Esther 6

Zande

← Chapter 5 Jump to: Chapter 7 →

1Ni gu yuru re rame ki sonzora bangiri bakindo. Ko ki gumba pai i ye na gu kitabu pekapai i nake tingida pa mangaapai ku rogo ho, i ki gedi he ku bara bangiri bakindo.

2I ki bi fie ni keke he ya, Morudekai akusi pa aBigatana na Terese, nangia avuru bakindo ue, naadu dagba ababanda ngbadimo, wa i akpi nyemu ka imo Bakindo Asuerose.

3Bakindo ki ya, “Gini irisa i afu fu Morudekai na tambuahe tipa gi pai re?” Avuru bakindo nangia agu yo nanamanga pako ki ya, “I amanga nga pai fu ko wa sa te.”

4Bakindo ki ya, “Da du vurukporo yo?” Were Amana ki ye ti kina gu saa re ku vurukpofo pati ga bakindo bambu yo, ka fura na bakindo tipa pa asa Morudekai ti gu ngua ko ambakadi he tipa ko.

5Avuru bakindo ki ya fu ko, “Mo ngere, Amana ru vurukporo yo.” Bakindo ki ya, “Ko yé ku dimo no.”

6Si du Amana arimi ti ni. Bakindo ki ya fu ko, “I nimangi wai fu gu boro bakindo akpi nyemu ka fu irisa fu ni?” Amana ki berẽ he ku kpotoko yo ya, “Da ka bakindo akpi nyemu ka fu irisa fu ni susi re?”

7Amana ki ya fu bakindo, “Tipa gu boro bakindo akpi nyemu ka fu irisa fu ni,

8i nikusi ga bakindo aroko nga gu bakindo aukadi tiko na ni mbata, na gu farasi bakindo naandu ri ru, nga gu ru du na kpakpari bakindo riru yo.

9I nifu aroko na farasi ku be gu ni sa dagba ga bakindo irisirisi abazogo, ni ki ukadi gu boro na ni bakindo akpi nyemu ka fu irisa fu ni, ki nindu na ni ri farasi ngba gene bakporo, ki nitaki pande he ku barangba ni yo ya, ‘Wo i nimangi he fu gu boro bakindo akpi nyemu ka fu irisa fu ni’.”

10Bakindo ki ya fu Amana, “Mo ípisi tiro, ki rogo roko na farasi, a wa gumba mo ho, ki mangi he wo fu Morudekai nga boro Ebere, ninasunga pati ga bakindo ngbadimo. Ka he kpa nga sa ti gu gumba mo pa ha wa sa ya.”

11Amana ki rogo roko na farasi, ki ukadi Morudekai na ni, ki nindu na ko ri farasi ngba gene bakporo, ki nitaki pande he ku barangba ko yo, ki ya, “Wo i namanga fu gu ni bakindo nakpi nyemu ka fu irisa fu ni.”

12Morudekai ki yega ku pati ga bakindo ngbadimo. Ono Amana aipisi tiko ku kpuko yo na rungo, ki dadi riko.

13Amana ki pe pa agu apai mangi ko dunduko fu diako nangia Zerese na abadiako a. Gako aboro tatamana ki gumba ha fu ko na Zerese nangia diako a, ki ya, “Ka angia Morudekai nga gu ko mo natona ka ti ku barangba ko, nga ngbatunga aEbere, mo adia nga be ko te, ono mo ati ati ku barangba ko ni rengo.”

14Fura ki ta du kina ku ngbayo, avuru bakindo ki da, ki ipisi tiyo ka ndu na Amana tipa gu pumbo Esetere ambakadi he.

← Chapter 5 Jump to: Chapter 7 →