bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Daniel 10
Daniel 10
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 11 →
1
Sháh i Fárs Ḳhoras ke tísre sál meṉ Dáníel par, jis ká nám Beltashazzar rakkhá gayá, ek bát záhir kí gayí, aur wuh bát sach aur baṛí lashkarkashí kí thí, aur us ne us bát par g̣aur kiyá, aur us royá ká bhed samjhá.
2
Maiṉ Dáníel un dinoṉ meṉ tín haftoṉ tak mátam kartá rahá.
3
Na maiṉ ne lazíz kháná kháyá, na gosht aur mai ne mere muṉh meṉ daḳhl páyá, aur na maiṉ ne tel malá jab tak ki púre tín hafte guzar na gaye.
4
Aur pahle mahíne kí chaubíswíṉ táríḳh ko, jab maiṉ baṛe daryá ya‘ní daryá e Dajlah ke kanáre par thá,
5
maiṉ ne áṉkh uṭhákar nazar kí, aur kyá dekhtá húṉ, ki ek shaḳhs katání pairáhan pahine, aur Úfáz ke ḳhális sone ká paṭká kamar par báṉdhe khaṛá hai.
6
Us ká badan zabarjad kí mánind, aur us ká chihra bijlí sá thá, aur us kí áṉkheṉ átashí chirág̣oṉ kí mánind thíṉ. Us ke bázú aur páṉw rangat meṉ chamakte húe pítal se the, aur us kí áwáz amboh ke shor kí mánind thí.
7
Maiṉ Dáníel hí ne yih royá dekhí, kyúṉki mere sáthíoṉ ne royá na dekhí, lekin un par baṛí kapkapí tárí húí, aur wuh apne áp ko chhipáne ko bhág gaye.
8
So maiṉ akelá rah gayá, aur yih baṛí royá dekhí, aur mujh meṉ táb na rahí; kyúṉki merí tázagí pazhmurdagí se badal gayí, aur merí táqat játí rahí.
9
Par maiṉ ne us kí áwáz aur báteṉ suníṉ, aur maiṉ us kí áwáz aur báteṉ sunte waqt muṉh ke bal bhárí níṉd meṉ paṛ gayá, aur merá muṉh zamín kí taraf thá.
10
Aur dekh, ek háth ne mujhe chhúá, aur mujhe ghuṭnoṉ aur hatheliyoṉ par biṭháyá.
11
Aur us ne mujh se kahá, Ai Dáníel, ‘azíz mard, jo báteṉ maiṉ tujh se kahtá húṉ, samajh le, aur sídhá khaṛá ho já, kyúṉki ab maiṉ tere pás bhejá gayá húṉ. Aur jab us ne mujh se yih bát kahí, to maiṉ káṉptá húá khaṛá ho gayá.
12
Tab us ne mujh se kahá, Ai Dáníel, ḳhauf na kar, kyúṉki jis roz se tú ne dil lagáyá ki samjhe, aur apne Ḳhudá ke huzúr ‘ájizí kare, terí báteṉ suní gayíṉ, aur terí bátoṉ ke sabab se maiṉ áyá húṉ.
13
Par Fárs kí mamlukat ke muwakkil ne ikkís din tak merá muqábala kiyá. Phir Míkáel, jo muqarrab firishtoṉ meṉ se hai, merí madad ko pahuṉchá, aur maiṉ sháhán i Fárs ke pás ruká rahá.
14
Par ab maiṉ is liye áyá húṉ, ki jo kuchh tere logoṉ par áḳhirí aiyám meṉ áne ko hai, tujhe us kí ḳhabar dúṉ, kyúṉki hanoz yih royá zamána e daráz ke liye hai.
15
Aur jab us ne yih báteṉ mujh se kahíṉ, maiṉ sir jhukákar ḳhámosh ho rahá.
16
Tab kisí ne, jo ádamzád kí mánind thá, mere hoṉṭhoṉ ko chhúá, aur maiṉ ne muṉh kholá, aur jo mere sámne khaṛá thá, us se kahá, Ai ḳhudáwand, is royá ke sabab se mujh par g̣am ká hujúm hai, aur maiṉ nátawán húṉ.
17
Pas yih ḳhádim apne ḳhudáwand se kyúṉkar hamkalám ho saktá hai? Pas maiṉ bi’lkull betáb o bedam ho gayá.
18
Tab ek âur ne, jis kí súrat ádmí kí sí thí, ákar mujhe chhúá, aur mujh ko taqwíyat dí;
19
aur us ne kahá, Ai ‘azíz mard, ḳhauf na kar; terí salámatí ho, mazbút o tawáná ho. Aur jab us ne mujh se yih kahá, to maiṉ ne tawánáí páí, aur kahá, Ai mere ḳhudáwand, farmá, kyúṉki tú hí ne mujhe quwwat baḳhshí hai.
20
Tab us ne kahá, Kyá tú jántá hai ki maiṉ tere pás kis liye áyá húṉ? Aur ab maiṉ Fárs ke muwakkil se laṛne ko wápas játá húṉ, aur mere játe hí Yúnán ká muwakkil áegá.
21
Lekin jo kuchh sachcháí kí kitáb meṉ likhá hai, tujhe batátá húṉ, aur tumháre muwakkil Míkáel ke siwá is meṉ merá koí madadgár nahíṉ hai.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 11 →
All chapters:
1
2
3
4
5
6
7
8
9
10
11
12