Song of Solomon 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ocisungo ca piala, haico ca Salomone.

2A sipule lasipulo omẽla waye! Momo ocisola cove ca velapo, ovinyu vi sule.

3Olonguendu viove vioku sieketa vi kuete elemba liwa. Onduko yove ya soka ndonguendu eci yitilua. Oco afeko va ku solele.

4Ñokele oku ku kuama; tu yayuleko. Soma wa nyiñisa volohondo viaye. Tu nyamũla loku ku sanjukila. Tu sivaya ca lua ocisola cove, ovinyu ci sule. Ca sunguluka okuti va ku sola.

5Afeko va Yerusalãi, ndi tekãva tupu, haimo nda posoka. Nda soka ndolombalaka via Kedare; pamue ndolokutina via Salomone.

6Ku ka nalele okutekãva kuocipala cange, momo utanya wa ñakula. Va kota va funguila. Va ñundika oku tata oviumbo viayuva, puãi viange muẽle sia vi tatele!

7Sapuileko, ove hu sole ndomuenyo wange muẽle, apa o lisaila oviunda viove, lapa o vi kavuluaisaila ekumbi pongunji. Nye ndingila ndu o ñuala ñuala oku kuama oviunda via vakuẽle?

8Okãi wa piãla oku posoka, nda kua ci kulĩhĩle, ka kuame olohoka vioviunda, oco o lise otuhombo tuove ocipepi lolombalaka viovangombo.

9Okuacisola cange, hu sokisa lokavalu kamue kakalu a Fareo.

10Atama ove a posoka. Osingo yove ya posuisua lolomota.

11Tu ku tungila evi viulu vioku posuisa, loku vi tokekisa latokekelo opalata.

12Eci Soma a tumãla komesa onguendu yange ya fina ya tunda elemba liwa.

13Ukuacisola cange wa soka ndokacitungu ka mura

14Ukuacisola cange wa soka ndocisakata colonẽlẽho vioviumbo viayuva oke Engedi.

15Okuacisola cange, wa posoka; wundambi muẽle; ovaso ove a soka ndovaso opomba.

16Lovevo wa posoka, okuacisola cange; o ñokela esanju; ula wetu u talala.

17Olohangalo vionjo yetu ovinendele via Levanone; osoka yetu ovinjuanga.

Jump to: Chapter 2 →