Nehemiah 6

Zande

← Chapter 5 Jump to: Chapter 7 →

1Si ki ta du wa gere ho i agumba ha ni fu aSanebarata na Tobiya, na Geseme nangia boro Araba, na gu kura avurarani, ya mi dua ngapa bakporo ka sapusapu he anye nga ti ni wa sa ya, ono ti gu rago re mi ata maa nga akpuguru ti angbadimo ho te,

2aSanebarata na Geseme ki kedi sunge fuo re, niya, “Mo ye ani gbia tirani na mo rogo gu kporo sa du rogo gu kpasakpasa rago nga Ono.” Ono i aberẽ pa manga re gbegberẽ.

3Mi ki kedi asunge koyo du yo ni, ki ya, “Mi namanga bakere sunge mi arengba nga ka ye koyo te. Tipagine ka mi za pa sunge ti ni ka ye kina koyo du oni ni?”

4I ki kedi sunge fuo re wa bara biama na kina gi pai re, mi ki karaga pai wa mbata.

5Sanebarata ki kedi gako moyambu berewe kono du mi ni ni bisue he na zakizaki waraga be ko.

6Gi kekepai ki du ti ni re, “I nagumba ha dagba arikaaboro, Geseme nape he a, ya oni na aYudo naberá pa sa mungu; si du oni nadua ngapa bakporo ti ni; ya mo tigamo naida ka sa tiro ni gayo bakindo, wa gumba yo ho.

7Mo aima sia anebi i taki pande pa ro Yerusarema yo a ki ya, ‘Bakindo du Yuda yo.’ I nikatingida pa ha fu bakindo tipa agi apai re. Si du mo ye, ani wísigi pa ha wa sa na mo.”

8Mi ki kedi pai fu ko, ki ya, “I amanga nga ngbatunga agu apai re gumba mo pa ha no te, mo tigamo nasanga ha ni kina gu biriki du kpotoro yo.”

9Bambiko i dunduko aidi ka gundesi rani, ki ya, “Beyo arungbura pati sunge, ka i amánga nga ha ya.” Ono awere, Ako Mbori, mo nyakasi bere awere.

10Mi ki rimi ku rogo ga Semaya bambu nangia wiri Deraya, Deraya angia wiri Metabere, nadu ni kisikisi ko. Semaya ki ya, “Ani ndú na mo ku rogo ga Mbori bambu yo, ku yekaru yo, ani ki kisi angbadimo yekaru; bambiko i naye ka imo ro, i aye yuru ka imo ro.”

11Ono mi ki ya, “Ka kumba wa mi were mere ka ora? Da du ho wa mi ka ndu ku yekaru yo ka banda ungani? Mi ada nga yo te.”

12Mi ki rugu tire na ni, ya Mbori akeda nga ko te, ono ko gumba gi pai re kuti re bambiko aTobiya na Sanebarata angbe ko.

13Bambiko i angbe ko angbe tipa gi pai re, ya mi gúnde ki mangi he ki ingi pai, i ndu ka taka pande gi gbegberẽpai re ka gbarasa rimore.

14Ako gi Mbori, mo tíngidi agu apai re nga ga aTobiya na Sanebarata, na ga gu denebi nga Noadaya, na kura agu anebi nga agu yo naida ka gundesi re.

15Si du ti gu 25 uru nga ga gu diwi nga Erura i ki nyasi ngapa bakporo, ramehe adu 52.

16Ho avurarani dunduko agi pa ha ni, na agu arikaaboro naadu pati rani kirikiri i ki gunde, payo ki paya bangiriyo; i aini he ya gi sunge re adu ni mangimangi he mbiko gu undahe nga ga gaani Mbori.

17Ku ri gere ga aYudo airakporo akedi dungu awaraga fu Tobiya ti agi arago re, ga Tobiya awaraga ki niye koyo du yo ni.

18Dungu aboro Yuda adu ni zizi yo be pa zungahe fu ko, bambiko Sekanya nangia bagbioko nangia wiri Ara: wiri Tobiya nangia Yoanana adi wiri Mesurama ni diako, Mesurama angia wiri Berekiya.

19I agumba pa ga Tobiya wene mangaapai fere a, ki nitaki pande gimi apai fu ko. Tobiya akedi awaraga ka gundesi re.

← Chapter 5 Jump to: Chapter 7 →