Nehemiah 1

Zande

Jump to: Chapter 2 →

1Agu apai nga ga Nemaya nangia wiri Akira. Were si ki ta du wa gere ti gu diwi nga Kisireu, ti ue bawe gará, wa mi adu ku Susana yo nga ga bakindo gbata,

2Anania ki ye, nga gu wiribuba sa, ko na kura akumba naaye Yuda yo; mi ki sana yo tipa agu aYudo naabati, nga agu yo naamerẽ be ziaaboro, na tipa Yerusarema a.

3I ki ya fere, “Gu yangara yo nanye dagba zizi aboro rogo ringara, i du na kere rungo na soapai a; ngapa Yerusarema atiwi, i ki zokodi angbadimoho du ni we.”

4Ho mi agi agi apai ni re, mi ki sungu ki nikpari ni aume, ki nikpari ni nunga ti agu arago re. Mi ki nigina riahe kindi ki nikpari ku bangiri Mbori nga ga ngbangbaturũ ko.

5Mi ki ya, “Ako Yekova Mbori nga ga ngbangbaturũ ko, mi zungadi ro, nga bakere Mbori du ni iiriwo ko naka kuti pa zungahe na inapai fu agu yo nakpi nyemu ko ki nika kuti sangbako;

6mo, dege turo awere, ki za bangiro, ka gia gu kpe nga ga ga moyambu nga gu mi akpara ku bangiro ni gi rago ie uru na yuru a, tipa awiri aYisaraere nga gamo amoyambu, wa mi akusa pa ga awiri aYisaraere ingaapai, nga gu ani amangi kuti ro. Ii, mi na ngbatunga buba aingi pai.

7Ani amangi pai gbegberẽ gbe kuti ro, ani aka nga kuti sangbaro, na rugaapai, na, sarangbanga nga gu mo anaruga ga moyambu na ni nangia Mose te.

8Mi nazungadi in, mo tíngidi gu pai mo anaruga Mose na ni nga ga moyambu, niya, ‘Ka oni ti ndika, mi agbandaka roni tuturu ku dagba aboro;

9ono ka oni karaga tironi kono du mi ni, ki nika kuti gimi arugute ki nimangi he, ka gaoni aboro vura du ni gbandakagbandaka yo daku digida ngbangbaturũ yo vurũ, mi adúngura yo yo ki ye na yo ku rogo gu ba mi asia ha rimore nye rogo ho.’

10Were agi yo re nga gamo amoyambu nga gamo aboro, nga agu yo mo atumo yo na ga bakere tandu na nyanyaki bero.

11Ako Gbia, mi nazungadi ro mo dege turo ka gia gu kpe nga ga ga moyambu, na gu kpe nga ga gamo amoyambu nga agu yo nakpi nyemu gunde ti rimoro; mi nazungadi ro, mo mangi pa ga moyambu areme, ki yugu inapai fu ko ku kpoto gi kumba yo re.” Were mi tigimi adu ni bafuinga fu bakindo.

Jump to: Chapter 2 →