Ezekiel 42

Tsonga Xitsonga (Bibele) 1929

← Chapter 41 Jump to: Chapter 43 →

1Kutani a ndzi humesela erivaleni ra le handle, hitlhelo ra n'walungu, a ndzi yisa emakamareni lawa vundzamaneke ni xivandla xo pfariwa, ya langutana ni khumbi hitlhelo ra n'walungu.

2Ku leha ka kona a swi ri swisungunhu swa dzana (tlhelo ra nyangwa ya n'walungu), ku anama a swi ri swa ntlhanu wa makume,

3ku lavana ni swisungunhu swa makume mambirhi swa rivala ra le xikarhi, ni ku lavana ni maribye yo andlariwa ya rivala ra le handle; tinkupakupa ta kona a ti langutana, ti ri ta tinxaxa tinharhu.

4Emahlweni ka makamara wolawo, a ku ri ni rivala ra ku famba, ra ku anama ka swisungunhu swa khume; a ku ri ni ndlela ya xisungunhu xin'we yo nghena endzeni; tinyangwa ta tona a ti languta tlhelo ra n'walungu.

5Makamara ya le henhla a ma larile; hikuva tinkupakupa ta makamara ya le hansi ni ya le xikarhi a ti engetela makamara ya kona.

6Hikuva a ti endlile swithezi swinharhu, a ku nga ri na timhandze kukota timhandze ta rivala; hikwalaho ku nga lala makamara ya le henhla ku tlula ya le hansi ni ya le xikarhi.

7Loko ri ri khumbi leri ngi ri xaxamele ni makamara, ehandle, hitlhelo ra rivala ra le handle, ku leha ka rona a swi ri swisungunhu swa ntlhanu wa makume, laha ngi ri langutana ni makamara.

8Hikuva ku leha ka makamara lawa ya languteke erivaleni ra le handle a ya ri ya swisungunhu swa ntlhanu wa makume; kasi emahlweni ka tempele a ya ri ya swisungunhu swa dzana.

9Kutani ehansi ka makamara lawa, nyangwa a yi ri kona leyi languteke evuxeni; munhu a a nghena ha yona loko a humela erivaleni ra le handle.

10Ekhumbini ra rivala ra le xikarhi leri langutaka evuxeni, eku anameni ka rona, a ku ri ni makamara na kona lawa lavaneke ni xivandla xo pfariwa ni khumbi.

11Emahlweni ka wona a ku ri ni ndlela leyi fanaka ni ndlela ya makamara ya le n'walungwini; ku leha, na kona ku anama ka wona, a swi fana ni ku leha ni ku anama ka lawaya, a swi ri tano ni timbanti ta tona ni malunghisela ya tona.

12Tinyangwa ta makamara ya dzonga a ti ri tin'we ni ta n'walungu; a ku ri na kona nyangwa eku sunguleni ka ndlela leyi nga ekhumbini, ku ta nghena ha yona munhu la humaka evuxeni.

13Kutani a ku eka mina “Makamara ya tlhelo ra n'walungu ni makamara ya le dzongeni, lama xaxameleke ni xivandla xo pfariwa, i makamara ya vukwetsimelo, laha vaprista lava tshinelelaka Yehovha va nga ta dyela swilo swo kwetsimisisa ngopfu kona; hilaha va nga ta veka kona swilo swo kwetsimisisa, tinyiko ni magandzelo ya swidyoho, ni ya milandzu. Xivandla xi kwetsimile.

14Loko vaprista va nghenile a va nga humi evukwetsimelweni ku nghena erivaleni ra le handle va nga si veka kona tinguvu leti va nga endla ha tona mitirho; hikuva hi leti kwetsimaka; va ta ambala tin'wanyana, kutani va ta tshinelela tiko.”

15Kuteloko a hetile ku pima kwalaho endzeni ka yindlu, a ndzi humesa hi nyangwa leyi nga tlhelo ra vuxa, kutani a pima rirhangu ra le handle hi matlhelo hinkwawo.

16A pima khumbi ra le tlhelo ra vuxa hi nhonga ya mpimo; swi ri swisungunhu swa ntlhanu wa madzana, swa nhonga yo pima.

17Kutani a pima khumbi ra le tlhelo ra n'walungu, a swi ri swisungunhu swa ntlhanu wa madzana ya nhonga leyo pima.

18Kutani tlhelo ra dzonga a pima swisungunhu swa ntlhanu wa madzana ya nhonga ya mpimo.

19A ya tlhelo ra vupeladyambu, a pima hi nhonga ya mpimo swisungunhu swa ntlhanu wa madzana.

20Hi matlhelo ya mune, a pima khumbi leri rhendzelaka yindlu; ku leha a ku ri kantlhanu wa madzana, ni ku anama kantlhanu wa madzana, ku avanyisa lexi kwetsimaka ni lexi nga kwetsimiki.

← Chapter 41 Jump to: Chapter 43 →