Nehemiah 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Nahamiyáh bin Hakaliyáh ká kalám. Bísweṉ baras Kisleu ke mahíne meṉ jab maiṉ qasr i Sosan meṉ thá to aisá húá,

2ki Hanání jo mere bháiyoṉ meṉ se ek hai aur chand ádmí Yahúdáh se áe; aur maiṉ ne un se un Yahúdíoṉ ke báre meṉ jo bach nikle the aur asíroṉ meṉ se báqí rahe the, aur Yarúshalem ke báre meṉ púchhá.

3Unhoṉ ne mujh se kahá, ki Wuh báqí log jo asírí se chhúṭkar us súbe meṉ rahte haiṉ niháyat musíbat aur zillat meṉ paṛe haiṉ; aur Yarúshalem kí fasíl ṭúṭí húí, aur us ke pháṭak ág se jale húe haiṉ.

4Jab maiṉ ne yih báteṉ suníṉ to baiṭhkar rone lagá, aur kaí dinoṉ tak mátam kartá rahá, aur roza rakkhá, aur ásmán ke Ḳhudá ke huzúr du‘á kí.

5Aur kahá, Ai Ḳhudáwand, ásmán ke Ḳhudá, Ḳhudá e ‘azím o muhíb, jo un ke sáth jo tujh se mahabbat rakhte aur tere hukmoṉ ko mánte haiṉ ‘ahd o fazl ko qáim rakhtá hai: maiṉ terí minnat kartá húṉ,

6ki tú kán lagá, aur apní áṉkheṉ khulí rakh, táki tú apne bande kí is du‘á ko sune jo maiṉ ab rát din tere huzúr tere bandoṉ baní Isráíl ke liye kartá húṉ, aur baní Isráíl kí ḳhatáoṉ ko jo ham ne tere barḳhiláf kíṉ mán letá húṉ; aur maiṉ aur mere ábáí ḳhándán donoṉ ne gunáh kiyá hai.

7Ham ne tere ḳhiláf baṛí badí kí hai, aur un hukmoṉ, aur áín, aur farmánoṉ ko jo tú ne apne bande Músá ko diye nahíṉ máná.

8Maiṉ terí minnat kartá húṉ, ki apne us qaul ko yád kar jo tú ne apne bande Músá ko farmáyá ki Agar tum náfarmání karo, to maiṉ tum ko qaumoṉ meṉ tittar bittar karúṉgá:

9par agar tum merí taraf phirkar mere hukmoṉ ko máno, aur un par ‘amal karo, to go tumháre áwáragard ásmán ke kanároṉ par bhí hoṉ, maiṉ un ko waháṉ se ikaṭṭhá karke us maqám meṉ pahuṉcháúṉgá jise maiṉ ne chun liyá hai táki apná nám waháṉ rakkhúṉ.

10Wuh to tere bande aur tere log haiṉ jin ko tú ne apní baṛí qudrat aur qawí háth se chhuṛáyá hai.

11Ai Ḳhudáwand, maiṉ terí minnat kartá húṉ, ki apne bande kí du‘á par, aur apne bandoṉ kí du‘á par jo tere nám se ḍarná pasand karte haiṉ kán lagá, aur áj maiṉ terí minnat kartá húṉ, apne bande ko kámyáb kar, aur is shaḳhs ke sámne us par fazl kar. (Maiṉ to bádsháh ká sáqí thá.)

Jump to: Chapter 2 →