2 Corinthians 8

Xhosa 2024 (ITestamente Entsha)

← Chapter 7 Jump to: Chapter 9 →

1Ke kaloku, bazalwana, siyanazisa ubabalo lukaThixo oluhlakaziweyo phakathi kwamabandla akwelaseMakedoni;

2okokuba ekucikidweni kwawo okukhulu yimbandezelo, kuthe ukuphuphuma kovuyo lwawo, nobuhlwempu bawo obendeleyo, kwaphuphumela ekutyebiseni ukunyanisa kwawo.

3Kuba ndiyangqina, ewe, nangaphezu kwamandla abo, bazinikela ngokuqhutywa yintliziyo;

4besikhunga kakhulu, besikhunga, ukuba silwamkele ubabalo olo, nobudlelane ke obo bokulungiselela abangcwele.

5Abakwenza njengoko sathemba ngako, basuka bazinikela eNkosini, nakuthi, ngokuthanda kukaThixo;

6ngokokude simyale uTito, ukuba athi, njengokuba ebeqalile, alufezele kuni ngokunjalo nolo lubabalo.

7Ke, kwanjengokuba niphuphuma iinto zonke, ukholo, nokuthetha, nokwazi, nokunyameka konke, nokusithanda kwenu, maniphuphume nakulo olu lubabalo.

8Anditsho ngakwammiselo; ukutsho, ndenziwa kukunyameka kwabanye, ndicikida nenyaniso yolwenu uthando;

9Kuba niyalwazi ubabalo lweNkosi yethu uYesu Kristu, okokuba yathi, ibisisityebi nje, yaba lihlwempu ngenxa yenu, ukuze nina nibe zizityebi ngobuhlwempu bayo obo.

10Ngale ndawo ke ndinipha okwam ukubona; kuba oko kunilungele nina aba nayiqalayo kwanyakenye le nto; ananela kuyenza, nayithanda nokuyithanda.

11Ngoko ke yifezekiseni le nto; ukuze, kwanjengokuba bekukho intumekelelo yokuthanda, kwangokunjalo kubekho nokuyifeza ngeninako.

12Kuba intumekelelo, ukuba selikho, yamkeleka kakuhle ngokoko asukuba enako umntu, kungabi ngokoko angenako.

13Kuba andithi mabaphumle abanye abantu, nibandezeleke nina;

14ukuze kubekho ukulingana ngexesha lakalokunje, ukuphuphuma kwenu makufikelele ekusileleni kwabo, ukuze nokuphuphuma kwabo kufikelele ekusileleni kwenu;

15njengokuba kubhaliwe kwathiwa, Lowo wabutha kakhulu akabanga nakusalelayo; nowayebutha kancinane akabanga nakusilela.

16Makubulelwe ke kuThixo, ongenise kwaoko kuninyamekela entliziyweni kaTito.

17Ngokuba wasamkela okunene isiyalo; ke uthe, enyamekile, uthe ngokuqhutywa yintliziyo, waya kuni.

18Sathuma ke kunye naye umzalwana odume phakathi kwawo onke amabandla, ngokuvakalisa iindaba ezilungileyo.

19Asiyikuphela ke loo nto; wanyulwa nokunyulwa ngawo amabandla, ukuba abe ngohamba nathi ngolu lubabalo silulungiselelweyo sithi, ekuzukiseni kwayo iNkosi, nasekubonakalaliseni nina ngokwentumekelelo yenu;

20silumkele oku, ukuze kungabikho bani usigxekayo kobu bu butyebi bulungiselelwa sithi;

21Silungiselela izinto ezilungileyo, kungekuphela nje emehlweni eNkosi, kodwa nasemehlweni abantu.

22Sithume ke kunye nabo umzalwana wethu, esimcikide futhi ngeendawo ezininzi, samfumana ekhuthele;

23Nokuba kuthethwa ntoni ngoTito, yazini ukuba ulidlelane nam, nomsebenzisi wam kuni; nokuba kuthethwa ngabazalwana bethu, yazini ukuba bangabathunywa bamabandla kaThixo, baluzuko lukaKristu.

24Lo mbonakalaliso ngoko wothando lwenu, nowokuzingca kwethu ngani, wubonakalaliseni kubo, naphambi kwamabandla.

← Chapter 7 Jump to: Chapter 9 →