Esther 7

Zande

← Chapter 6 Jump to: Chapter 8 →

1Si du bakindo aye ti ni na Amana ka ri pumbo na Nakindo Esetere.

2Ni gu ue uru nga ga pumbo imekakue, bakindo ki sana Esetere berewe, ki ya, “Nakindo Esetere, ga zungaditise nga gine? Mi aida pa ha foro. Ga sanahe nga gine? Mi amanga ha amanga ka si vura du wa kina bebere gi ngbivurú.”

3Nakindo Esetere ki karaga ha ki ya, “Ako bakindo, ka si du wa ngba mi angba bangiro, na ka si ngba ti bakindo, i mbu ungare fere tipa gi zungaditise, na gimi aboro tipa gi sanahe.

4Bambiko i bagi rani, mi na gimi aboro, ku gbarasa rani, na ka imo rani, na ka ba tungarani kpakaya Ono ka i abagi rani ni akanga nga akumba na ade, ka mi aongo kii, bambiko gaani rungosiro arengba nga na gu pai ka kpa be bakindo te.”

5Bakindo Asuerose ki gumba pai ki ya fu Nakindo Esetere, “Da nga ni, ni wari, naberẽ pai na ruka ku kpotoni yo ka manga wo?”

6Esetere ki ya, “Bakitingbangarani nga kina gi gbigbita Amana re, nga vurarani!” Amana ki gunde bara bangiri bakindo na nakindo.

7Bakindo ki guari pati pumbo imekakue ni gako zinga, ki ndu ku ati ku bakindo yo. Ono Amana ki nye ka zungadi Nakindo Esetere tipa ungako, bambiko ko abi he ya bakindo aberẽ pa manga ko gbigbita.

8Bakindo ki karaga tiko ati ku bakindo yo ki ndu ku bambira imekakue yo berewe. Amana ati ku ri gu kitikpara Esetere asungu ri he. Bakindo ki ya, “Ko nazuba nakindo kina ku bangire dimo no?” Pai ki du kina ku ngba bakindo, i ki dadi kpakpu Amana.

9Arubona gu vuru bakindo sa nanamanga pa bakindo, ki ya, “Mo ngere, ngua du ho na bagiza ha wa bagiza mbiribe 50, dua Amana ha tipa Morudekai, nga gu ko nagumba wenepai tipa bakindo. Si ku Amana yo.”

10Bakindo ki ya, “Oni ási ko ti ni.” Si du i aasi Amana ti ni ti gu ngua ko adua ha tipa Morudekai. Si du ga bakindo zinga ki zeredi.

← Chapter 6 Jump to: Chapter 8 →