Hosea 10

Zande

← Chapter 9 Jump to: Chapter 11 →

1Yisaraere du wa zugazuga bakakue nazuka rindihe. Wa zuga gako zuzuhe susi kina wo ko nadua abamotumo ki susi; wa pa gako ringara angba kina wo ko nambakada gako duadua kpiaahe.

2Ngbaduyo yo du na biriki; i ka kpida gayo ingapai awere. Yekova akúa gayo abamotumo ku sande, ki gbarasi gayo duadua kpiaahe.

3Bambiko i ayá; “Bakindo be rani te, bambiko ani agunde nga ti Yekova te, na bakindo a, gini he rengbe ko ka amanga ha fu rani?”

4I nagumba apai gbua; i nakido he ni kungba zungahe gbua; si du sarangbanga ki kuru wa kere kungba funafuna ahe rogo dede adue ati yo.

5Araki Somorona yo nakio tipa gu kpia awiri bagara Betaavena yo. Gaha aboro akpára kpe tipa ha na gaha aboromotumo nga ga kpiaahe yo akpára ni wawa ku ri he, bambiko gaha taarimo guari ti he.

6Ii, gu he re ni tihe i ka tinda ku Asura yo, wa rúhe fu Yarebe nga bakindo. Efuraima adú na zee, Yisaraere adú a na zee be kina gako berã.

7Bakindo Somorona i adia ko ku sa yo, wa kitiri bengua bangiri ime.

8Gu tumbatumba aba du Avena yo, nga ga aYisaraere ingapai, si adú ni gbarasigbarasi he. Kiwe asóna ku ari na sakokoso ri gayo abamotumo; i ayá fu abaagangara, Oni dádi rani, na fu agangara, Oni tiwi ku ri rani.

9Ako aYisaraere, oni amangi ingapai tona ti rago Giba; yo du yo ni kindi. Vura adúsia nga yo Giba yo te?

10Mi ayé sa aboro ka mbusa yo ti gu rago ngba ti re; arikaaboro adúngura tiyo kuti yo ho mi ka voda yo ni tipa gayo irairapai du ue.

11Efuraima adu wa paranga dongi i arugu ru u nikpi nyemu simba zende ahe, mi avo nga gonga kuti wene gorõru te; ono mi amáa Efuraima ti gonga, Yuda nikasopa bino, Yakoba adé undu sende tigako.

12Oni rú rurupai tipa roni, oni ké zuzuhe ku sangba weneringise yo; oni sópo gaoni fute, bambiko si nga rago gbata Yekova, ko ye ka na mamu bata ku ri roni.

13Oni asopo gbegberẽpai, oni ake irairapai, oni ari zuzu rezire. Bambiko oni kida kuti gaoni angbagidavura na kuti gaoni rimbasa nyanyaki aboro,

14si du gu gbarakagbaraka nga ga vura akúra ti ni ku dagba gaoni aboro, gaoni nyanyaki aba adú ni gbarasigbarasi he dunduko, wa Sarumana agbarasi Bete-arubere ti rago vura; anaagude ki fõ tiyo ki kuadi tigayo rukutu na awiriyo a.

15Ako ngbatunga aYisaraere, kina wo si ka manga fu roni, bambiko gaoni bakere gbigbitapai. Ho rago ka gira ni i adia bakindo aYisaraere ku sa yo.

← Chapter 9 Jump to: Chapter 11 →