Numbers 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Yehova wa popia la Mose hati,

2Sapuila va Isareli okuti va tundisa vocilombo vakuavilundu vosi, lava vosi va kasi loku pita cimue ketimba, la vosi va vĩhĩsua omo va lamba kovivimbi.

3Va tundisue muẽle, ci kale alume, ci kale akãi. Va tundisiwile kofeka, okuti ka va vĩhĩsa ocilombo cavo omo ame ñasi vokati kaco.

4Oco va Isareli va ci linga, va va tundisa vocilombo. Ndeci Yehova a popia la Mose haico va Isareli va linga.

5Yehova wa popia la Mose hati,

6Popia la va Isareli huti, Nda ulume pamue ukãi o linga ekandu limue omanu va lingainga, okuti o lueyela ku Yehova, kuenje o kasi leko,

7omunu waco o litavela ekandu liaye a linga loku feta eci ca soka leko liaye, kuenje o vandekako onepa yatãlo yoku eca ku a lingila eko.

8Puãi nda omunu waco ka kuete ngandiaye kundeti ci tava oku eca oniuwile yaco, oniuwile yaco yeko yeciwa ku Yehova, yi linga yocitunda; yi vandeka kocitupi coku tuvika ekandu va tuvika laco ekandu liaye.

9Kuenda ovilumba viosi, okuti ovina viosi vi kola va Isareli va nena kocitunda, vi linga viocitunda.

10Evi viosi vi kola omunu a nena vi linga viocitunda. Cosi omunu a eca kocitunda ci linga cocitunda.

11Yehova wa popia la Mose hati,

12Popia la va Isareli huti, Nda ukãi umue o lueya kuenje o lingila cĩvi veyaye,

13okuti ulume ukuavo o pekela laye kuenje veyaye ka ci kũlĩhĩle, omo lomue wo sanga ndaño ukãi wa livĩhĩsa, kuenje ka ku li ombangi yu pisa omo ka vo sangele;

14oco nda ulume o kuata ukuelume okuti o kuatela ukãi waye wa livĩhĩsa ukuelume, pamue nda o linga ukuokuelume okuti o kuatela ukãi waye ukuelume, ndaño ukãi ka livĩhĩsile,

15oco ulume enda kocitunda lukãi waye, o wambatela ocilumba ca tukuiwa okuti onepa yekui yefa liosema yosevata: ka itilako ulela, ka kapiko insensu, momo ocilumba caco ocilumba colomema coku kuatela ukuelume, haico ocilumba conjivaluiso coku ivaluisa ohole.

16Ocitunda cu wamisa, cu kapa kovaso a Yehova.

17Ocitunda ci nyañula ovava a kola vocikuata cotuma, o nyañulavo oneketela yoposi yombalaka, o yimba vovava.

18Ocitunda ci kapa ukãi kovaso a Yehova, ci salũla esinga liukãi, ci kapa povaka ukãi ocilumba colomema conjivaluiso, haico ocilumba coku kuatela ukuelume. Ovava ombulungu oku pisa pamue oku yovuisa a kala peka liocitunda.

19Ocitunda ci lisingisa, citi, Nda lomue ulume wa pekela love, okuti kua lueyele loku livĩhĩsa osimbu ove wa kueliwa, oco ovava a ombulungu ka a ku lingi cimue.

20Puãi nda wa lueya osimbu ove wa kueliwa kuenje wa livĩhĩsa okuti ulume umue haveyoveko wa pekela love,

21oco ocitunda ci lisingisa vali ukãi citi, Yehova a ku yukisa vovimela viomanu loku pembuiwa eci Yehova a fuvisa ocikalo cove loku lendisa imo liove.

22Lovava a ombulungu a iñile vetimba liove loku lendisa imo liove, a fuvise ocikalo cove. Ukãi a popia hati, amene, amene.

23Ocitunda ci sonẽha asingo a velivulu, kuenje ci a yava vovava ombulungu.

24Noke a nyuisa ukãi ovava ombulungu; ukãi o nyua ovava ombulungu kuenje olongembia via lua vi fetika.

25Ocitunda cupa peka liukãi ocilumba colomema cukuelume, ci yangelisa ocilumba colomema kovaso a Yehova kuenje ci ci tuala kutala.

26Ocitunda ci yoya epupu liocilumba colomema ndonjivaluiso yaco kuenje ci li yokela kutala. Noke o nyuisa ukãi ovava ombulungu.

27Eci co nyuisa ovava, oco nda ukãi wa livĩhĩsa kuenje wa pita veyaye konyima, oco ovava ombulungu o wiñila kuenje olongembia via lua vi fetika. Imo liaye li lenda locikalo caye ci fuva. Kuenje ukãi waco o yuka vovimẽla viomanu pokati kofeka yavo.

28Puãi nda ukãi ka livĩhĩsile kuenje wa yela, o yovoka, o kuata omãla.

29Eci oco ocihandeleko cukuelume, nda ukãi okueliwe o lueya loku livĩhĩsa;

30pamue nda ulume ukuokuelume o kuatela ukãi waye ukuelume; oco o kape ukãi kovaso a Yehova, kuenje ocitunda cu lingila ocihandeleko eci cosi.

31Oco ulume o yovoka, lukãi enda longole yaye.

← Chapter 4 Jump to: Chapter 6 →

Recommended Reading

Commentary Numbers Commentaries → Devotional Numbers Devotional Guide → Get This Bible Umbundu Bible (Embimbiliya - Bíblia Sagrada em Umbundu) Study Bible →