Esther 5

Zande

← Chapter 4 Jump to: Chapter 6 →

1Si ki ta du wa gere ti biata uru, Esetere ki ukadi tiri na gari roko nakindo ki ru rogo gu kparakpara vurukporo nadu rogo ga bakindo bambu, pati ga bakindo bambu. Bakindo ki sungu auru gako mbatabakindo rogo ga bakindo bambu, pa ngbadimo bambu.

2Ho bakindo abi Nakindo Esetere ni, ri ru vurukporo yo, ri ki ngba bangiriko. Bakindo ki tai gu ngbondo dahabu nadu beko koyo du Esetere ni. Si du Esetere ambedi ti ni, ki zadi ngba ngbondo.

3Bakindo ki ya fu ri, “Nakindo Esetere gini pai dũ? Ga sanahe nga gine? Mi afu he foro ka si vura du wa kina bebere gi ngbi vuru.”

4Esetere ki ya, “Ka si ngba ti bakindo, bakindo ye na Amana areme tipa gu pumbo mbakadi mi tipa bakindo.”

5Bakindo ki ya, “I ípisi Amana, ani mángi he wa Esetere akpi nyemu he.” Si du bakindo aye ti ni na Amana tipa gu pumbo Esetere ambakadi.

6Bakindo ki ya fu Esetere pati pumbo imekakue, “Ga zungaditise nga gine? Mi aida pa ha foro. Gi sanahe nga gine? Mi amanga ha amang i ka si vura du wa kina bebere gi ngbi vuru.”

7Esetere ki karaga ha ki ya, “Gi zungaditise na gi sanahe nga;

8ka mi ngba bangiri bakindo, na ka si ngba ti bakindo ka ida gi zungaditise na ka manga pa gi sanahe, bakindo ye na Amana tipa gu pumbo mi ka mbakada ha tipa yo. Mi ki kusi he gba a wa sana bakindo he.”

9Amana ki kuru ni gu uru re na bakere ngbarago ki wasa kpotoko yo. Ono ho Amana abi Morudekai ni ngbadimo ku bakindo yo, ka ko aru nga ki ne gene fu ko ya, ngbaduko ki imi kuti Morudekai gbe.

10Ono Amana azeresi ngbaduko, ki ga ku kpuko yo. Ko ki kedi sunge ki yambu abadiako na Zerese nangia diako.

11Amana ki gumba pa gu taarimo fu yo nangia ga gako ũkumuko, na pa rimbasa awiriko, na pa agu ahe dunduko bakindo akiisi pa ko na ni, na wa ko amoi ko ku ri abazogo na avuru bakindo.

12Amana ki ya berewe, “Ii, Nakindo Esetere, ri aida nga ha fu boro sa ni ye na bakindo tipa gu pumbo mbakadi ri he te, kina re. Ri yambu re wa sa na bakindo ani ye gba a.

13Ono agi apai dunduko re aunda nga re wa sa te, wa mi nabi Morudekai nga boro Ebere, ko sungu ngbadimo ku bakindo yo.”

14Diako ki ya fu ko nangia Zerese na abadiako dunduko, “I dúa ngua ku ari wa bagiza mbiribe 50. Wiso mo ki gumba pai fu bakindo ya i asi Morudekai ti ni. Mo ki mongo ndu na bakindo sa pumbo na mongo.” Gi pai re ki ngba bangiri Amana. Ko ki ya i dua ngua.

← Chapter 4 Jump to: Chapter 6 →