Numbers 32

Umbundu Bible (Embimbiliya - Bíblia Sagrada em Umbundu)

← Chapter 31 Jump to: Chapter 33 →

1Va Ruvene la va Gadi va kala lovinyama via lua cimue. Va vanja ofeka ya Yasere lofeka ya Gileada kuenje va limbuka okuti oko ku li ulisilo wovinyama.

2Oco va Gadi la va Ruvene veya ku Mose kuenda ocitunda eleasa lasongui va va Isareli. Va popia lavo, vati,

3Ovaimbo a Ataroti, la Divone, la Yasere, kuenda Nimira, la Hesibone, la Eleale, kuenda sivima, la Nevo, la Beone,

4a kasi vofeka Yehova a yulila va Isareli. Tua limbuka okuti ofeka yaco oyo ya sesamẽla ovinyama. Etu tuakuenje vove tu kuete ovinyama.

5Kuenje vati, Nda o tu kuetele ohenda, tava okuti tu tunga vofeka eyi ha yi lingi yetu. Ku ka tu yokise Yordão.

6Puãi Mose wa kumbulula Gadi la va Ruvene hati, Vakuẽle hẽ va enda kovita osimbu ene vu tumãla ño kulo?

7Nye vu konyuisila utima wa va Isareli okuti ka va yongola oku yokela kofeka Yehova a va iha?

8Haico ca linga olosekulu viene, eci nda va tuma ko Kadesia Barnea oku vanja ofeka.

9Ovo, eci va ile komuva ya Esikole, yu va tala ofeka yaco, va konyuisa utima wa va Isareli okuti ka va yonguile oku iñila vofeka Yehova a va iha.

10Oco onyeño ya Yehova ya wengukile keteke liaco muẽle, kuenje wa lisinga hati,

11Ocili ovalume va tunda ke Egito, vakuanyamo akuĩ avali kuenda kua supa, ka va mõli ofeka nda likuminya la Avirahama kuenda Isake la Yakoba oku va yiha momo ka va ñuamele ciwa.

12Te Kalembe, omõla a Yefune u Kenasi, la Yehosua, omõla a Nune, ovo lika va iñila omo va kuama ocili Yehova.

13Oco onyeño ya Yehova ya wengukila va Isareli. Wa va ñualãisa oko loko vekalasoko akuĩ akuãla kanyamo, te ocitumbulukila caco cosi cava va linga cĩvi kovaso a Yehova ca takata.

14Kaliye tala, ene wa likuti oku linga cĩvi, wa piñali kolomangu via vaisiene, ho wenguila vali va Isareli onyeño ya tokota ya Yehova.

15Momo nda ene vu konyõha oku u kuama, eye o va sia vali vekalasoko, kuenje vu nyõla omanu ava vosi.

16Oco veya kokuaye, va popia vati, Tu tunga kulo ovimanga violongombe vietu, kuenda ovaimbo omãla vetu.

17Puãi etu tu mãleha, tu pita kovaso a va Isareli toke tu va tuala pocitumãlo cavo. Kuenje omãla vetu va tumãla vovaimbo a malehisua omo vakuafeka va lingisa usumba.

18Etu ka tu tiukila kolonjo vietu te va Isareli va kuata, u ocipiñalo caye, u ocipiñalo caye.

19Momo ka tu ka piñala lavo kesinya lia Yordão, ndaño kovaso yaco, momo ocipiñalo cetu ci kasi sinya lilo lia Yordão kutundilo.

20Oco Mose wa popia lavo, hati, Nda wu linga ndoco okuti wu malẽha loku enda kovita kovaso a Yehova,

21kuenje nda vosi yene wa mãlehi vu yoka Yordão kovaso a Yehova, toke Yehova o tundisa ovanyãli vaye kovaso aye,

22kuenje ofeka yi yulisa kovaso a Yehova, oco wu tiuka noke kuenje wu yovoka kovaso a Yehova lokovaso a va Isareli. Lofeka yilo yi linga yene kovaso a Yehova.

23Puãi nda ka wu ci lingi, ca lomboloka okuti wa lingili Yehova ekandu. Kuenje limbuki okuti ekandu liene liu wili.

24Oco tungili omãla vene ovaimbo, lolomeme viene vi tungili ovimanga. Noke lingi ndeci wa likuminyi.

25Oco va Gadi la va Ruvene va popia la Mose, vati, Etu tuakuenje vove tu linga ndeci ove u cime cetu o tu sapuila.

26Omãla vetu lakãi vetu, loviunda vietu lolongombe vietu, cosi ci kala vovaimbo a Gileada.

27Puãi etu tuakuenje vove tu yoka. Etu vosi tua malehisua tu enda kovita kovaso a Yehova, ndeci cime cetu a popia.

28Oco Mose wa lombolola ondaka yavo kocitunda Eleasa kuenda ku yehosua omõla a Nune, wa yi lombololavo kakulu vapata a va Isareli.

29Mose wa popia lavo hati, Va Gadi vosi la va Ruvene vosi ava va malehisua nda va yoka lene Yordão kovaso a Yehova, kuenje vu yula ofeka yaco oco wu va iha ofeka ya Gileada okuti yi linga yavo.

30Puãi nda ka va tava oku yoka lene lovimãlẽho viavo, va tambula ovipiñalo viavo pokati kene vofeka ya Kanana.

31Va Gadi la va Ruvene va tambulula vati, Eci Yehova a popia letu tuakuenje vove oco tu linga.

32Tu mãleha, tu yokila kofeka ya Kanana kovaso a Yehova. Etu tu kuata ocipiñalo cetu sinya lilo lia Yordão.

33Oco Mose wa eca ku va Gadi, kuenda ku va Ruvene, kuenda konepa yepata lia Manase, omõla a Yosefe, ofeka ya Sihoni, osoma ya va amori, lofeka ya Oge, osoma ya Basiane, ofeka lovaimbo ayo lovikanjo viayo, okuti ovaimbo osi a ñualako.

34Va Gadi va tunga Divone, la Ataroti, la Aroere,

35la Atirote Siofane, la Yasere, la Yogibeha,

36la Betenimira, la Beteharana, ovaimbo a pama lovimanga violomeme viavo.

37Va Ruvene va tunga Hesibone, la Eleale, la Kiriatami,

38la Nevo, la Baale Meone, olonduko viao vi pongoloka, la Sivima Ovaimbo va a tunga va a tukula olonduko viñi.

39Omãla va Makiri, omõla a Manase, va enda ko Gileada, va yi kuata, va tundisa va Amori va kalamo.

40Oco Mose wa eca Gileada ku Makiri, omõla a Manase, yu wa tungilamo.

41Yairi, omõla a Manase, wa enda, wa kuata ovaimbo aco, wa a tukula Hawote Yairi.

42Nova wa enda wa kuata Kenata lovikanjo vialio, wa li tukula Nova oku liukuluila.

← Chapter 31 Jump to: Chapter 33 →