Daniel 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to:

1Aur us waqt Míkáel muqarrab firishta, jo terí qaum ke farzandoṉ kí himáyat ke liye khaṛá hai uṭhegá, aur wuh aisí taklíf ká waqt hogá, ki ibtidá e aqwám se us waqt tak kabhí na húá hogá. Aur us waqt tere logoṉ meṉ se har ek jis ká nám kitáb meṉ likhá hogá riháí páegá.

2Aur jo ḳhák meṉ so rahe haiṉ, un meṉ se bahutere jág uṭheṉge; ba‘z hayát i abadí ke liye, aur ba‘z ruswáí aur zillat i abadí ke liye.

3Aur ahl i dánish núr i falak kí mánind chamkeṉge, aur jin kí koshish se bahutere sádiq ho gaye, sitároṉ kí mánind abadu’l ábád tak raushan hoṉge.

4Lekin tú, ai Dáníel, in bátoṉ ko band kar rakh, aur kitáb par áḳhirí zamáne tak muhr lagá de. Bahutere is kí taftísh o tahqíq kareṉge, aur dánish afzún hogí.

5Phir maiṉ Dáníel ne nazar kí, aur kyá dekhtá húṉ, ki do shaḳhs âur khaṛe the, ek daryá ke is kanáre par, dúsrá daryá ke us kanáre par.

6Aur ek ne us shaḳhs se, jo katání libás pahine thá, aur daryá ke pání par khaṛá thá, púchhá, ki In ‘ajáib ke anjám tak kitní muddat hai?

7Aur maiṉ ne suná ki us shaḳhs ne, jo katání libás pahine thá, jo daryá ke pání par khaṛá thá, donoṉ háth ásmán kí taraf uṭhákar Haiyu’l qaiyúm kí qasam kháí, aur kahá, ki Ek daur aur daur aur ním daur; aur jab wuh muqaddas logoṉ ke iqtidár ko nest kar chukeṉge, to yih sab kuchh púrá ho jáegá.

8Aur maiṉ ne suná, par samajh na saká. Tab maiṉ ne kahá, Ai mere ḳhudáwand, in ká anjám kiyá hogá?

9Us ne kahá, Ai Dáníel, tú apní rah le, kyúṉki yih báteṉ áḳhirí waqt tak band o sar ba muhr raheṉgí.

10Aur bahut log pák kiye jáeṉge, aur sáf o barráq hoṉge; lekin sharír sharárat karte raheṉge, aur sharíroṉ meṉ se koí na samjhegá, par dánishwar samjheṉge.

11Aur jis waqt se dáimí qurbání mauqúf kí jáegí, aur wuh ujáṛnewálí makrúh chíz nasb kí jáegí, ek hazár do sau nauwe din hoṉge.

12Mubárak hai wuh jo ek hazár tín sau paiṉtís roz tak intizár kartá hai.

13Par tú apní rah le, jab tak ki muddat púrí na ho, kyúṉki tú árám karegá, aur aiyám ke iḳhtitám par apní mírás meṉ uṭh khaṛá hogá.

← Chapter 11 Jump to: