Hosea 12

Zande

← Chapter 11 Jump to: Chapter 13 →

1AEfuraima nariga yuge, ki nido gu yuge naye uroyo na uru pitipiti, i nangeesa pa zire na gbarasapai; i nazunga he na aAsuro, i ki tindi nzeme ku Ezipeta yo.

2Yekova du na ngbanga kuti Yuda, ko ambúsa Yakoba kuti gako apai, ki fu mbusa fu ko kina kuti gako mangaapai.

3Yakoba azi wirinako ti gidako, rukumbu yo, ho Yakoba adu ni ni kumba ko ata kpata na Mbori.

4Ko ata kpata na maraika ki di be ko, ko akpari ki nizungadi ko. Ko agbia Mbori Betere yo, yo Mbori afura na ko ni―

5Nga kina Yekova nga Mbori nga ga arimbasa ko, Yekova nga rimoko:

6“Si du mo akaraga tiro mbiko gu undahe nga ga ga Mbori, mo ka kuti weneringise na ruru sarangbanga, ki nisungudi ga Mbori kindi.”

7Yakoba wa babagiahe, du na úringbisaahe nga ga biriki be ko, ko nakpi nyemu ka rungosi aboro.

8Efuraima aya, “Ako, ono mi nga irakumuko, mi bi mokiisa kumuko tipa re”; ono gako akumuko dunduko arengba nga ka dia gu irairapai ku sa yo mangi ko te.

9Mi nga Yekova nga ga Mbori tona ti du mo ringara Ezipeta yo; mi aída ha foro mo niraki berewe rogo abamburoko yo, wa ti rago ringbisiringbisi pumbo.

10Mi agumba pai fu anebi; kina mi du naangeesi pa yuguyuguahe, ki nifu apai ni asanza ku ngba anebi.

11Ka irairapai du Girada yo i adú adu wa kungba he; ka ngia Girigara yo i atumo ni ni abaabagara, gayo abamotumo adú a wa kina guguda ambia pangba dede due ati yo.

12Yakoba aoro ku ringara Arama yo, yo Yisaraere amangi sunge diade ni, ko ki nibanda akandoro gene diade.

13Yekova aye na Yisaraere Ezipeta yo ku be nebi, ko adu ni bandabanda ko a be nebi.

14Efuraima azingisi pai ni kere pai; si du Yekova ambú kure gako ingapai kina ku ri ko, ki sa gako gbarasarimo kina ku ri ko a.

← Chapter 11 Jump to: Chapter 13 →