Ezekiel 26

Tsonga Xitsonga (Bibele) 1929

← Chapter 25 Jump to: Chapter 27 →

1Kute hi lembe ra vukhume na rin'we, hi siku ro sungula ra n'hweti rito ra Yehovha ri ta eka mina, ri ku:

2“N'wana wa munhu, leswi Tiri a vuleke ehenhla ka Yerusalema, a ku: ‘Aha! Nyangwa ya matiko yi mbundzuxiwile va ta tlhelela eka mina ndzi ta tala hikuva u onhiwile.’

3Hikwalaho, Hosi Yehovha u ri: Vona, ndzi ta ku hundzukela, wena Tiri, ndzi ku tumbuluxela matiko lamanyingi, kukotisa lwandle hilaha ri humesaka magandlati ya rona hakona.

4Ma ta mbundzuxa marhangu ya Tiri, ma wisa makhokholo ya yena, ndzi ta kukula ntshuri wa yena, ndzi n'wi endla tamba leri ngeke na nchumu.

5U ta hundzuka xivandla lexi ku anekiwaka tinkoka eka xona exikarhi ka lwandle, hikuva ku vulavule mina; ku vula Hosi Yehovha; u ta nyiketiwa ku onhiwa hi matiko.

6Vanhwanyana va yena, lava nga etikweni ra yena, va ta dlawa hi fumu, va ta swi tiva leswaku hi mina Yehovha.

7“Hikuva Hosi Yehovha u ri: Vonani, ndzi ta landza Nebukadnetsara, hosi ya Babilona, hosi ya tihosi, en'walungwini, ndzi n'wi tisa eTiri, a ta hi tihanci, ni tigolonyi, ni vakhandziyi, ni mavandla, ni vanhu lavanyingi.

8U ta dlaya hi fumu vanhwanyana va wena lava nga etikweni ra wena, a va a ku rhendzela hi khumbi leri rhendzelaka, kutani a ku yimisela tinhulu, a ku tlakusela switlhangu.

9U ta ba makhumbi ya wena hi switirho swa yena swa ku mbundzumuxa ni makhokholo ya wena u ta ma wisa ehansi hi swihloka swa yena.

10Ntshuri wa vakhandziyi va yena wu ta ku funengeta hikwalaho ka ku tala ka vona; mpfumawulo wa vakhandziyi va yena, ni wa masondzo, ni tigolonyi ta yena wu ta tsekatsekisa makhumbi ya wena siku a nghenaka hi tinyangwa ta wena tanihi loko ku ngheniwa emutini lowu ku boxiweke rirhangu ra wona.

11U ta kandziyela mitsendzele ya wena hinkwayo hi swinyirhi swa tihanci ta yena; u ta dlaya vanhu va wena hi fumu, ni maribye ya matimba ya wena ma ta wa ehansi.

12Va ta byisa swifuwo swa wena, va onha mitirho ya wena ya mabindzu; va mbundzuxa marhangu ya wena, va hahlula tindlu ta wena leto saseka, va cukumeta maribye ya wena ni mirhi ya wena, ni ntshuri wa wena ematini.

13Ndzi ta miyeta pongo ra ku yimbelela ka wena, kutani a ku nga ha twi mpfumawulo wa tiharipa ta wena.

14Ndzi ta ku endla tamba leri omeke; u ta hundzuka xivandla lexi ku anekiwaka tinkoka eka xona; a ku nga ha akiwi nakambe; hikuva ku vulavule mina, Yehovha.

15“Hosi Yehovha a ku eka Tiri: Xana swihlale a swi nga tsekatseki hi mpfumawulo wa ku wa ka wena, ni ku rila ka lava tlhaviweke, ni ku dlawa loku nga ta endliwa exikarhi ka wena xana?

16Kwalaho tihosi hinkwato ta lwandle ti ta xika eswitshan'weni swa tona swa vuhosi, ti susa tinguvu ta tona, ti funungula swifunengelo swa tona swa vubombi; ti va ti funengela ku rhurhumela; ti tshama ehansi, ti rhurhumela hi mikarhi hinkwayo, ti hlamala ha wena.

17Va ta endla swirilo ehenhla ka wena, va ku eka wena: U lovise ku yini, wena loyi ingi u akiwile hi va malwandle, wena muti lowu twaleke, lowu ingi wu ri ni matimba elwandle, wena ni hinkwavo lava akeke eka wena, lava ingi va chaviwa hi hinkwavo lava akeke emalwandle xana?

18Kutani swihlale swi ta tsekatseka esikwini ra ku wa ka wena; ina, swihlale leswi nga elwandle swi ta rhurhumela hi ku hela ka wena.

19“Hikuva Hosi Yehovha u ri: Siku ndzi ku endlaka rhumbi leri fanaka ni miti leyi nga riki na vaaki, siku ndzi ku humeselaka xidziva, kutani mati lamakulu ma ta ku funengeta,

20ndzi ta ku cukumeta kun'we ni lava nghenaka enceleni, eka vanhu va khale, ndzi ku akisa emisaveni ya le hansi, emarumbini ya khale, kun'we ni lava ngheneke enceleni, leswaku a ku nga ha akiwi; ndzi ta veka ku kwetsima etikweni ra lava hanyaka.

21Ndzi ta ku endla xilo lexi chavisaka, kutani a ku nga ha vi kona; u ta laviwa, kambe a ku nga ha kumiwi, ni siku ni rin'we; ku vula Hosi Yehovha.”

← Chapter 25 Jump to: Chapter 27 →