Nehemiah 9

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 8 Jump to: Chapter 10 →

1Phir isí mahíne kí chaubíswíṉ táríḳh ko baní Isráíl roza rakhkar aur ṭáṭ oṛhkar aur miṭṭí apne sir par ḍálkar ikaṭṭhe húe.

2Aur Isráíl kí nasl ke log sab pardesiyoṉ se alag ho gaye, aur khaṛe hokar apne gunáhoṉ aur apne bápdádá kí ḳhatáoṉ ká iqrár kiyá.

3Aur unhoṉ ne apní apní jagah par khaṛe hokar ek pahar tak Ḳhudáwand apne Ḳhudá kí sharí‘at kí kitáb paṛhí; aur dúsre pahar meṉ iqrár karke Ḳhudáwand apne Ḳhudá ko sijda karte rahe.

4Tab Qadmíel, Yashú‘, aur Bání, aur Sabaniyáh, aur Búnní, aur Saribiyáh, aur Bání, aur Kan‘ání ne Láwíoṉ kí síṛhiyoṉ par khaṛe hokar baland áwáz se Ḳhudáwand apne Ḳhudá se faryád kí.

5Phir Yashú‘, aur Qadmíel, aur Bání, aur Hasabniyáh, aur Saribiyáh, aur Húdiyáh, aur Sabaniyáh, aur Fatahiyáh, Láwíoṉ ne kahá, Khaṛe ho jáo, aur kaho, Ḳhudáwand hamárá Ḳhudá azal se abad tak mubárak hai; terá jalálí nám mubárak ho, jo sab hamd o ta‘ríf se bálá hai.

6Tú hí akelá Ḳhudáwand hai; tú ne ásmán, aur ásmánoṉ ke ásmán ko, aur un ke sáre lashkar ko, aur zamín ko, aur jo kuchh us par hai, aur samundaroṉ ko, aur jo kuchh un meṉ hai, banáyá; aur tú un sabhoṉ ká parwardigár hai; aur ásmán ká lashkar tujhe sijda kartá hai.

7Tú wuh Ḳhudáwand Ḳhudá hai jis ne Abrám ko chun liyá aur use Kasdíoṉ ke Úr se nikál láyá, aur us ká nám Abrahám rakkhá;

8tú ne us ká dil apne huzúr wafádár páyá, aur Kan‘áníoṉ, aur Hittíoṉ, aur Amoríoṉ, aur Farizzíoṉ, aur Yabúsíoṉ, aur Jirjásíoṉ ká mulk dene ká ‘ahd us se báṉdhá, táki use us kí nasl ko de; aur tú ne apne suḳhan púre kiye, kyúṉki tú sádiq hai;

9aur tú ne Misr meṉ hamáre bápdádá kí musíbat par nazar kí, aur daryá e Qulzum ke kanáre un kí faryád suní,

10aur Fir‘aun, aur us ke sab naukaroṉ, aur us ke mulk kí sab ra‘íyat par nishán aur ‘ajáib kar dikháe; kyúṉki tú jántá thá ki wuh g̣urúr ke sáth un se pesh áe. So terá baṛá nám húá jaisá áj hai.

11Aur tú ne un ke áge samundar ko do hisse kiyá, aisá ki wuh samundar ke bích súkhí zamín par hokar chale; aur tú ne un ká píchhá karnewáloṉ ko gahráo meṉ ḍálá, jaisá patthar samundar meṉ pheṉká játá hai.

12Aur tú ne din ko bádal ke sutún meṉ hokar un kí rahnumáí kí, aur rát ko ág ke sutún meṉ, táki, jis ráste un ko chalná thá, us meṉ un ko raushní mile.

13Aur tú koh i Síná par utar áyá, aur ásmán par se un ke sáth báteṉ kíṉ, aur rást ahkám aur sachche qánún aur achchhe áín o farmán un ko diye:

14aur un ko apne muqaddas sabt se wáqif kiyá, aur apne bande Músá kí ma‘rifat un ko ahkám aur áín aur sharí‘at dí;

15aur tú ne un kí bhúkh miṭáne ko ásmán par se roṭí dí, aur un kí piyás bujháne ko chaṭán meṉ se un ke liye pání nikálá, aur un ko farmáyá, ki wuh jákar us mulk par qabza kareṉ jis ko un ko dene kí tú ne qasam kháí thí.

16Lekin unhoṉ ne aur hamáre bápdádá ne ghamanḍ kiyá, aur gardankash bane, aur tere hukmoṉ ko na máná;

17aur farmánbardárí se inkár kiyá, aur tere ‘ajáib ko jo tú ne un ke darmiyán kiye yád na rakkhá; balki gardankash bane, aur apní bag̣áwat meṉ apne liye ek sardár muqarrar kiyá, táki apní g̣ulámí kí taraf lauṭ jáeṉ: par tú wuh Ḳhudá hai jo mu‘áf karne ko taiyár, aur qahr karne meṉ dhímá, aur shafaqat meṉ g̣aní hai; so tú ne un ko tark na kiyá.

18Par jab unhoṉ ne apne liye ḍhálá húá bachhṛá banákar kahá, Yih terá ḳhudá hai jo tujhe mulk i Misr se nikál láyá, aur yúṉ g̣ussa diláne ke baṛe baṛe kám kiye;

19taubhí tú ne apní gúnágún rahmat se un ko biyábán meṉ chhoṛ na diyá: din ko bádal ká sutún un ke úpar se dúr na húá, táki ráste meṉ un kí rahnumáí kare, aur na rát ko ág ká sutún dúr húá, táki wuh un ko raushní aur wuh rásta dikháe jis se un ko chalná thá.

20Aur tú ne apní nek rúh bhí un kí tarbíyat ke liye baḳhshí, aur mann ko un ke muṉh se na roká, aur un ko piyás bujháne ko pání diyá.

21Chálís baras tak tú biyábán meṉ un kí parwarish kartá rahá; wuh kisí chíz ke muhtáj na húe; na to un ke kapṛe puráne húe, aur na un ke páṉw súje.

22Is ke siwá tú ne un ko mamlukateṉ aur ummateṉ baḳhshíṉ, jin ko tú ne un ke hissoṉ ke mutábiq un ko báṉṭ diyá: chunáṉchi wuh Saihún ke mulk, aur sháh i Hasbon ke mulk, aur Basan ke bádsháh ‘Oj ke mulk par qábiz húe.

23Aur tú ne un kí aulád ko baṛhákar ásmán ke sitároṉ kí mánind kar diyá, aur un ko us mulk meṉ láyá, jis kí bábat tú ne un ke bápdádá se kahá thá, ki wuh jákar us par qabza kareṉ.

24So un kí aulád ne ákar is mulk par qabza kiyá, aur tú ne un ke áge is mulk ke báshindoṉ ya‘ní Kan‘áníoṉ ko mag̣lúb kiyá, aur un ko un ke bádsháhoṉ aur is mulk ke logoṉ samet, un ke háth meṉ kar diyá ki jaisá cháheṉ waisá un se kareṉ.

25So unhoṉ ne fasíldár shahroṉ aur zarḳhez mulk ko le liyá, aur wuh sab tarah ke achchhe mál se bhare húe gharoṉ, aur khode húe kúoṉ, aur bahut se angúristánoṉ, aur zaitún ke bág̣oṉ, aur phaldár daraḳhtoṉ ke málik húe: phir wuh khákar ser húe, aur moṭe táze ho gaye, aur tere baṛe ihsán se niháyat hazz uṭháyá.

26Taubhí wuh náfarmán hokar tujh se bág̣í húe, aur unhoṉ ne terí sharí‘at ko píṭh píchhe pheṉká, aur tere nabíoṉ ko, jo un ke ḳhiláf gawáhí dete the táki un ko terí taraf phirá láeṉ, qatl kiyá, aur unhoṉ ne g̣ussa diláne ke baṛe baṛe kám kiye.

27Is liye tú ne un ko un ke dushmanoṉ ke háth meṉ kar diyá jinhoṉ ne un ko satáyá; aur apne dukh ke waqt meṉ jab unhoṉ ne tujh se faryád kí, to tú ne ásmán par se sun liyá, aur apní gúnágún rahmatoṉ ke mutábiq un ko chhuṛánewále diye jinhoṉ ne un ko un ke dushmanoṉ ke háth se chhuṛáyá.

28Lekin jab un ko árám milá, to unhoṉ ne phir tere áge badkárí kí; is liye tú ne un ko un ke dushmanoṉ ke qabze meṉ chhoṛ diyá, so wuh un par musallat rahe; taubhí jab wuh rujú‘ láe, aur tujh se faryád kí, to tú ne ásmán par se sun liyá, aur apní rahmatoṉ ke mutábiq un ko bár bár chhuṛáyá;

29aur tú ne un ke ḳhiláf gawáhí dí, táki apní sharí‘at kí taraf un ko pher láe; par unhoṉ ne ghamanḍ kiyá, aur tere farmán na máne, balki tere ahkám ke barḳhiláf gunáh kiyá (jin ko agar koí máne, to un ke sabab se jítá rahegá;) aur apne kandhe ko haṭákar gardankash ban gaye, aur na suná.

30Taubhí tú bahut barasoṉ tak un kí bardásht kartá rahá, aur apní rúh se apne nabíoṉ kí ma‘rifat un ke ḳhiláf gawáhí detá rahá: taubhí unhoṉ ne kán na lagáyá, is liye tú ne un ko âur mulkoṉ ke logoṉ ke háth meṉ kar diyá.

31Báwujúd is ke tú ne apní gúnágún rahmatoṉ ke bá‘is un ko nábúd na kar diyá, aur na un ko tark kiyá, kyúṉki tú rahím o karím Ḳhudá hai.

32So ab, ai hamáre Ḳhudá, buzurg, aur qádir o muhíb Ḳhudá, jo ‘ahd o rahmat ko qáim rakhtá hai, wuh dukh jo ham par aur hamáre bádsháhoṉ par, aur hamáre sardároṉ aur hamáre káhinoṉ par, aur hamáre nabíoṉ aur hamáre bápdádá par, aur tere sab logoṉ par, Asúr ke bádsháhoṉ ke zamáne se áj tak paṛá hai, so tere huzúr halká na ma‘lúm ho.

33Taubhí jo kuchh ham par áyá hai, us sab meṉ tú ‘ádil hai, kyúṉki tú sachcháí se pesh áyá, par ham ne sharárat kí.

34Aur hamáre bádsháhoṉ aur sardároṉ, aur hamáre káhinoṉ aur bápdádá ne na to terí sharí‘at par ‘amal kiyá, aur na tere ahkám aur shahádatoṉ ko máná, jin se tú un ke ḳhiláf gawáhí detá rahá.

35Kyúṉki unhoṉ ne apní mamlukat meṉ, aur tere baṛe ihsán ke waqt jo tú ne un par kiyá, aur is wasí‘ aur zarḳhez mulk meṉ jo tú ne un ke hawále kar diyá, terí ‘ibádat na kí, aur na wuh apní badkáríoṉ se báz áe.

36Dekh, áj ham g̣ulám haiṉ; balki usí mulk meṉ jo tú ne hamáre bápdádá ko diyá, ki us ká phal aur paidáwár kháeṉ; so dekh, ham usí meṉ g̣ulám haiṉ.

37Wuh apní kasír paidáwár un bádsháhoṉ ko detá hai jin ko tú ne hamáre gunáhoṉ ke sabab se ham par musallat kiyá hai; wuh hamáre jismoṉ aur hamárí mawáshí par bhí, jaisá cháhte haiṉ iḳhtiyár rakhte haiṉ, aur ham saḳht musíbat meṉ haiṉ.

38In sab bátoṉ ke sabab se ham sachchá ‘ahd karte aur likh bhí dete haiṉ, aur hamáre umará, aur hamáre Láwí, aur hamáre káhin us par muhr karte haiṉ.

← Chapter 8 Jump to: Chapter 10 →