Daniel 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Nabúkadnazar bádsháh kí taraf se tamám logoṉ, ummatoṉ aur ahl i lug̣at ke liye, jo tamám rú e zamín par sukúnat karte haiṉ. Tumhárí salámatí afzún ho.

2Maiṉ ne munásib jáná, ki un nishánoṉ aur ‘ajáib ko záhir karúṉ jo Ḳhudá Ta‘álá ne mujh par áshkárá kiye haiṉ.

3Us ke nishán kaise ‘azím! aur us ke ‘ajáib kaise muhíb haiṉ! us kí mamlukat abadí mamlukat hai, aur us kí saltanat pusht dar pusht.

4Maiṉ Nabúkadnazar apne ghar meṉ mutma‘inn, aur apne qasr meṉ kámrán thá.

5Maiṉ ne ek ḳhwáb dekhá, jis se maiṉ hirásán ho gayá, aur un tasawwurát se, jo maiṉ ne palang par kiye, aur un ḳhayáloṉ se jo mere dimág̣ meṉ áe, mujhe pareshání húí.

6Is liye maiṉ ne farmán járí kiyá ki Bábul ke tamám hakím mere huzúr házir kiye jáeṉ, táki mujh se us ḳhwáb kí ta‘bír bayán kareṉ.

7Chunáṉchi sáhir, aur najúmí, aur Kasdí, aur fálgír házir húe, aur maiṉ ne un se apne ḳhwáb ká bayán kiyá, par unhoṉ ne us kí ta‘bír mujh se bayán na kí.

8Áḳhirkár Dáníel mere sámne áyá, jis ká nám Beltashazzar hai, jo mere ma‘búd ká bhí nám hai; us meṉ muqaddas iláhoṉ kí rúh hai; pas maiṉ ne us ke rúbarú ḳhwáb ká bayán kiyá, aur kahá,

9Ai Beltashazzar, sáhiroṉ ke sardár, chúṉki maiṉ jántá húṉ, ki muqaddas iláhoṉ kí rúh tujh meṉ hai, aur ki koí ráz kí bát tere liye mushkil nahíṉ, is liye jo ḳhwáb maiṉ ne dekhá, us kí kaifíyat aur ta‘bír bayán kar.

10Palang par mere dimág̣ kí royá yih thí. Maiṉ ne nigáh kí, aur kiyá dekhtá húṉ, ki zamín ke wasat meṉ ek niháyat úṉchá daraḳht hai.

11Wuh daraḳht baṛhá aur mazbút húá, aur us kí choṭí ásmán tak pahuṉchí, aur wuh zamín kí intihá tak dikháí dene lagá.

12Us ke patte ḳhúshnumá the, aur mewa firáwán thá, aur us meṉ sab ke liye ḳhurák thí. Maidán ke charande us ke sáye meṉ, aur hawá ke parande us kí sháḳhoṉ par baserá karte the, aur tamám bashar ne us se parwarish páí.

13Maiṉ ne apne palang par apní dimág̣í roya par nigáh kí, aur kyá dekhtá húṉ, ki ek nigahbán, háṉ, ek qudsí, ásmán se utrá.

14Us ne baland áwáz se pukárkar yúṉ kahá, ki Daraḳht ko káṭo; us kí sháḳheṉ tarásho, aur us ke patte jháṛo, aur us ká phal bakher do. Charande us ke níche se chale jáeṉ, aur parande us kí sháḳhoṉ par se úṛ jáeṉ.

15Lekin us kí jaṛoṉ ká kunda zamín meṉ báqí rahne do. Háṉ, lohe aur támbe ke bandhan se bandhá húá maidán kí harí ghás meṉ rahne do, aur wuh ásmán kí shabnam se tar ho, aur us ká hissa zamín kí ghás meṉ haiwánoṉ ke sáth ho.

16Us ká dil insán ká dil na rahe, balki us ko haiwán ká dil diyá jáe, aur us par sát daur guzar jáeṉ.

17Yih hukm nigahbánoṉ ke faisale se hai, aur yih amr qudsíoṉ ke kahne ke mutábiq hai, táki sab zí hayát pahchán leṉ ki Ḳhudá Ta‘álá ádmíoṉ kí mamlukat meṉ hukmrání kartá hai, aur jis ko cháhtá hai use detá hai, balki ádmíoṉ meṉ se adná ádmí ko us par qáim kartá hai.

18Maiṉ Nabúkadnazar bádsháh ne yih ḳhwáb dekhá hai; ai Beltashazzar, tú us kí ta‘bír bayán kar, kyúṉki merí mamlukat ke tamám hakím mujh se is kí ta‘bír bayán nahíṉ kar sakte; lekin tú kar saktá hai, kyúṉki muqaddas iláhoṉ kí rúh tujh meṉ maujúd hai.

19Tab Dáníel, jis ká nám Beltashazzar hai, ek sá‘at tak sarásíma rahá, aur apne ḳhayálát meṉ pareshán húá. Bádsháh ne us se kahá, Ai Beltashazzar, ḳhwáb aur us kí ta‘bír se tú pareshán na ho: Beltashazzar ne jawáb diyá, Ai mere ḳhudáwand, yih ḳhwáb tujh se kína rakkhnewáloṉ ke liye, aur us kí ta‘bír tere dushmanoṉ ke liye ho.

20Wuh daraḳht jo tú ne dekhá, ki baṛhá aur mazbút húá, jis kí choṭí ásmán tak pahuṉchí, aur zamín kí intihá tak dikháí detá thá,

21jis ke patte ḳhushnumá the, aur mewa firáwán thá, jis meṉ sab ke liye ḳhurák thí, jis ke sáye meṉ maidán ke charande, aur sháḳhoṉ par hawá ke parande baserá karte the;

22ai bádsháh, wuh tú hí hai, jo baṛhá aur mazbút húá; kyúṉki terí buzurgí baṛhí, aur ásmán tak pahuṉchí; aur terí saltanat zamín kí intihá tak.

23Aur jo bádsháh ne dekhá ki ek nigahbán, háṉ, ek qudsí ásmán se utrá, aur kahne lagá, ki Daraḳht ko káṭ ḍálo, aur use barbád karo, lekin us kí jaṛoṉ ká kunda zamín meṉ báqí rahne do, balki use lohe aur támbe ke bandhan se bandhá húá maidán kí harí ghás meṉ rahne do, ki wuh ásmán kí shabnam se tar ho, aur jab tak us par sát daur na guzar jáeṉ, us ká baḳhra zamín ke haiwánoṉ ke sáth ho;

24ai bádsháh, is kí ta‘bír aur Haqq Ta‘álá ká wuh hukm jo bádsháh mere ḳhudáwand ke haqq meṉ húá hai, yihí hai,

25ki tujhe ádmíoṉ meṉ se háṉkkar nikál deṉge, aur tú maidán ke haiwánoṉ ke sáth rahegá, aur tú bail kí tarah ghás kháegá, aur ásmán kí shabnam se tar hogá, aur tujh par sát daur guzar jáeṉge. Tab tujh ko ma‘lúm hogá ki Ḳhudá Ta‘álá insán kí mamlukat meṉ hukmrání kartá hai, aur use jis ko cháhtá hai detá hai.

26Aur yih jo unhoṉ ne hukm kiyá, ki Daraḳht kí jaṛoṉ ke kunde ko báqí rahne do, us ká matlab yih hai, ki jab tú ma‘lúm kar chukegá ki bádsháhí ká iqtidár ásmán kí taraf se hai, to tú apní saltanat par phir qáim ho jáegá.

27Is liye, ai bádsháh, tere huzúr merí saláh qubúl ho, aur tú apní ḳhatáoṉ ko sadáqat se, aur apní badkirdárí ko miskínoṉ par rahm karne se, dúr kar. Mumkin hai, ki is se terá itmínán ziyáda ho.

28Yih sab kuchh Nabúkadnazar bádsháh par guzrá.

29Ek sál ke ba‘d wuh Bábul ke sháhí mahall meṉ ṭahal rahá thá.

30Bádsháh ne farmáyá, Kyá yih Bábul i ‘azím nahíṉ, jis ko maiṉ ne apní tawánáí kí qudrat se ta‘mír kiyá hai, ki dáru’s saltanat, aur mere jáh o jalál ká namúna ho?

31Bádshah yih bát kah hí rahá thá, ki ásmán se áwáz áí, ki Ai Nabúkadnazar bádsháh, tere haqq meṉ yih fatwá hai, ki saltanat tujh se játí rahí,

32aur tujhe ádmíoṉ meṉ se háṉkkar nikál deṉge, aur tú maidán ke haiwánoṉ ke sáth rahegá, aur bail kí tarah ghás kháegá, aur sát daur tujh par guzreṉge. Tab tujh ko ma‘lúm hogá ki Ḳhudá Ta‘álá ádmíoṉ kí mamlukat meṉ hukmrání kartá hai, aur use jis ko cháhtá hai detá hai.

33Usí waqt Nabúkadnazar bádsháh par yih bát púrí húí, aur wuh ádmíoṉ meṉ se nikálá gayá, aur bailoṉ kí tarah ghás khátá rahá, aur us ká badan ásmán kí shabnam se tar húá, yaháṉ tak ki us ke bál ‘uqáb ke paroṉ kí mánind aur us ke náḳhun parandoṉ ke changul kí mánind baṛh gaye.

34Aur in aiyám ke guzarne ke ba‘d maiṉ Nabúkadnazar ne ásmán kí taraf áṉkheṉ uṭháíṉ, aur merí ‘aql mujh meṉ phir áí, aur maiṉ ne Haqq Ta‘álá ká shukr kiyá, aur us Haiyu’l qaiyúm kí hamd o saná kí, jis kí saltanat abadí, aur jis kí mamlukat pusht dar pusht hai;

35aur zamín ke tamám báshinde náchíz gine játe haiṉ, aur wuh ásmání lashkar aur ahl i zamín ke sáth jo kuchh cháhtá hai kartá hai, aur koí nahíṉ jo us ká háth rok sake, yá us se kahe, ki Tú kyá kartá hai?

36Usí waqt merí ‘aql mujh meṉ phir áí, aur merí saltanat kí shaukat ke liye merá ru‘b aur dabdaba phir mujh meṉ bahál ho gayá, aur mere mushíroṉ aur amíroṉ ne mujhe phir ḍhúṉḍhá, aur maiṉ apní mamlukat meṉ qáim húá, aur merí ‘azmat meṉ afzúní húí.

37Ab maiṉ Nabúkadnazar ásmán ke bádsháh kí sitáish aur takrím o ta‘zím kartá húṉ, kyúṉki wuh apne sab kámoṉ meṉ rást, aur apní sab ráhoṉ meṉ ‘ádil hai, aur jo mag̣rúrí meṉ chalte haiṉ, un ko zalíl kar saktá hai.

← Chapter 3 Jump to: Chapter 5 →