Esther 1

Zande

Jump to: Chapter 2 →

1Si ki ta du wa gere ti rago Asuerose, gu Asuerose nanazoga rago tona Inde yo ki da ku Etiopia yo, ku ri angbi 127,

2ni gu rago re, ho Bakindo Asuerose asungu ni auru gako mbatabakindo, rogo bakumba bakporo Susana,

3ti biata garã gako zogarago, ko ambakadi pumbo tipa gako abazogo dunduko na avuruko. Abazogo Parasa na Madai ki du bara bangiriko, na irisiirisi agbia na abazogo angbi a.

4Ko ki yugu gu ũkumuko nangia ga gako taasitaasi ngbi fu yo, na gu irisa nangia ga gako wene pa du ni bahe, tipa dungu rame, nga arame 180.

5Ho agi arame anyasi ni re, bakindo ki mbakadi pumbo tipa rame saba rogo gu vurukporo naadu ati yo pati bakporo Susana, tipa agu aboro dunduko naadu bakumba bakporo yo, kikindigi pa yo na umba pa yo a.

6I ambakadi asiasi remu du ni pusi he, ni zau remu, na ni bibiri he a, ni vodivodi he na wene tutu remu ni ngungungu he kuti atongo feda, na kuti adangba bambu du ni zezerenge mbia. Akitikpara nga gu i amangi rogo dahabu na feda adu auru sekeseke ambia naadu ni dondidondi he, ni zamba ha, ni pusi he, ni nvugbo ho, na ni bibiri he a, nangia zezerenge ambia.

7I ki fu mbirimbiri he fu yo rogo ainga dahabu, a nga gu inga sa adu wa kura inga te. Ga bakindo imekakue adu kpaima, a wa ga bakindo weneringise adu.

8Were pa mbira ha adu kuti rugute. I asosoda nga boro ni mbiri he te. Bambiko bakindo arugu gako abaakumba kporo dunduko, ya i mangi he fu aboro wa i akpi nyemu he kperekese.

9Vaseti nangia nakindo, ri ambakadi pumbo a tipa ade rogo ga bakindo bambu nangia ga Bakindo Asuerose.

10Ti saba uru, ho kpoto bakindo yo awasa ni be imekakue, ko arugu Mumana, na Bizita, na Arubona, na Bigata, na Abagata, na Zetara, na Karukasa, nangia agu avuruko saba nanamanga pai ku bara bangiri Bakindo Asuerose,

11i ye na Vaseti nangia nakindo ku bara bangiri bakindo na kpakpari nakindo riri yo, ka yugo wene ngbanyari fu aboro na abazogo. Bambiko bi ri angba angba gbe.

12Ono Nakindo Vaseti aka pa ye kuti ga bakindo yambahe ku ngba avuruko. Si du bakindo azingi ti ni, gako erá ki du wa we ngbaduko yo.

13Bakindo ki gumba pai fu airatatamana, nangia agu yo nanaina pa rago apai bambiko wo sino bakindo anadu fu agu yo naina pa rugute, na pa sapangbanga a.

14Agu akumba naadu fuo ko angia Karasena, na Setara, na Ademata, na Tarusisa, na Merese, na Marusena, na Memukana, nangia abazogo saba nangia ga aParaso yo, na ga aMadaio yo, nangia agu yo naabi kpakpu bakindo ki nisungu ku mbata yo fu aboro rogo gako ngbi:

15Bakindo ki ya, “Ani amanga waĩ fu Nakindo Vaseti wa du he ti rugute, wa ri agia nga sangba Bakindo Asuerose ngba avuruko ya?”

16Memukana ki karaga pai ku bangiri bakindo na abazogo, ki ya, “Nakindo Vaseti amanga nga irairapai kuti kina bakindo sa te, ono kuti abazogo dunduko a, na kuti agu angbatunga aboro dunduko du rogo ga Bakindo Asuerose angbi dunduko.

17Bambiko ade dunduko nikagia pa gu pai nakindo naamangi he re, pa akumbayo nikadu ni payapaya ha bangiriyo, bambiko i nikaya ‘Bakindo Asuerose aya i ye na Nakindo Vaseti, ku bara bangiriko, ka ri aye nga ya.’

18Ti gi rago re ade rogo ringara Parasa na Madai, naagi pa ga nakindo mangimangi pai, i nikagumba kina ha a wo fu ga bakindo abazogo dunduko. Si du payasi pa na zinga nikadu mbiko ho ni bakere he gbe.

19Ka si ngba bangiri bakindo, bakindo ki ru ndika, i ki ke he ku dagba ga aParaso arugute na ga aMadaio, ka i asa nga ha berewe ya, ka Vaseti aye nga ku bara bangiri Bakindo Asuerose berewe wa sa ya. Bakindo ki fu gari ũ pa du ni nakindo fu kura ri ngba ki susi ri.

20Gu ndika bakindo ka rú, ho i ka taka pande he ni rogo gako ngbi, wa du he ni bakere ngbi, dere aboro dunduko afu irisa fu akumbayo, kikindigi pa yo na umba pa yo a.”

21Gi pai re ki ngba bangiri bakindo na abazogo. Bakindo ki mangi he kuti sangba Memukana.

22Ko akedi awaraga ku rogo ga bakindo angbi dunduko, ku rogo angbi dunduko, a wa paha adu ni keke he, na fu angbatunga aboro dunduko rogo payo yo, ya akumba zogo gayo gayo aborokporo ni ba sa sa dunduko, ki taki pande he rogo pa gayo aboro yo.

Jump to: Chapter 2 →