Hosea 1

Zande

Jump to: Chapter 2 →

1Gu sangba Yekova naaye koyo du Osea ni nangia wiri Beri, ti rago Uziya, ti rago Yotama, ti rago Aza, na ti rago Izikiya, nangia abakindo aYudo, na ti gu rago nangia ga Yerobama wiri Yoasa, bakindo aYisaraere.

2Ho Yekova agumba pai ni mbata ku ngba Osea, Yekova aya fu Osea, “Mo ndú, ki di de ni diaro nga debari, ki vungu awiri debari ti ri, bambiko ringara mangi pai ni bakere he wa sino pa bari ni mbu yo pa Yekova.”

3Si du ko ki ndu ki di Gomere wiri Diberaima, ri ki du na gude ki batika kumbagude.

4Yekova ki ya fu ko, “Mo yámbu rimoko nga Yizerere; bambiko rago ni ngbutuko ho mi ki mbusi ngbatunga Yeu tipa kure Yizerere, mi ki digisi ngbi nga ga ngbatunga Yisaraere.

5Ni gu rago re, mi akúa gu mboto nga ga Yisaraere rogo ngboongboorago Yizerere yo.”

6Ri ki du na kura gude berewe ki batika degude. Yekova ki ya fu ko, “Mo yámbu rimori nga Nungate, bambiko mi adú nga na nunga ngbatunga Yisaraere berewe te, ka vu yo wa sa te.

7Ono mi adú na nunga kina ngbatunga Yuda, mi ki batasi yo na ome Yekova nga gayo Mbori Mi abátasa nga yo na mboto te, na basape te, na pa sovura te, na afarasi te, na abanduri afarasi a te.”

8Ho ri ambu ti Nungate ni, ri adu na kura gude ki batika kumbagude.

9Yekova ki ya, “Mo yámbu rimoko nga Gimiaborote, bambiko oni nga gimi aboro te, mi adu nga ni gaoni Mbori a te.”

10Ono gedigedi awiri aYisaraere adú wa ngume baime, arengba nga i ringbisi he na geda ha a ya. Rogo gu ba yo i agumba ha ni fu yo, “Gimi aboro nga oni te,” i agúmba ha fu yo ya, “Awiri unga Mbori nga oni.”

11Awiri aYudo adúngura tiyo wa sa na awiri aYisaraere, i ki sia barumbatayo fu yo sa; i ki kuru ringara yo, bambiko bakere pai nikadu rago Yizerere.

Jump to: Chapter 2 →