Nehemiah 4

Zande

← Chapter 3 Jump to: Chapter 5 →

1Si ki ta du wa gere ho Sanebarata agi he ni ya ani nadua ngapa bakporo, ko ki zingi ki du na imisiringbaduse gbe, ki nisawia aYudo.

2Ko ki gumba pai ku bangiri awirinako na gu rikavura nga ga Somorona, ki ya, “Gini pai mangi gi rungburarungbura aYudo re? I anyakasa pai berewe? I atumo ni amotumo berewe? I anyasa ha uru ki du sa? I asa agu aguguda nduka zirĩahe ni ambia berewe nga gu naima gbi?”

3Tobiya adu pati ko nangia boro Amona, ko ki ya, “Ii, gu i nadua ha ri ka derenvugo ndu auru he u agboroka gayo mbia ngapa bakporo!”

4Ako gaani Mbori, mo gí parani, bambiko i napayasi rani; mo karaga gayo gbarasarimo kina ku ri yo, ki fu yo i gbu gayo ahe ringara zizi aboro yo.

5Ka mo dadi nga gayo irairapai ya, ka mo gbandaka nga gayo ingapai bara bangiro a ya; bambiko i gara ga zinga ku ri yo ku bangiri abaduabambu.

6Si du ani adua ngapa bakporo; si ki du ni zunguzungu he a dunduko dati bebere basonaha. Bambiko aboro afu tiyo ka manga sungehe zaza.

7Ono, ho aSanebarata agi he ni na Tobiya na aArabo na aAmono na aAsedodo ya sunge dua ngapa Yerusarema nandu kina ku mbata yo kindi, sapusapu bangirihe mbedi ka nyasa, i ki zingi gbe;

8ki nita bura dagba yo dunduko ka ye ka so vura kuti Yerusarema ka maa dingisaro tipa ha.

9Ono ani akpari fu gaani Mbori, ki nimoi ababandarago tipa yo uru na yuru.

10Ono Yuda ki ya, “Ome aboro tindiro nabata, zirĩahe du ho gbe; ani arengba nga na dua ngapa bakporo te.”

11Avurarani ki ya, “I aina nga pa ha te, i abi nga ha a te, da kina ho ani ka kura ni ku dagba yo yo ki imi yo ki za sunge.”

12Ono ho agu aYudo nanaraka dagba yo yo aye ni i ki gumba ha fu rani bara bawe, “I ayé sa rani rogo agu arago dunduko, yo i naraka ni.”

13Si du mi amoi aboro ti ni rogo zorõzorõ arago gii ngapa bakporo yo, ku haurago yo, mi amoi aboro wa rika ngbatungayo adu, na gayo abasape, na gayo abaso, na gayo amboto ku be yo.

14Mi ki ngere, ki guari ku ari, ki ya fu airakporo na abanyaki na fu kura aboro dunduko, “Ka oni gunde nga be yo ya. Oni tingidi pa Gbia, du ni bakere ko ni iiriwo ko, ki so vura tipa awirinaroni, na awironi nga akumba, na agu awironi nga ade, na adiaroni, na gaoni akporo.”

15Ho avurarani agi he ni ya ani arugu tirani na ni, na Mbori asa gayo tabura si du gbua, ani ki karaga tirani dunduko ku pati ngapa bakporo, aboro andu ni ba sa sa sa kina gayo asunge.

16Si ki ta du wa gere fuo gu rago re, gu bebere gimi aborosunge ki ta manga sunge, gu bebere yo ki zadi abasape, na avurakube, na amboto, na rokovura, abanyaki ki ngarási ngbatunga Yuda dunduko,

17naadua ngapa bakporo. Agu yo naatinda ahe i ki du na aúvura be yo ni ba sa sa ki ta manga sunge ni gu beyo nizadi gayo úvura ni gu.

18Abaduabambu ki tatapa gayo basape kina ku pavuyo ki nidua ngapa. Gu ni navu nambongo ni ki du pati re.

19Mi ki ya fu airakporo na fu abanyaki na fu kura aboro dunduko, “Sunge kii gbe ki du ni kparakakparaka ha, ani tigaani ni gbandakagbandaka rani ri ngapa bakporo, gu ni ki turú aturá pati kura ni.

20Rogo gu ba ho oni ka du ni ki gi woro nambongo, oni ki ye kono du ani ni ni ipo. Gaani Mbori nikasovura tipa rani.”

21Wo ani amangi sunge tigaani re, ho uru anikuru ni wiso gu bebere yo ki zadi abaso daho akerekuru anikuru ni.

22Mi ki ya fu aboro ti kina gu rago re a, “Aboro niraki kina Yerusarema no dunduko na gayo amoyambu a, i ki du ni ababandarani yuru ki nimangi sunge uru.”

23Si du mi anaura nga gi roko ti ni ya, zavura awirinami na gimi amoyambu na agu ababanda aboro nanapeka re a ya; ani ki nindu ka mbeda ime na kina gaani úvura be rani ni ba sa sa.

← Chapter 3 Jump to: Chapter 5 →