Song of Solomon 5

Umbundu Bible (Embimbiliya - Bíblia Sagrada em Umbundu)

← Chapter 4 Jump to: Chapter 6 →

1Ndeya kocumbo cange, a manjange, a ndombua yange. Njunga mura yange loku kuata olosimbolua viange. Owiki wange wovovingo nda lia. Nda nyua ovinyu viange lasenjele. Akamba vange, li, nyui. Nyui ca lua, ene avakuacisola cange.

2Nda pekela otulo, utima puãi wa pasuka. Yeveleli! Ukuacisola cange o li loku totola! Hati, Njuluileko, a manjange, okuacisola cange, a pomba yange, okuetu wa pua atondelo. Utue wange we yuka owume; ocifuko cange ce yuka owume wa loka uteke.

3Nda lula ale okapa yange; ndi yi wala vali ndati? Nda sukula olomãi viange; ndi vi liñisa vali ndati?

4Ukuacisola cange wa iñisa eka liaye vepangu liepito, yu utima wange wa lisenga.

5Nda votokela oku yuluila ukuacisola cange; ovaka ange a nosa mura, lovimuine viange via nosa atosi aco eci nda kuata kakuatelo aco.

6Nda yuluila ukuacisola cange, puãi muẽle wa tundako, wa enda. Eci a popia utima wange wa sakalala. Ndo sanda, puãi sia tẽlele oku u sanga. Ndo vilikiya, puãi ekumbululo sio.

7Olondavululi vioku ñuala ñuala imbo va sanga va numa, va nota olombole. Ovotati ovimbaka va nyẽha oveu yange.

8Afeko va Yerusalãi, ndu piliki, siti, Nda wu sangi ukuacisola cange u sapuili okuti mbela ocisola.

9Ofeko wa piãla oku posoka, anga, ukuacisola cove wa velapo ndati okuti vakuavo vosi va sule? Ukuacisola cove wa velapo ndati, okuti vakuavo vosi va sule? O tu ci kisikila nye?

10Ukuacisola cange ukuetimba li yela, o kusuka; pokati kekui liolohũlũkãi eye fũ.

11Utue waye u molẽha ndulu wa fina. Ocifuko caye ca sitika ci tekãva ndocikuamanga.

12Ovaso aye a soka ndolopomba okonele yokalui; huti ño a sukuiwa lasenjele, o lie!

13Atama aye ndocikandela covikũla vielemba liwa. Omẽla waye wa soka ndolonẽlẽho vi lowisa atosi omura.

14Ovoko aye huti ño ovinunga viulu, a posuisua lovawe a tĩla. Etimba liaye li nina ndolombinga vionjamba, hailio lia lañiwa lovawe a safiru.

15Ovolu aye ndolongunji viewe lia yela lie, via tumbikiwa kociseveto culu. Upolo waye wa soka nda Levanone; wa posoka ndovinendele viaco.

16Upolo waye wa posoka. Ndu li vela ca lua; pa pia muẽle! Afeko va Yerusalãi, oco ca soka ukuacisola cange, haeye ekamba liange.

← Chapter 4 Jump to: Chapter 6 →