Nehemiah 13

Zande

← Chapter 12 Jump to:

1Ni gu uru re i agedi gu kitabu nga ga Mose fu aboro. Pai adu ni keke he rogo ho nga, ka boro Amona na boro Moaba rimi nga ku rogo gu gbuu nga ga Mbori wa sa ya;

2bambiko i adusia nga awiri aYisaraere na riahe na ime te, ono i angbe Birama kuti yo ko tiwa yo ono gaani Mbori asa gu motiwa re ni maku.

3Si ki ta du wa gere ho aboro agi sangba rugute ni, i akpara k ungba aboro dunduko ti aYisaraere.

4Were mbata fu gere, Ereyasiba nga boromotumo, gu ko i asia ko ko banda avuru gu bambu nga ga gaani Mbori, ko akpamia tiko kuti Tobiya,

5ki mbakadi bakere vuru bambu fu Tobiya, yo i aiga agu amotumo ni nga ga zende ahe mbata, na fuõngua, na aúsunge, na gu sa dagba bawe nga ga zende ahe, na ga imekakue, na ga nzeme, nga gu i afu fu aRevi, na abayango, na ababanda angbadimo, wa rengbe he ku sangba rugute yo, na tumbatumba agamahe tipa aboromotumo.

6Ono mi adu nga Yerusarema yo ti gu rago re te, bambiko ti gu 32 gara zogarago nga ga Arutasasata nga bakindo Babera mi andu koyo du bakindo Arutasasata ni. Fuo gbanga rago mi ki sana bakindo tipa nduge

7mi ki ye ku Yerusarema no, ki rugu tire na gu gbigbitapai mangi Ereyasiba, nga mbakada gu vuru ga Mbori bambu yo fu Tobiya.

8Si aimi ti re gbe, mi ki bafu ga Tobiya ahe dimo yo ku zegi yo dunduko.

9Mi ki fu rugute i ki girisi avuru bambu yo; mi ki karaga agu aũsunge nga ga ga Mbori bambu, na amotumo ngungo na fuõngua ku ba ha.

10Mi ki gi he ya i afu nga ga aRevi kparakpara ahe fu yo a te; si du aRevi na abayango, nangia agu yo namangi sunge amerẽ ti ni ku rogo gayo aati ni ba sa sa.

11Mi ki darĩkango na abanyaki ki ya fu yo, “I ambu pa ga Mbori bambu tipagine?” Mi ki dungura yo wa sa, ki karaga yo ku ba yo yo.

12AYudo ki ye dunduko na gu sa dagba bawe nga ga zende ahe, na ga imekakue, na ga nzeme ku rogo abambuiga kikiipaahe yo.

13Mi ki sia Semaraya nga boromotumo, na Sadoka nga bakeapai, na Pedaya dagba aRevi, na Anana wiri Zakura ni gayo mounda, Zakura angia wiri Matanya, i du ni ababanda abambuiga kikiipaahe, bambiko i adu ni ruru yo ku bangiri aboro; gayo sunge nangia kparaka ahe fu awirinayo.

14Ako gi Mbori, mo tíngidi pa re, mbiko gere, ka mo dí nga gu weneapai mangi mi tipa gu bambu nga ga gi Mbori na tipa gaha sunge ku sa yo ya.

15Ti gu rago re mi abi akumba Yuda yo i nipiri zuzu bakakue bapiraahe yo rago sabiti, i ki niyega na vodivodi katakpa zende ahe ki moi he ku ri gayo abaadongi; na imekakue, na rindi bakakue, na avurumo a, na ngbatunga atindiro dunduko, nga gu i aye na ni ku Yerusarema yo rago sabiti; mi ki fugu he fu yo ni gu uru i abagi riahe.

16Akumba nga aboro Tura nanaraka bakporo yo a, i aye na atio, na ngbatunga ahe dunduko ki bagi he fu awiri aYudo rago sabiti, na ku Yerusarema yo a.

17Mi ki darĩ kango na ga aYudo agbia kporo ki ya fu yo, “Gini gbigbitapai nga gi oni amanga ha re, oni napayasi rago sabiti?

18Abaroni amangi a wo, a nga gaani Mbori amoi gi gbigbitapai re ku ri rani na ku ri gi bakporo te re? Ono oni nagara kura zinga berewe ni tironi ku ri Yisaraere tipa payasi oni rago sabiti.”

19Si ki ta du wa gere, mi arugu yo ya i kisi angbadimo Yerusarema ti nzinzii rago mbata fu rago sabiti, ki rugu yo ya ka i uru nga ha mbata fu nyasa rago sabiti ya. Mi ki moi kura gimi amoyambu i nibanda angbadimo, ka tindiro rimi nga ho rago sabiti ya.

20Were ababagiahe na agu yo nanabaga ngbatunga ahe dunduko i ki niraki zegi yo pati Yerusarema bara sa watadu ue.

21Mi ki fugu he fu yo ki ya fu yo, “Oni nara pati ngapa bakporo tipagine? Ka oni mangi wo berewe mi azía roni ni bere.” Fuo gere i aye nga rago sabiti berewe te.

22Mi ki rugu aRevi ya i girisi tiyo ki ye ka banda angbadimo, ka kpara rago sabiti ziazia. Ako gi Mbori, mo tíngidi pa re mbiko gere a, ki banda re wa rengbe he na ga weneringise du kpaima.

23Ti agu arago re mi ki bi agu aYudo naaroga ade Asedodo, na ga Amona yo, na ga Moaba yo;

24kura awiriyo anafura rogo pa Asedodo, i aina nga pa fura rogo pa Yuda te, kina gu fugo nga ga gu kura aboro.

25Mi ki za yo ki tiwa yo ki nita agu yo ki mo mangeriyo; mi ki rugu yo i zunga he fu Mbori, ki ya, “Ka oni afu nga awironi nga ade fu awiriyo ya, ka oni aróga nga awiriyo nga ade tipa awironi a ya.

26A nga Soromo nangia bakindo aYisaraere aingi rogo agi apai te re? Ono kura bakindo adu nga wa ko dagba dungu arikaaboro te, gako Mbori akpi nyemu ko gbe, Mbori ki moi ko ni bakindo ku ri aYisaraere dunduko; ono kina ko kungba ade anangi ko ko ki ingi pai.

27Si rengbe ani gi kina sangbaroni? ki mangi gi bakere gbigbitapai re, ka ida ha oni rogo kungba ade, ki ti gu ndika nga ga gaani Mbori?”

28Gu ni sa dagba awiri Yoyada, Yoyada angia wiri Ereyasiba nangia gbiamotumo, ko adu ni gbio Sanebarata nangia boro Orono; mi ki do ko pati re.

29Ako gi Mbori, Mo tíngidi pa yo bambiko i agbarasi gu sunge nga ga aboromotumo na gu mokido nga ga aboromotumo na ga aRevi a.

30Mi ki girisi yo ti kungba apai dunduko, ki nyakasi pa ga aboromotumo sunge na ga aRevi a, gu ni kina kuti gani sunge.

31Mi ki fu gu he du tipa gu nyake nga ga gamunihe mbedisatise, ti ringbisiringbisi arago, na tipa amakawa. Ako gi Mbori, mo tíngidi pa re sa wenepai.

← Chapter 12 Jump to: