosi Yehovha u ri: Hikuva Vafilista va endle hi ku tlherisela, kutani va endle hi ku rihisela loko nonon'hwa hikwalaho ka xisolo lexi ingi va ri na xona etimbilwini ta vona, va rhandze ku lovisa tiko ra mina hi rivengo leri nga heriki;

16hikwalaho, Hosi Yehovha u ri: Vonani, ndzi ta tshalambutela Vafilista voko ra mina, ndzi tsema Vakereti, ndzi lovisa lava seleke eribuwini ra lwandle.

17Ndzi ta va endla hi ku rihisa lokukulu, ni ku tshinya ka vukari; va ta swi tiva leswaku hi mina Yehovha, siku ndzi vekaka ku rihisa ka mina ehenhla ka vona.”

← Chapter 24 Jump to: Chapter 26 →