Song of Solomon 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Ame ndilosa lioko Sarone, haime ndinẽlẽho yovovimbota.

2Ndonẽlẽho yopokati kolosongo, haimo mua soka ukuacisola cange pokati kafeko vakuavo.

3Ndomaciera yopokati koviti viovusenge, haimo mua soka ukuacisola cange pokati kakuenje vakuavo. Nda tumãla vundembo waye; vutima mua sanjuka. Apako aye a mepa.

4Wa nyiñisa vonjo yoku lia ofesta, yu epandela liocisola caye lia mapela vilu.

5Ndise ayuva a kukuta; nalalise lolomasa, momo mbela ocisola.

6Eka liaye liepĩli nda lia ñunamisile kutue! Eka liaye liondio nda lia ñuatele!

7Ndu piliki, afeko va Yerusalãi; Ndu piliki muẽle lolomunya lolonusi viovanyãla, siti, Ko ka tuñunyi ukuacisola cange. Ko ko pasuli, toke eci muẽle a yongola.

8Ondaka yukuacisola cange yi yevala! Tala, iya! O li loku sombokela kolomunda kuenda oku tehẽla koviwulu.

9Ukuacisola cange wa soka ndomunya pamue ndokanusi. Tala, yu! O tai konyima yocimbaka cetu loku vanjela ponjanela, kuenda oku lengelela papangu olombindikiyo viaco.

10Ukuacisola cange wa popia, wa mbanguisa. Hati, Pasuka, okuacisola cange, andambi yange; Tundamo; enju kokuange.

11Momo tala! Otembo yombambi ya pita. Ocikokoto ka ku li vali.

12Olonẽlẽho vi molẽha vali vofeka; kueya otembo yoku imba ovisungo, kuenje ocileñi conende ci yevala vofeka yetu.

13Akuyu a fetika oku ima; ayuva a telẽha, a tunda elemba liwa. Okuacisola cange, votoka. A Ndambi yange, tu ende.

14A Pomba yange, wa salama vapuluvi ovawe pamue vociwundilo covekungu, mole ocipala cove. Njeve ondaka yove. Momo ondaka yove yiwa; ocipala cove ca posoka.

15Ñuateli otumbulu, tuna tu nyõla nyõla ayuva, momo voviumbo vietu viayuva mua teleha.

16Ukuacisola cange wa linga muẽle wange, lame nda linga waye. Ukuakulisila oviunda viaye pokati kolonẽlẽho.

17Osimbu ka kua cile, osimbu ongula ka ya towile, tiuka, okuacisola cange. Linga ndomunya pamue ndokanusi kolomunda vialupele.

← Chapter 1 Jump to: Chapter 3 →