Ezekiel 6

Tsonga Xitsonga (Bibele) 1929

← Chapter 5 Jump to: Chapter 7 →

1Kutani rito ra Yehovha ri ta eka mina, ri ku:

2“N'wana wa munhu, langutisisa mombo wa wena eka tintshava ta Israele, u bvumbha eka tona u ku:

3N'wina tintshava ta Israele, yingisani rito ra Hosi Yehovha! Ku vula Hosi Yehovha eka tintshava ni switsunga, eka mikova ni timbala. Vonani, ndzi ta tisa fumu ehenhla ka n'wina, ndzi ta onha switsunga leswi va gandzelaka eka swona.

4Tialitari ta n'wina ti ta hlanhliwa, ni swifaniso swa n'wina swa dyambu swi ta tshoviwa, ndzi ta wisa tinkuveri ta n'wina emahlweni ka swikwembu swa n'wina swahava.

5Ndzi ta etlerisa mitsumbu ya vana va Israele emahlweni ka swifaniso swa vona, ndzi hangalasa marhambu ya n'wina ematlhelo ya tialitari ta n'wina.

6Hinkwako laha mi akeke kona, miti ya n'wina yi ta hundzuka marhumbi, ni switsunga swa n'wina swi ta hlanhliwa, tialitari ta n'wina ti ta tshikiwa, ti fularheliwa; swifaniso swa n'wina swi ta fayeteriwa, swi susiwa, ni swifaniso swa dyambu swa n'wina swi ta tsemiwa, ni mitirho hinkwayo ya n'wina yi ta kukuriwa.

7Tinkuveri ti ta wa exikarhi ka n'wina hi kona mi nga ta tiva leswaku hi mina Yehovha.

8Hambiswiritano, ndzi ta siya masalela lama nga ta pona fumu exikarhi ka matiko, loko mi ta va mi hangalakile exikarhi ka wona.

9Lava nga ta pona va ta ndzi anakanya va ri ematikweni laha va nga ta bohiwa kona, hikuva ndzi ta va ndzi tshovile timbilu ta vona leti hombolokeke, leti nga tshembekiki, ni mahlo ya vona lama oswaneke ni swikwembu swa vona. Va ta tinyenya va ri vona hikwalaho ka swidyoho hinkwaswo leswi va swi endleke, ni manyala hinkwawo ya vona.

10Va ta tiva leswaku hi mina Yehovha, ni leswaku a ndzi vulanga mahala loko ndzi te: ‘Ndzi ta mi vavisa.’ ”

11Hosi Yehovha u ri: “Bana hi swandla swa wena, u raha hi nenge wa wena, u ku: Yo! Hikwalaho ka manyala hinkwawo lama chavisaka ya yindlu ya Israele, leyi nga ta wa hi fumu ni ndlala ni ntungu.

12La nga ta va ekule u ta fa hi ntungu, la nga ta va ekusuhi u ta wisiwa hi fumu, la nga ta sala u ta lovisiwa hi ndlala. Hi mukhuva lowo ndzi ta hetisa ehenhla ka vona vukari bya mina.

13Kutani mi ta tiva leswaku hi mina Yehovha, loko tinkuveri ta vona ti ta wa exikarhi ka swifaniso swa swikwembu swa vona, ematlhelweni ya tialitari ta vona, ni le henhla ka switsunga hinkwaswo, ni le tinhlohlorhini hinkwato ta tintshava ni le hansi ka mirhi hinkwayo leya matluka, ni le hansi ka mikuhlu hinkwayo laha va gandzelaka kona swikwembu hinkwaswo swa vona hi magandzelo lama nun'hwelaka.

14Ndzi ta va tshambulutela voko ra mina, ndzi onha tiko ra vona, ri ta tlula mananga ya Ribila hi ku biha ka rona, hinkwako laha va tshamaka kona; kutani va ta tiva leswaku hi mina Yehovha.”

← Chapter 5 Jump to: Chapter 7 →