bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Zande
/
Zande
/
Esther 2
Esther 2
Zande
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 3 →
1
Fuo agi apai re, ho ga Bakindo Asueroseerá azere ni, ko ki tingidi pa Vaseti, na gu pai ri amangi, na gu ndika i arú tipa ri.
2
Agu avuru bakindo nanamanga pa ko i ki ya fu ko, “I gbáta wene paranga ngasu ade tipa bakindo.
3
Bakindo moi abanyaki rogo aringara dunduko rogo gako ngbi, i dúngura wene paranga ngasu ade dunduko ki ye na yo ku bakumba bakporo no nga Susana, ku rogo ga ade bambu, ku tii be Egai nangia vuru bakindo ni babanda ade. I fu gayo aúgirisati fu yo.
4
Gu ngasu de nikangba bangiri bakindo, ri ki du ni nakindo ku ba Vaseti.” Gi pai re ki ngba bangiri bakindo, ko ki mangi he a wo.
5
Boro Ebere adu bakumba bakporo Susana yo rimoko angia Morudekai, nangia wiri Yaira, Yaira angia wiri Simi, Simi ki ngia wiri Kisi, ni boro Benyamina.
6
Ko i adi ko Yerusarema yo na gu zizi aboro i andu na yo na Yekonya nangia bakindo aYudo, nangia gu ko Nebukadenesara bakindo aBabero aga na ko ni zizi ko.
7
Morudekai nanambu ti Adasa, nangia Esetere, ni wiri andoko, bambiko bari na nari adu nga ti ni te. Gu paranga de re, ri angba gbe, ngbanyari ki susi. Ho bari akpi ni na nari, Morudekai ki di ri wa wiriko.
8
Ho i agi pa ga bakindo rugute ni na gako ndika, na ho dungu paranga ade adungura tiyo ni ku bakumba bakporo Susana yo ku tii be Egai, i ki di Esetere ku bambu bakindo yo a, ki fu ri ku be Egai, nangia babanda ade.
9
Gi paranga de re ki ngba ti Egai gbe, ko ki yugu weneringise fu ri. Ko ki fu gari aúgirisati fu ri ni ba sa, na bete riahe du tipa ri, ki fu siasia paranga ade saba fu ri rengbe tipa ri dagba ga bakindo aborokporo. Ko ki fu gu ba fu ri ngba ki susi rogo ga ade bambu yo na tipa gari paranga ade a.
10
Ono Esetere ayugo nga pa ngbatungari na pa agumeri a te, bambiko Morudekai arugu ri ka ri yúgu nga pa ha ya.
11
Morudekai ki nita na uru pangba gu vurukporo naadu pati ga ade bambu, ka ruga tiko na pa Esetere, na pa gu pai dũ tipa ri.
12
Ho rago ada ni tipa paranga de ri rimi koyo du Bakindo Asuerose ni, fuo mbakada ri tiri tipa diwi 12 a wa rugute adu tipa ade, bambiko gayo rago girisati adu wa gere: tipa diwi sita i anambakada tiyo na gu nzeme nga ga manemane, tipa kura diwi sita na wene fuõahe, na agu ahe tipa girisa ade a―
13
paranga de anindu koyo du bakindo ni wa gere: gu he ri akpi nyemu he, si i afu he fu ri ri kuru na ni rogo ga ade bambu yo, ki ndu ku rogo ga bakindo bambu.
14
Nyemu ri andu, wiso ri ki karaga tiri ku rogo gu ue bambu nga ga ade ku tii be Sasegara, nangia vuru bakindo nanabanda ga bakindo adebadia. Ka ri arima nga koyo du bakindo ni berewe ya, kina gu ka ri ngba ti bakindo, i ki yambu ri ti rimori.
15
Ho ga Esetere rago ada ni, nangia wiri Abiyaira nangia ando Morudekai, Morudekai ambu ti ri wa wiriko, ri rimi koyo du bakindo ni, ri aida nga na aumbakadatise te, kina gu Egai aasia pa ha nangia vuru bakindo, ni babanda ade. Esetere angba bangiri agu yo dunduko naabi ri.
16
Si du i andu na Esetere ti ni koyo du Bakindo Asuerose ni ku rogo gako bambu bakindo ti bawe diwi, nga gu diwi nga Tebete, ti saba gará gako zogarago.
17
Bakindo ki kpi nyemu Esetere ki susi kura ade dunduko. Ri ki bi inapai be ko ki ngba bangiriko ki susi ngasu ade du. Si du ko amoi kpakpari nakindo ku riri yo, ki sa ri ni nakindo ku ba Vaseti.
18
Bakindo ki mbakadi bakere pumbo tipa gako abazogo dunduko na avuruko, ni pumbo tipa Esetere. Ko ki fu rago ongoda rogo gako angbi, ki fu gamahe a wa pa ga bakindo weneringise nidu.
19
Ho paranga ade adungura tiyo ni ni ue he, Morudekai asungu pa ngbadimo ga bakindo kporo.
20
Esetere ata yugo nga pa ngbatungari na pa agumeri te, a wa Morudekai arugu ri. Bambiko Esetere anagia sangba Morudekai kindi, wa kina gu ri agia ha ho ko ambu ti ri ni.
21
Ti gu rago re, ho Morudekai asungu ni pa ngbadimo ga bakindo kporo, avuru bakindo ue, nangia aBigatana na Terese, nanidu dagba ababanda ngbadimo, i ki zingi ki niasadi ka imo Bakindo Asuerose.
22
Morudekai ki ini gi pai re, ko ki yugu pa ha fu Nakindo Esetere. Esetere ki kusi he fu bakindo ti rimo Morudekai.
23
Ho i awisigi gi pai ni re, i ki bi he ya rengo nga ha. I ki imi yo ue dunduko ni asa yo ti ngua. I ki ke pa ha rogo Kitabu Pekapai ku bara bangiri bakindo.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 3 →
All chapters:
1
2
3
4
5
6
7
8
9
10
Recommended Reading
Commentary
Esther Commentaries
→
Devotional
Esther Devotional Guide
→
Get This Bible
Zande Study Bible
→