Numbers 13

Umbundu Bible (Embimbiliya - Bíblia Sagrada em Umbundu)

← Chapter 12 Jump to: Chapter 14 →

1Yehova wa popia la Mose hati,

2Tuma alume oku lavulula ofeka ya Kanana, eyi ñasi loku eca ku Isareli. Kapata epata ku tunda ulume. Ava va noliwa te asongui vavo lika.

3Mose wa va tuma ndondaka ya Yehova eci va kala vekalasoko lia Parane, vosi yavo akulu va va Isareli.

4Olonduko viavo vievi: Kepata lia Ruvene, Siamuwa, omõla a Sakuru.

5Kepata lia Simeone, Siafata, omõla a Hori.

6Kepata lia Simeone, Siafata, omõla a Yefune.

7Kepata lia Isakare, Yigala, omõla a Yosefe.

8Kepata lia Efarimi, Hosea, omõla a Nune.

9Kepata lia Benjamini, Paliti, omõla a Rafu.

10Kepata lia Sevulono, Gadiyele, omõla a Sodi.

11Kepata lia Yosefe, hailio epata lia Manase, Gadi, omõla a Suse.

12Kepata lia Dani, Amiyele, omõla a Gemali.

13Kepata lia Asiere, Seturu, omõla a Mingeli.

14Kepata lia Nafitali, Nahavi, omõla a Wofisi.

15Kepata lia Gadi, Geuele, omõla a Maki.

16Evi ovio olonduko vialume Mose a tuma oku lavulula ofeka yaco. Hosea, omõla a Nune. Mose wo luka Yehosua.

17Mose wa va tuma oku lavulula ofeka ya Kanana. Wa popia lavo hati, Kuendi kofeka yoko Sul, lamaneli kofeka yolomunda.

18Kulĩhĩsi ofeka ndomo yi kasi. Kũlĩhisivo omanu va tungamo nda va pama nda ka va pamẽle, nda vañamiñami nda va lua.

19Kũlĩhisi ofeka omo va tunga nda yi kasi ndati, nda yiwa nda yĩvĩ. Kũlĩhisi ovaimbo va kasi lao nda a tuwa ndati, nda ovilombo nda olombonge.

20Kulĩhĩsi osi yaco nda yombolela nda yesesẽla. Kũlĩhisivo nda muli olohui nda ka muli. Kuati utõi, enju lapako amue ofeka. Kaliye oloneke viaco ovio viuvo wayuva atete.

21Oco va lamana, va lavulula ofeka tunde kekalasoko lia Cina toke ko Rehova, oku iñilĩla ko Hamati.

22Va lamanẽla konẽle yoko Sul, veya toke ko Hevirone; oko kua kala Ahimana, la Sesai, kuenda Talimai, omãla va Anaki. Hevirone, olio lia tungiwa tete. Eci pa pita anyamo epanduvali oco ve Egito va tunga noke Coana.

23Oco veya toke komuva ye Esikole, oko va teta olunavi luti wayuva lu kasi locisiakata cayuva, vavali va ci yenja. Va ambatavo apako oromeira kuenda akuyu.

24Va tukula omuva yaco vati, Omuva ye Esikole, ca lomboloka ocisiakata, omo va Isareli va tetelemo ocisiakata.

25Kovaso yakui akuãla koloneke oco va tiuka koku lavulula ofeka.

26Veya ku Mose la Arone kuenda kowiñi wosi wa va Isareli va kala vekalasoko lia Parane, ko Kadesi. Va lombolola cosi ku Mose la Arone kuenda kowiñi wosi. Va va lekisa epako liofeka.

27Vo sapuila vati, Tua ile vofeka wa tu tumile, ocili yi tumõha asenjele lowiki. Epako liofeka yaco lieli.

28Puãi omanu va tunga vofeka yaco va pama, ovaimbo aco a malehisua ha-o anene ca lua. Oko tua mõlavo va Anaki.

29Va Amaleke va tunga vofeka yo Sul. Va Hiti, la va Yevusi, kuenda va Amori va tunga vofeka yolomunda; va Kanana va tunga konẽle yokokalunga, lokonẽle ya Yordão.

30Puãi Kalembe wõhĩsa omanu kovaso a Mose, wa popia hati, Tu lamani ndopo, tu yi kuati, momo oku yi yula tu ci tẽla muẽle.

31Puãi alume va lamanẽle laye kumosi va popia vati, Oku liyaka lomanu vaco ka tu ci tẽla, omo va pama, etu tu sule.

32Va sapuila va Isareli ondaka yĩvĩ yofeka va ka lavuluile vati, Ofeka tua nyula oku lavulula, ofeka yaco yi lialia olonungi viaco. Omanu vosi tua muĩlãmo va lepa ca lua.

33Oko tua muĩlãvo ovindululu haivo va lepa, okuti va Anaki, ombuto yovindululu. Oku livanja etu muẽle tua kala ndapange, haico tua molẽha kokuavo.

← Chapter 12 Jump to: Chapter 14 →