Nehemiah 12

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 11 Jump to: Chapter 13 →

1Wuh káhin aur Láwí jo Zarubbábul bin Siyáltíel aur Yashú‘ ke sáth gaye, so yih haiṉ: Siráyáh, Yarmiyáh, ‘Azrá,

2Amariyáh, Mallúk, Hattúsh,

3Sikaniyáh, Rahúm, Marímot,

4‘Iddú, Jinnatú, Abiyáh,

5Miyámín, Ma‘diyáh, Biljah,

6Sama‘iyáh aur Yúyaríb, Yada‘iyáh,

7Sallú, ‘Amúq, Ḳhilqiyáh, Yada‘iyáh. Yih Yashú‘ ke dinoṉ meṉ káhinoṉ aur un ke bháiyoṉ ke sardár the.

8Aur Láwí yih the: Yashú‘, Binwí, Qadmíel, Serabiyáh, Yahúdáh, aur Mattaniyáh jo apne bháiyoṉ samet shukrguzárí par muqarrar thá;

9aur un ke bháí Baqbúqiyáh aur ‘Unno, un ke sámne apne apne pahre par muqarrar the.

10Aur Yashú‘ se Yúyaqím paidá húá, aur Yúyaqím se Ilyásib paidá húá, aur Ilyásib se Yúyada‘ paidá húá,

11aur Yúyada‘ se Yúnatan paidá húá, aur Yúnatan se Yaddú‘ paidá húá.

12Aur Yúyaqím ke dinoṉ meṉ yih káhin ábáí ḳhándánoṉ ke sardár the: Siráyáh se Miráyáh; Yarmiyáh se Hananiyáh;

13‘Azrá se Masullám; Amariyáh se Yahúhanán;

14Malikú se Yúnatan; Sabaniyáh se Yúsuf;

15Hárim se ‘Adná; Miráyot se Ḳhalqai;

16‘Iddú se Zakariyáh; Jinnatún se Masullám;

17Abiyáh se Zikrí; Minyamín se, Mau‘ídiyáh se Filtí;

18Biljah se Sammú‘; Sama‘iyáh se Yahúnatan;

19Yúyaríb se Mattanai; Yada‘iyáh se ‘Uzzí;

20Sallai se Qallai; ‘Amúq se ‘Ibr;

21Ḳhilqiyáh se Hasabiyáh; Yada‘iyáh se Nataníel.

22Ilyásib, aur Yúyada‘, aur Yúhanán, aur Yaddú‘ ke dinoṉ meṉ, Láwíoṉ ke ábáí ḳhándánoṉ ke sardár likhe játe the; aur káhinoṉ ke, Dárá Fársí kí saltanat meṉ.

23Baní Láwí ke ábáí ḳhándánoṉ ke sardár Yúhanán bin Ilyásib ke dinoṉ tak, tawáriḳh kí kitáb meṉ likhe játe the.

24Aur Láwíoṉ ke raís: Hasabiyáh, Serabiyáh, aur Yashú‘ bin Qadmíel apne bháiyoṉ samet ámne sámne bárí bárí se mard i Ḳhudá Dáúd ke hukm ke mutábiq Ḳhudá kí hamd aur shukrguzárí ke liye muqarrar the.

25Mattaniyáh, aur Baqbúqiyáh, aur ‘Abadiyáh, aur Masullám, aur Tálmún, aur ‘Aqqúb darbán the jo pháṭakoṉ ke maḳhzanoṉ ke pás pahrá dete the.

26Yih Yúyaqím bin Yashú‘ bin Yúsadaq ke dinoṉ meṉ, aur Nahamiyáh hákim aur ‘Azrá káhin aur faqíh ke dinoṉ meṉ the.

27Aur Yarúshalem kí shahrpanáh kí taqdís ke waqt unhoṉ ne Láwíoṉ ko un kí sab jagahoṉ ko ḍhúṉḍh nikálá, ki un ko Yarúshalem meṉ láeṉ, táki wuh ḳhushí ḳhushí jháṉjh, aur sitár, aur barbat ke sáth shukrguzárí karke aur gákar taqdís kareṉ.

28So gánewáloṉ kí nasl ke log Yarúshalem kí girdnawáh ke maidán se, aur Natúfátíoṉ ke díhát se,

29aur Baitu’l Jiljál se bhí, aur Jiba‘ aur ‘Azmávat ke khetoṉ se ikaṭṭhe húe; kyúṉki gánewáloṉ ne Yarúshalem ke girdágird apne liye díhát baná liye the.

30Aur káhinoṉ aur Láwíoṉ ne apne áp ko pák kiyá, aur unhoṉ ne logoṉ ko aur pháṭakoṉ ko aur shahrpanáh ko pák kiyá.

31Tab maiṉ Yahúdáh ke amíroṉ ko díwár par láyá; aur maiṉ ne do baṛe gol muqarrar kiye jo hamd karte húe julús meṉ nikle, ek un meṉ se dahine háth kí taraf díwár ke úpar úpar se kúṛe ke pháṭak kí taraf gayá.

32Aur yih un ke píchhe píchhe gaye, ya‘ní Húsa‘iyáh aur Yahúdáh ke ádhe sardár,

33‘Azariyáh, ‘Azrá, aur Masullám,

34Yahúdáh, aur Binyamín, aur Sama‘iyáh, aur Yarmiyáh,

35aur kuchh káhinzáde narsinge liye húe, ya‘ní Zakariyáh bin Yúnatan, bin Sama‘iyáh, bin Mattaniyáh, bin Míkáyáh, bin Zakkúr, bin Ásaf;

36aur us ke bháí Sama‘iyáh, aur ‘Azárel, Milalai, Jilalai, Ma‘í, Nataníel, aur Yahúdáh, aur Hanání, mard i Ḳhudá Dáúd ke bájoṉ ko liye húe játe the, aur ‘Azrá faqíh un ke áge áge thá.

37Aur wuh chashma pháṭak se hokar sídhe áge gaye, aur Dáúd ke shahr kí síṛhiyoṉ par chaṛhkar shahrpanáh kí úṉcháí par pahuṉche, aur Dáúd ke mahall ke úpar hokar pání pháṭak tak mashriq kí taraf gaye.

38Aur shukrguzárí karnewáloṉ ká dúsrá g̣ol, aur un ke píchhe píchhe maiṉ aur ádhe log un se milne ko díwár par tanúroṉ ke burj ke úpar chauṛí díwár tak,

39aur Ifráímí pháṭak ke úpar puráne pháṭak, aur machhlí pháṭak, aur Hananel ke burj, aur Hammiyáh ke burj par se hote húe bheṛ pháṭak tak gaye; aur pahrewáloṉ ke pháṭak par khaṛe ho gaye.

40So shukrguzárí karnewáloṉ ke donoṉ g̣ol aur maiṉ aur mere sáth ádhe hákim Ḳhudá ke ghar meṉ khaṛe ho gaye:

41aur káhin; Ilyáqím, Ma‘siyáh, Minyamín, Míkáyáh, Ilayú‘ainí, Zakariyáh, Hananiyáh, narsinge liye húe the;

42aur Ma‘siyáh, aur Sama‘iyáh, aur Ilí‘azar, aur ‘Uzzí, aur Yahúhanán, au Malkiyáh, aur ‘Ailám, aur ‘Azar apne sardár gánewále, Izraḳhiyáh ke sáth baland áwáz se gáte the.

43Aur us din unhoṉ ne bahut sí qurbáníáṉ chaṛháíṉ, aur ḳhushí kí; kyúṉki Ḳhudá ne aisí ḳhushí un ko baḳhshí ki wuh niháyat shádmán húe; aur ‘auratoṉ aur bachchoṉ ne bhí ḳhushí manáí; so Yarúshalem kí ḳhushí kí áwáz dúr tak sunáí detí thí.

44Usí din log ḳhazáne kí, aur uṭháí húí qurbáníoṉ aur pahle phaloṉ aur dahyakíoṉ kí koṭhriyoṉ par muqarrar húe, táki un meṉ shahr shahr ke khetoṉ ke mutábiq jo hisse káhinoṉ aur Láwíoṉ ke liye shara‘ ke mutábiq muqarrar húe, un ko jama‘ kareṉ: kyúṉki baní Yahúdáh káhinoṉ aur Láwíoṉ ke sabab se jo házir rahte the ḳhush the.

45So wuh Ḳhudá ke intizám, aur tahárat ke intizám kí nigrání karte rahe, aur gánewáloṉ aur darbánoṉ ne bhí Dáúd aur us ke beṭe Sulaimán ke hukm ke mutábiq aisá hí kiyá.

46Kyúṉki qadím zamáne se Dáúd aur Ásaf ke dinoṉ meṉ ek sardár mug̣anní hotá thá, aur Ḳhudá kí hamd aur shukr ke gít gáe játe the.

47Aur tamám Isráíl Zarubbábul ke aur Nahamiyáh ke dinoṉ meṉ har roz kí zarúrat ke mutábiq gánewáloṉ aur darbánoṉ ke hisse dete the; yúṉ wuh Láwíoṉ ke liye chízeṉ maḳhsús karte, aur Láwí baní Hárún ke liye maḳhsús karte the.

← Chapter 11 Jump to: Chapter 13 →