Nehemiah 8

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 7 Jump to: Chapter 9 →

1Aur sab log yaktan hokar pání pháṭak ke sámne ke maidán meṉ ikaṭṭhe húe. Aur unhoṉ ne ‘Azrá faqíh se ‘arz kí, ki Músá kí sharí‘at kí kitáb ko, jis ká Ḳhudáwand ne Isráíl ko hukm diyá thá, láe.

2Aur sátweṉ mahíne kí pahlí táríḳh ko ‘Azrá káhin Tauret ko jamá‘at ke, ya‘ní mardoṉ aur ‘auratoṉ aur un sab ke sámne le áyá jo sunkar samajh sakte the.

3Aur wuh us meṉ se pání pháṭak ke sámne ke maidán meṉ subh se do pahar tak, mardoṉ aur ‘auratoṉ aur sabhoṉ ke áge, jo samajh sakte the, paṛhtá rahá; aur sab log sharí‘at kí kitáb par kán lagáe rahe.

4Aur ‘Azrá faqíh ek chobí mimbar par jo unhoṉ ne isí kám ke liye banáyá thá khaṛá húá: aur us ke pás Mattitiyáh aur Sama‘, aur ‘Anáyáh, aur Úriyáh, aur Ḳhilqiyáh, aur Ma‘siyáh us ke dahine khaṛe the; aur us ke báeṉ Fidáyáh, aur Mísáel, aur Malkiyáh, aur Háshúm, aur Hasbadánah, aur Zakariyáh, aur Masullám the.

5Aur ‘Azrá ne sab logoṉ ke sámne kitáb kholí; (kyúṉki wuh sab logoṉ se úpar thá;) aur jab us ne use kholá to sáre log uṭh khaṛe húe:

6aur ‘Azrá ne Ḳhudáwand Ḳhudá e ‘Azím ko mubárak kahá: aur sab logoṉ ne apne háth uṭhákar jawáb diyá, Ámín, Ámín; aur unhoṉ ne auṉdhe muṉh zamín tak jhukkar Ḳhudáwand ko sijda kiyá.

7Aur Yashú‘, aur Bání, aur Saribiyáh, aur Yámin, aur ‘Aqqúb, aur Sabbatai, aur Húdiyáh, aur Ma‘siyáh, aur Qalítá, aur ‘Azariyáh, aur Yúzabad, aur Hanán, aur Filáyáh, aur Láwí logoṉ ko sharí‘at samjháte gaye; aur log apní apní jagah par khaṛe rahe.

8Aur unhoṉ ne us kitáb ya‘ní Ḳhudá kí sharí‘at meṉ se sáf áwáz se paṛhá, phir us ke ma‘ní batáe, aur un ko ‘ibárat samjhá dí.

9Aur Nahamiyáh ne, jo hákim thá, aur ‘Azrá káhin aur faqíh ne, aur un Láwíoṉ ne jo logoṉ ko sikhá rahe the sab logoṉ se kahá, Áj ká din Ḳhudáwand tumháre Ḳhudá ke liye muqaddas hai; na gam karo, na ro. Kyúṉki sab log sharí‘at kí báteṉ sunkar rone lage the.

10Phir us ne un se kahá, ki Ab jáo, aur jo moṭá hai kháo, aur jo míṭhá hai piyo, aur jin ke liye kuchh taiyár nahíṉ húá, un ke pás bhí bhejo; kyúṉki áj ká din hamáre Ḳhudáwand ke liye muqaddas hai, aur tum udás mat ho; kyúṉki Ḳhudáwand kí shádmání tumhárí panáhgáh hai.

11Aur Láwíoṉ ne sab logoṉ ko chup karáyá, aur kahá, Ḳhámosh ho jáo, kyúṉki áj ká din muqaddas hai; aur g̣am na karo.

12So sab log kháne píne aur hissa bhejne, aur baṛí ḳhushí karne ko chale gaye, kyúṉki wuh un bátoṉ ko, jo un ke áge paṛhí gayíṉ, samjhe the.

13Aur dúsre din sab logoṉ ke ábáí ḳhándánoṉ ke sardár, aur káhin, aur Láwí, ‘Azrá faqíh ke pás ikaṭṭhe húe, ki Tauret kí bátoṉ par dhiyán lagáeṉ.

14Aur un ko sharí‘at meṉ yih likhá milá, ki Ḳhudáwand ne Músá kí ma‘rifat farmáyá hai, ki baní Isráíl sátweṉ mahíne kí ‘íd meṉ jhoṉpṛiyoṉ meṉ rahá kareṉ,

15aur apne sab shahroṉ meṉ, aur Yarúshalem meṉ yih i‘lán aur manádí karáeṉ, ki Paháṛ par jákar zaitún kí ḍáliyáṉ, aur janglí zaitún kí ḍáliyáṉ, aur mahndí kí ḍáliyáṉ, aur khajúr kí sháḳheṉ, aur ghane daraḳhtoṉ kí ḍáliyáṉ jhoṉpriyoṉ ke banáne ko láo, jaisá likhá hai.

16So log já jákar un ko láe, aur har ek ne apne ghar kí chhat par, aur apne iháte meṉ, aur Ḳhudá ke ghar ke sahnoṉ meṉ, aur pání pháṭak ke maidán meṉ, aur Ifráímí pháṭak ke maidán meṉ apne liye jhoṉpṛiyáṉ banáíṉ.

17Aur un logoṉ kí sárí jamá‘at ne, jo asírí se phir áe the, jhoṉpriyáṉ banáíṉ, aur un hí jhoṉpṛiyoṉ meṉ rahe; kyúṉki Yashú‘ bin Nún ke dinoṉ se us din tak baní Isráíl ne aisá nahíṉ kiyá thá. Chunáṉchi bahut baṛí ḳhushí húí.

18Aur pahle din se áḳhirí din tak roz ba roz us ne Ḳhudá kí sharí‘at kí kitáb paṛhí. Aur unhoṉ ne sát din ‘íd manáí; aur áṭhweṉ din, dastúr ke muwáfiq, muqaddas majma‘ faráham húá.

← Chapter 7 Jump to: Chapter 9 →