Luke 4

Adilabad Gondi (ఆదిలాబాద్ గోండి పూన నియమ్)

1యేసు పవిత్ర ఆత్మతె నించి యోర్దన్ లవిడ యేరియతల్ మల్సి వాతొర్. అస్కె అద్ పవిత్ర ఆత్మ వోన్ బోడి గుటనగ వోత.

2అగ చాలిస్ (40) దివొస్క్ వేరి యేసున్ తన్వంగ్ ఆసనగ కోండి కియ్లె సయ్తన్ సూడ్తొర్. అవ్ దివొస్క్‌నగ వోర్ ఉపస్ మత్త కాడ్కి, వోన్ బెయ్ కర్వస్‌త.

3అస్కె సయ్తన్ వోన్గ వాసి, “నిమె బగవంతనొర్ మరిని మంద్కితె, ఇద్ బండతున్, ‘సారిత్ దాత్ మారియ’ ఇంజి ఆగె సీమ్!” ఇంజెర్ ఇత్తొర్.

4బతి యేసు, “‘నరిమన్కల్ సిరిప్ గాటొ-సారితెన్ పిసొర్’ ఇంజి దర్మ-గ్రంత్‌నగ లిహి కీసి మంత” ఇంజెర్ జవబ్ సీతొర్.

5అస్కె సయ్తన్, యేసున్ బెయ్ డంగల్ గుటత్ పొరొ వోసి, బెయ్ సప్నె దునియతంగ్ సమ్దొ రాజ్కున్ తొహ్తొర్.

6అహన్ తొహ్చి, “ఇవ్ సమ్దొ రాజ్కున్ పొరొ అదికార్ అని అవెన్ హిందల్, పుట్వల్ సోబ అని డగుర్-పాన్ నీకున్ సీంతొన్. అహన్ సియ్వల్ అదికార్ నావ కెయ్దె మంత. నాకున్ పసంద్ వాతొన్ అద్ సమ్దొత్ సియ పరంతొన్.

7అదెన్ సాటి, నిమె నా మునె ముర్-టొంగ్రంగ్ కొట్సి, నావయ్ పూజ కీకితె, అద్ సమ్దొతున్ నీకునె సీంతొన్” ఇంజెర్ సయ్తన్ యేసున్ సంగ వెహ్తొర్.

8తె యేసు, “‘నీ పర్బు ఆయ్వల్ బగవంతనె కాల్క్ కరన అని సిరిప్ వోనయ్ సేవ తుంగన’ ఇంజి దర్మ-గ్రంత్‌నగ లిహి కీసి మంత” ఇంజెర్ సయ్తన్‌తున్ జవబ్ సీతొర్.

9అస్కె, సయ్తన్ యెరుసలెమ్న మందిర్త టిక్రితగ వోసి, యేసున్ నిపుస్తొర్. అని, “నిమె బగవంతనొర్ మరిని మంద్కితె ఇగెటల్ బూడ్ డెహ్క.

10బారితెకె, ‘నీకున్ కాబాడన్ సాటి బగవంతల్ నీ బారెతె తన్వుర్ దూతలిర్కున్ ఆగె సీంతొర్.’

11అని, ‘వూర్ దూతలిర్ నీవ కాల్దున్ బండ లాగ్వక్‌నె నీకున్ ఆంజంతెర్’ ఇంజి దర్మ-గ్రంత్‌నగ లిహి కీసి మంత కి?” ఇంజెర్ సయ్తన్ పూసి కీతొర్.

12తె యేసు, “‘నీ పర్బు ఆయ్వల్ బగవంతన్ పరిక్స కియ్వ’ ఇంజి దర్మ-గ్రంత్‌నగ లిహి కీసి మంత” ఇంజెర్ వెహ్తొర్.

13అద్ తరికతె సయ్తన్, ఈతంగ్ ఆసనగ కోండి కియ్లె సూడ్త పెజె, మర్ల మోక పుట్నల్ వేరి యేసున్ సుటి కీసి సొడితొర్.

14అస్కె యేసు పవిత్ర ఆత్మత సక్తితె నించి గలిలయ యేరియతె మల్సి సొత్తొర్. వోన్ బారెత కబుర్ అద్ యేరియ పూరొ కప్త.

15యూదుల్క్ మీరె మాయ్వల్ సునగోక్నగ వోర్ సొంజి, బోద వెహ్చెర్ మందుర్. అద్ కేంచి, హర్ వొరొర్ వోన్ మాని కీందిర్.

16ఉంది దియ తన బెర్స్‌త నజరేతు చహర్తె సొత్తొర్. ఉంది ఆరమ్న దివొసున్ నేటి తనకున్ ఆదత్ మత్త తీర్ సునగోగ్నగ సొంజి, బగవంతన వచన్ వాచి కియ్లె యేసు నిల్తొర్.

17అస్కె వోన్గ యెసయ పర్‌వక్తన గ్రంత్ వొరొర్ అందుసీతొర్. తె యేసు అద్ గ్రంతున్ యేచ్చి, తన వాచి కియ్వల్ బాగమున్ తెరితొర్.

18అని, “బగవంతన ఆత్మ నా పొరొ మంత. బారితెకె గరిబ్కున్ చొకొట్న కబుర్ వెహ్లె నాకున్ నేమి కీతొర్. కోండె మాసి మన్వలిర్‌కున్ సుటి కియ్లె, గుడ్డిర్‌కున్ నదుర్ సియ్లె, నాకున్ సారి కీతొర్. ఆడి కియ్వలిర్‌గటల్ మోక్డొ సుటి కియ్లె, తన్వుర్‌కున్ బగవంతల్ బచి కియ్వల్ గట్క వాత ఇంజెర్ వెహ్లెన్ నాకున్ రొహ్తొర్” ఇంజెర్ వాచి కీతొర్.

20అద్ ఆత పెజె యేసు గ్రంతున్ తన్గ సీతొనగ అందుసి ఉద్‌తొర్. సునగోగ్నగ మన్వలిర్ సమ్దిర్ వోనె తిర్నె సూడ్సెర్ మత్తెర్.

21అస్కె యేసు, “ దర్మ-గ్రంత్‌నల్ వాచి కీతంగ్ గొస్టింగ్ నేండ్ మిరట్ కేంజ్నెకెనె బర్పుర్ ఆతంగ్” ఇంజెర్ వెహ్తొర్.

22తె వూర్ సమ్దిర్ వోర్ వెహ్తంగ్ దయతంగ్ గొస్టిన్ వని కీసెర్ గుల్ ఆతెర్. బతి వూర్గటల్ కహితుర్, “ఎహె! వేర్తె యోసెప్నొర్ మరి ఆందుర్ కి రా?” ఇంజెర్ ఇత్తెర్.

23అస్కె యేసు, “మిరట్ ‘వయ్దు నీవ నిమె చొకొట్ కీమ్!’ ఇన్వల్ సాస్తుర్ నాకున్ వెహంతిట్. అని, ‘కపెర్నహోమ్‌నగ నిమె కీతంగ్ కామ్క్ ఇద్ నీవ సొంత చహర్తె గిర్ కీమ్!’ ఇంజి, తప్వక్ కోరంతిట్ ఇన్వల్ గొస్టి నాకున్ టావయ్” ఇంజెర్ వూర్కున్ వెహ్తొర్.

24అని యేసు ఉండె గిర్, “బోరె పర్‌వక్తన్ తన్వ సొంత యేరియతుర్ వొపుర్. ఇద్ సతెమ్ ఆంద్.

25అద్ బహన్ ఇత్తెకె తొలె, యేలియ పర్‌వక్తన కాలమ్నె, ఇజ్రయేల్ దేస్నగ సడె మూంద్ సాల్క్ పిర్ అర్వ సొంజి కరు అర్త. అద్ గట్కతె, అగ వెలెనె రాండె వెయ్లొక్ మత్తంగ్.

26బతి అవ్ సమ్దొ రాండె వెయ్లొక్‌నగ యేలియన్ బగవంతల్ రొహ్మకి. సిరిప్ సీదొన్ యేరియత సారెపతు నాటె మన్వల్ దుస్రొ జాతిత ఉంది రాండె వెయ్లొనగనె రొహ్తొర్.

27అహ్నె ఎలిస పర్‌వక్తన కాలమ్నె, ఇజ్రయేల్ దేస్నగ వెలెన్ పెర్స నొపి వాలిర్ మత్తెర్. బతి వూర్ సమ్దిర్ చొకొట్ ఆయ్మకి. సిరిప్ సిరియ దేస్నొర్ దుస్రొ జాతితొర్ నయమన్ ఇన్వలె చొకొట్ ఆతొర్” ఇంజెర్ యేసు వెహ్తొర్.

28ఇవ్ గొస్టింగ్ కేంచి, సునగోగ్నగ మన్వలిర్ సమ్దిర్ వోన్ పొరొ బెయ్ సోంగున్ వాతెర్.

29అని తేచ్‌చి యేసున్ చహర్తున్ బహ్రి డగ్లి కీసెర్ వోతెర్. అద్ చహర్ డంగల్ గుటత్ పొరొ దొహ్చి మత్త. తె తాన్ పొరొడల్ వోన్ డగ్లి కియ్లె సూడ్తెర్.

30బతి వోర్ యేసు వూర్ మాందిత్ నడ్డుమ్‌నల్ పెసిసి, తన్వ సరియ్ తన సొత్తొర్.

31అహన్ చలె మాసి, యేసు గలిలయ యేరియత కపెర్నహోమ్ ఇన్వల్ చహర్దె యెవ్తొర్. అని ఆరమ్న దివొసున్ నేటి బోద వెహ్వల్ సురు కీతొర్.

32వోర్ వెహ్వల్ బోద అదికార్దె మత్త కాడ్కి, కేంజ్తుర్ వూర్ గుల్ ఆతెర్.

33అస్కె అద్ సునగోగ్నగ బూత్ సోప్రె మాతొర్ మాయ్నల్ మత్తొర్. తె వోన్గ మన్వల్ బూత్ బెయ్ జోర్తె, “యే! నజరేత్నొర్ యేసు! మా జోలిత్ బారి వాసెర్ మంతి? మాకున్ నాసెడమ్ కియ్లె వాతి కి? నిమె బోని ఆందియొ నాకున్ టావయ్. నిమె బగవంతనొర్ పవిత్రవంతని ఆంది” ఇంజెర్ కిల్యుసీత.

35బతి యేసు, “నిమె కిలిమ! వోన్గటల్ బహ్రి వర” ఇంజెర్ దమ్కి సీతొర్. అస్కె అద్ బూత్ వోర్ మాయ్నన్ బూడ్ అరుసి, బతయ్ నుక్సన్ కియ్వక్‌నె వోన్గటల్ బహ్రి వాత.

36అద్ సూడ్సి, అగ మన్వలిర్ సమ్దిర్ బెయ్ గుల్ ఆతెర్. అని, “ఇహిన్-బహన్ జర్గ్‌సెర్ మంత? బూత్కున్ గిర్ తన్వ సక్తి అని అదికార్దె వోర్ డటి కీసెర్ మంతొర్. అవ్ వెరిసి బహ్రి వాసెర్ మంతంగ్!” ఇంజెర్ వొరొన్ సంగ వొరొర్ వడ్క్‌తెర్.

37ఇద్ తీర్దె యేసున్ బారెత కబుర్ అద్ యేరియ పూరొ కప్త.

38యేసు అద్ సునగోగ్నల్ పెసిసి సీమొన్త రోన్ సొత్తొర్. సీమొన్త ఆతిహరె బెయ్ యెడ్కితె కటుల్ పియ్సి మత్త. తె వూర్ తాన్ సాటి యేసున్ కోర్తెర్.

39తె యేసు తాన్ కరుమ్ నిల్సి, యెడ్కితున్ దమ్కి సీనెకెన్, అద్ యెడ్కి సుటి కీత. అస్కె యెంటనె అద్ బాయి తేచ్చి, వూర సర్బరెయ్ కియ్వల్ సురు కీత.

40అద్ నేటి పోడ్ద్ సొన్వల్ గట్కతె, సమ్దొ తీర్క్‌నంగ్ బేమరింగ్ మన్వలిర్‌కున్ పర్జ యేసునగ పియ్సి వాతెర్. అస్కె యేసు హర్ వొరొన్ పొరొ కెయ్క్ ఇర్సి, చొకొట్ కీతొర్.

41వెలెటిర్గటల్ బూత్క్ బహ్రి పెసిసెర్, “నిమె బగవంతనొర్ మరిని ఆంది” ఇంజెర్ జోర్తె కిలితంగ్. కిరిస్తు ఆందుర్ ఇన్వల్ అవ్ బూత్కున్ టావ మత్త కాడ్కి, ‘వడ్క్‌మట్’ ఇంజెర్ అవెన్ దమ్కి సీతొర్.

42తెలరి సక్రెన్ తేచ్చి, బోరె మనుర్ అవ్ గుటనెకె సొత్తొర్. పర్జ వోన్ సాటి మహ్క్‌సెర్ వోన్గ సొత్తెర్ అని తమ్వకున్ సుటి కీసి సొన్మ ఇంజెర్, యేసున్ ఆపుస్లె సూడ్తెర్.

43బతి యేసు, “ బగవంతల్ పర్జతంగ్ దిల్క్‌నగ మంజి, రాజ్ తాకుస్వల్ చొకొట్న కబుడున్ బారెతె, నన దుస్రొక్ చహర్క్‌నె గిర్ వెహ లాగర్. తాన్ సాటినె బగవంతల్ నాకున్ సారి కీతొర్” ఇంజెర్ వూర్కున్ వెహ్తొర్.

44అని యేసు యూదయ యేరియతె సొంజి, అగ మన్వలిక్ చహర్క్‌నంగ్ యూదుల్క్ మీరె మాయ్వలిక్ సునగోక్నగ బోద వెహ్చెర్ మత్తొర్.

← Chapter 3 Jump to: Chapter 5 →