Hosea 11

Zande

← Chapter 10 Jump to: Chapter 12 →

1Ho Yisaraere adu ni ni gude, mi I akpi nyemu ko, mi ayambu wire Ezipeta yo.

2Wa mi aniyambu yo dedede kina wo i aniguari ti re; i ki nitumo fu aBara, ki nizo fuõngua fu sese kpiaahe.

3Ono mi ni tire nayugu pai fu aEfuraima i nita, mi arogo yo ku bere; ono i aina nga ha ya mi naahusi yo te.

4Mi angbe ku mbata yo fu yo na giri nunga, na agiri nyemuse, mi ki du fu yo wa gu boro nazaka gonga ngba ti biringa ngbayo, mi ki nugadi koyo du yo ni ki rigi yo.

5I akáraga tiyo berewe ku ringara Ezipeta yo, Asura adú ni gayo bakindo, bambiko i ka pa karaga tiyo kono du mi ni.

6Basape azínga kuti gayo abaakpo ro, ki nyasi angbongbo susu du ti gayo angbadimo, ki nyasi yo tipa boro gayo berã.

7Gimi aboro nakpi nyemu ka sa tiyo ti re ku sa yo; si du mi ringbisi yo sa gonga, a nga boro ho nikadia ha te.

8Ako aEfuraima, mi awira pa mbu roni waĩ! Ako aYisaraere, waĩ rengbe mi ka fu roni ku be aboro! Waĩ rengbe mi ka sa roni wa gu kporo nga Adama! Waĩ rengbe mi ka manga roni wa Zeboima! Ngbadure yo nanoka tihe rogo re yo, gimi nunga naguari ni wene he.

9Mi amánga nga pa gi ngariangaria zinga te, mi agbárasa nga Efuraima berewe te; bambiko mi nga Mbori nga boro te, gu Kparakpara Ziazia Ko du dagba roni, mi ayé nga ka gbarasa bakporo te.

10I andú fuo Yekova, ko apázuo wa bahu; ii, ko apázuo ni tiko, awiriko ki niye dioyo ni kio;

11i ayé wa azire Ezipeta yo ni kio, wa ambipo ringara Asura yo; mi akáraga yo ku rogo gayo akporo, wo poi Yekova.

12Efuraima re azire kuti re gbe, ngbatunga aYisaraere namanga re ni biriki; ono Mbori ini Yuda kindi, Yuda nanye na yososopai fu gu Kparakpara Ziazia Ko.

← Chapter 10 Jump to: Chapter 12 →