Ezekiel 18

Tsonga Xitsonga (Bibele) 1929

← Chapter 17 Jump to: Chapter 19 →

1Rito ra Yehovha ri tlhela ri ta eka mina, ri ku:

2“Mi vulela yini xivuriso lexi etikweni ra Israele, mi ku: ‘Vatatana va dyile mihandzu leyimbisi, kutani meno ya vana ma rherhemerile ha yona’?

3Ndza hanya, ku vula Hosi Yehovha, mi nga ka mi nga ha vuri xivuriso lexi etikweni ra Israele.

4Vonani, mimoya hinkwayo i ya mina; hambi wu ri moya wa n'wana ni moya wa tatana. Moya lowu dyohaka, hi wona lowu nga ta fa!

5“Munhu la lulameke, la tirhaka hi mfanelo ni ku lulama,

6la nga dyiki ehenhla ka tintshava, la nga tlakusiki mahlo ya yena eka swikwembu swahava swa yindlu ya Israele, la nga nyamisiki nsati wa nakulobye, la nga tshineleriki wansati la nga ni ngati;

7munhu la nga xanisiki van'wana, la tlheriselaka munhu xitshembiso xa yena, la nga yiviki; loko a nyika vuswa bya yena eka loyi a nga ni ndlala, loko a funengeta la nga ni vusweti,

8loko a nga lombi hi bindzu, loko a nga nghenisi voko ra yena emitirhweni leyo homboloka, loko a avanyisa hi ku lulama exikarhi ka munhu ni nakulobye,

9loko a famba hi milawu ya mina, a va a hlayisa ku lerisa ka mina, a ri karhi a tshembeka, munhu loyi u lulamile, kunene u ta hanya, ku vula Hosi Yehovha.

10“Loko a velekile n'wana wa wanuna la karihaka, la halataka ngati, kumbe la endlaka xilo xin'wana lexo tano;

11loko n'wana loyi a nga fambi hi mitila ya tata wa yena, loko a dya etintshaveni, loko a nyamisa nsati wa nakulobye,

12loko a xanisa xisiwana ni mupfumari, loko a yiva, loko a nga tlheriseli n'wini mali ya ku tiyisa ka yena, loko a tlakusa mahlo eka swifaniso swa swikwembu swahava, a endla manyala,

13loko a vitana bindzu, xana n'wana loyi u ta hanya xana? A nga ka a nga hanyi; u dyohile, u fanela hi ku fa kunene, ngati ya yena yi ta va ehenhla ka yena!

14“Kambe loko munhu a ri ni n'wana la vonaka swidyoho leswi tata wa yena a swi endleke, kambe a nga landzi mitila ya yena,

15loko n'wana loyi, a nga dyi etintshaveni, a nga tlakusi mahlo ya yena eka swifaniso swa swikwembu swahava swa yindlu ya Israele, a nga nyamisi nsati wa nakulobye, a nga xanisi munhu ni un'we,

16a nga amukeri mali ya ku tiyisa xitshembiso, a nga yivi, kambe a nyika vuswa bya yena eka la nga ni ndlala, a funengeta la nga ni vusweti, loko a fularhela ku homboloka,

17loko a nga amukeli bindzu, loko a hlayisa ku lerisa ka mina, a famba hi milawu ya mina, yena loyi a nga ka a nga fi hikwalaho ka ku homboloka ka tata wa yena; u ta hanya kunene.

18I tata wa yena la nga xanisa hi tihanyi, u yivile swa makwavo, u endle leswi nga lulamangiki etikweni ra yena, u ta fa hikwalaho ka ku homboloka ka yena.

19“Mi ri: ‘N'wana a nga rhwali ha yini ku homboloka ka tata wa yena?’ Hi leswaku n'wana u endlile hi nawu, ni ku lulama, u hlayisile swileriso hinkwaswo swa mina ku swi hetisa, kunene u ta hanya.

20Moya lowu dyohaka hi wona lowu nga ta fa. N'wana a nga ka a nga rhwali nandzu wa tata wa yena, na yena tata wa munhu a nga ka a nga biwi hikwalaho ka n'wana wa yena. Ku lulama ka lowo lulama ku ta va ehenhla ka yena, kambe ku homboloka ka lowo biha ku ta va ehenhla ka yena.

21“Loko mubihi a hundzuka eku dyoheni ka yena, loko a hlayisa milawu ya mina hinkwayo, a hanya hi nawu ni ku lulama, kunene u ta hanya, a nga ka a nga fi.

22Swidyoho hinkwaswo swa yena leswi a swi endleke swi ta rivaleriwa hikuva u swi tshikile; u ta hanya.

23Xana ndzi ta tsakela rifu ra lowo biha-ke, ku vula Hosi Yehovha? Leswi ndzi swi tsakelaka hi leswaku munhu a hundzuka, a tshika mikhuva ya yena, a hanya.

24“Kambe loko la lulameke a tshika ku lulama ka yena, e endla leswo biha, a ri karhi a landza manyala hinkwawo lama endliwaka hi lowo biha, xana u ta hanya xana? Ku lulama ka yena hinkwako loku a ku endleke ku ta rivariwa, hikuva u tinyiketile eku hombolokeni ni le manyaleni; hikwalaho ka swona, u ta fa kunene.

25“N'wina mi ri: ‘Ndlela ya Yehovha a yi lulamanga.’ Yingisani sweswi, n'wina va yindlu ya Israele, xana i ndlela ya mina leyi nga lulamangiki, a hi tona tindlela ta n'wina leti nga lulamangiki xana?

26Loko mululami a tshika ku lulama ka yena, a sungula ku homboloka, kutani a fa hakona, i ku dyoha ka yena loku n'wi lovisaka.

27Na swona, loko mubihi a hundzuka eku biheni ka yena, kutani a vuya a endla hi nawu ni ku lulama, u ta ponisa moya wa yena.

28Loko a hanyanya, a tshika swidyoho swa yena hinkwaswo leswi a swi endleke, kunene u ta hanya, a nga ka a nga fi.

29“Kambe yindlu ya Israele yi ri: ‘Ndlela ya Yehovha a yi lulamanga.’ Yo! Yindlu ya Israele! A hi ndlela ya mina leyi nga lulamangiki, kambe hi leta n'wina.

30Hikwalaho ndzi ta mi avanyisa, un'wana ni un'wana hi tindlela ta yena, wena, yindlu ya Israele, ku vula Hosi Yehovha. Tisoleni, mi hundzuka eku dyoheni ka n'wina hinkwako, leswaku ku homboloka ka n'wina ku nga mi lovisi.

31Cukumetani swidyoho swa n'wina hinkwaswo leswi mi dyoheke ha swona, mi va ni timbilu letintshwa ni mimoya leyintshwa. Mi ta lova ha yini, n'wina, va yindlu ya Israele?

32Hikuva a ndzi tsakeli rifu ra loyi a lovaka, ku vula Hosi Yehovha. Hundzukani hakona, mi ta hanya!”

← Chapter 17 Jump to: Chapter 19 →