Esther 4

Zande

← Chapter 3 Jump to: Chapter 5 →

1Ho Morudekai aini pa agu apai ni dunduko namangi re, Morudekai ki sipi gako aroko, ki ukadi tiko ni mbuzaroko na kuke, ki kuru ku bebere bakporo yo, ki poi ku ari ni bakere kpe ni nunga.

2Ko ki da ti ngbadimo ku bakindo yo, bambiko a nga boro sa naukadi tini na mbuzaroko ka rimi ku bakindo yo te.

3Rogo angbi dunduko, ho ga bakindo rugute ada ni na gako ndika, bakere nunga ki du dagba aEbere na pa gina riahe, na kparakpe, na ta ngbaduse. Dungu yo apiki sande na mbuzaroko ti yo na kuke.

4Ga Esetere paranga ade na avururi aye ki gumba paha fu ri. Nakindo ki nirungo gbe, ki kedi roko i ukadi Morudekai na ni, ki uru gako mbuzaroko ti ko. Ono ko adia nga gu roko te re.

5Esetere ki yambu Ataka, nangia gu vuru bakindo sa, nangia gu ko bakindo aasia pai fu ko ko niunda ri. Ri ki rugu ko ko ndu koyo du Morudekai ni, ka ina gini pai nga gere, tipagine du he ti ni wo.

6Si du Ataka andu ti ni koyo du Morudekai ni ku vurukporo bakporo yo, nadu pati ga bakindo ngbadimo.

7Morudekai ki gumba pa agu apai fu ko mangi ko dunduko, na pa gu marã Amana akido pa ha ya ko afu he ku rogo ga bakindo bambu igaahe tipa aEbere, ka ba tungayo.

8Morudekai ki fu waraga fu ko a, wa gu i ake ni ndika nga gu i afu he Susana yo tipa ba tungayo, ko yugu he fu Esetere, ki taki pande pa ha fu ri, ki rugu ri ya ri ndú koyo du bakindo ni, ka zungadi ko, ki sana ko tipa angbatungari.

9Ataka ki ye ki gumba gu pai fu Esetere Morudekai ape he.

10Esetere ki fura na Ataka, ki gumba pai fu ko ko gumba ha fu Morudekai, ki ya,

11“Avuru bakindo dunduko, na ga bakindo aboro angbi, i ini he ya, gu ni ka rimi ku rogo kparakpara vurukporo, ka i ata yamba nga ni ya, watadu kumba na de, rugute ho sa tipa ha nga i imi ni, kina gu ni ka bakindo taĩ ngbondo dahabu koyo du ni ni, ni ka nye ni ungani. Ono i ata yamba nga re mi ndu koyo du bakindo ni ni gi 30 rame te re.”

12I ki gumba ga Esetere apai fu Morudekai.

13Morudekai ki ya fu yo i karaga gi karagapai re fu Esetere, ki ya, “Ka mo berẽ nga ha tigamo ya mo abata tipa du mo rogo ga bakindo bambu, susi kura aEbere dunduko ya.

14Bambiko ka mo vura onga kii ti gi saa re, undahe aye na bata fu aEbere rogo kura rago. Ono mo na ga bamo aborokporo, oni akpíka akpika. Da ini he ya mo ye ka du ni nakindo tipa kina rago gi pai re?”

15Esetere ki ya fu yo i karaga gi pai re fu Morudekai, ki ya,

16“Mo ndu, ki dungura agu aEbere mo ka bi yo du Susana no dunduko, ki gina riahe tipa re, ka oni ri nga he watadu mbira he tipa uru biata yuru na uru a ya. Mi tigimi a, mi agína riahe na gimi paranga ade kina wo. Si du mi ka ndu ti ni koyo du bakindo ni, wa adu nga ha kuti sangba rugute ya. Ka mi Kpi, mi kpi.”

17Si du Morudekai andu ti ni ngba gako gene, ki mangi gu pai Esetere arugu ko na ni dunduko.

← Chapter 3 Jump to: Chapter 5 →