Nehemiah 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Jab Sanballat, aur Túbiyáh, aur Jasham ‘Arabí, aur hamáre báqí dushmanoṉ ne suná, ki maiṉ shahrpanáh ko baná chuká, aur us meṉ koí raḳhna báqí nahíṉ rahá, agarchi us waqt tak maiṉ ne pháṭakoṉ meṉ kiwáṛe nahíṉ lagáe the:

2to Sanballat aur Jasham ne mujhe yih kahlá bhejá, ki Á, ham Onú ke maidán ke kisí gáṉw meṉ báham muláqát kareṉ; par wuh mujh se badí karne kí fikr meṉ the.

3So maiṉ ne un ke pás qásidoṉ se kahlá bhejá, ki Maiṉ baṛe kám meṉ lagá húṉ, aur á nahíṉ saktá: mere ise chhoṛkar tumháre pás áne se yih kám kyúṉ mauqúf rahe?

4Unhoṉ ne chár bár mere pás aisá hí paig̣ám bhejá, aur maiṉ ne un ko isí tarah ká jawáb diyá.

5Phir Sanballat ne páṉchwíṉ bár usí tarah se apne naukar ko mere pás háth meṉ khulí chiṭṭhí liye húe bhejá:

6jis meṉ likhá thá, ki Âur qaumoṉ meṉ yih afwáh hai, aur Jashmú yihí kahtá hai, ki terá aur Yahúdíoṉ ká iráda bag̣áwat karne ká hai: isí sabab se tú shahrpanáh banátá hai, aur tú in bátoṉ ke mutábiq un ká bádsháh banná cháhtá hai.

7Aur tú ne nabíoṉ ko bhí muqarrar kiyá, ki Yarúshalem meṉ tere haqq meṉ manádí kareṉ, aur kaheṉ, ki Yahúdáh meṉ ek bádsháh hai: pas in bátoṉ ke mutábiq bádsháh ko ittilá‘ kí jáegí: so ab á, ham báham mashwara kareṉ.

8Tab maiṉ ne us ke pás kahlá bhejá, Jo tú kahtá hai, is tarah kí koí bát nahíṉ húí, balki tú yih báteṉ apne hí dil se banátá hai.

9Wuh to ham ko ḍaráná cháhte the, aur kahte the, ki Is kám meṉ un ke háth aise ḍhíle paṛ jáeṉge, ki wuh hone hí ká nahíṉ. Par ab, ai Ḳhudá, tú mere háthoṉ ko zor baḳhsh.

10Phir maiṉ Sama‘iyáh bin Diláyáh bin Muhaitabel ke ghar gayá; wuh ghar meṉ band thá; us ne kahá, Ham Ḳhudá ke ghar meṉ haikal ke andar mileṉ, aur haikal ke darwázoṉ ko band kar leṉ; kyúṉki wuh tujhe qatl karne ko áeṉge; wuh zarúr rát ko tujhe qatl karne ko áeṉge.

11Maiṉ ne kahá, Kyá mujh sá ádmí bháge? aur kaun hai jo mujh sá ho aur apní ján bacháne ko haikal meṉ ghuse? maiṉ andar nahíṉ jáne ká.

12Aur maiṉ ne ma‘lúm kar liyá, ki Ḳhudá ne use nahíṉ bhejá thá, lekin us ne mere ḳhiláf peshíngoí kí; balki Sanballat aur Túbiyáh ne use ujrat par rakkhá thá.

13Aur us ko is liye ujrat dí gayí, táki maiṉ ḍar jáúṉ, aur aisá kám karke ḳhatákár ṭhahrúṉ, aur un ko burí ḳhabar phailáne ká mazmún mil jáe, táki mujhe malámat kareṉ.

14Ai mere Ḳhudá, Túbiyáh aur Sanballat ko, un ke in kámoṉ ke liház se, aur Nau‘ídiyáh nabiya ko bhí, aur báqí nabíoṉ ko jo mujhe ḍaráná cháhte the yád rakh.

15G̣araz báwan din meṉ, Alúl mahíne kí pachchíswíṉ táríḳh ko, shahrpanáh ban chukí.

16Jab hamáre sab dushmanoṉ ne yih suná, to hamáre áspás kí sab qaumeṉ ḍarne lagíṉ, aur apní hí nazar meṉ ḳhud zalíl ho gayíṉ; kyúṉki unhoṉ ne ján liyá ki yih kám hamáre Ḳhudá kí taraf se húá.

17Is ke siwá un dinoṉ meṉ Yahúdáh ke amír bahut se ḳhatt Túbiyáh ko bhejte the, aur Túbiyáh ke ḳhatt un ke pás áte the.

18Kyúṉki Yahúdáh meṉ bahut logoṉ ne us se qaul o qarár kiyá thá, is liye ki wuh Sikaniyáh bin Araḳh ká dámád thá; aur us ke beṭe Yahúhanán ne Masullám bin Barakiyáh kí beṭí ko biyáh liyá thá.

19Aur wuh mere áge us kí nekíoṉ ká bayán bhí karte the, aur merí báteṉ use sunáte the. Aur Túbiyáh mujhe ḍaráne ko chiṭṭhiyáṉ bhejá kartá thá.

← Chapter 5 Jump to: Chapter 7 →