Nehemiah 8

Zande

← Chapter 7 Jump to: Chapter 9 →

1Aboro ki dungura tiyo dunduko wa boro sa ku rogo gu vurukporo naadu barangba Ngbadimo Ime. I ki gumba pai fu Ezara nangia bakeapai ko ye na gu kitabu rugute nga ga Mose nga gu Yekova afu fu aYisaraere.

2Ezara nangia boromotumo ki ye na rugute ku bangiri gbuu, nangia akumba na ade a na agu yo dunduko nagia pai ni rugatinapai, ti gu bambata uru nga ga saba diwi.

3Ko ki gedi pai rogo ho ngbatutu wiso ki da ku bebere uru, rogo gu vurukporo naadu barangba Ngbadimo Ime, ku bangiri akumba na ade na agu yo nga arugu tiyo na apai a. Aboro ki ye tuyo dunduko ka gia sangba kitabu nga ga rugute.

4Ezara nangia bakeapai ki ru ri gbaraga nangia gu i adua ha na ngua tipa gu rago re; aMatitaya aru ku kumbabeko, na Serna, na Ananya, na Uria, na Erekiya, na Maseya; aPedaya ki du ku garebeko na Misaere, na Marakiya, na Asuma, na Asebadana, na Zekaria, na Mesurama.

5Ezara ki zara kitabu ku bangiri aboro dunduko, bambiko ko aru ku ri aboro dunduko; ho ko azara ha ni aboro ki ru ku ari dú.

6Ezara ki sambua Yekova, nga bakere Mbori; aboro ki karaga pai dunduko niya, “Amina, Amina,” nitumba beyo ku ari; i ki dudua riyo niirisi Yekova ni kpakpuyo ku sende.

7AYesua, na Bani, na Serebaya, na Yamina, na Akuba, na Sabetai, na Odiya, na Maseya, na Kerita, na Azaraya, na Yozabada, na Anana, na Peraraya, nangia aRevi, i aunda aboro i rugu tiyo na sangba rugute, aboro ki ru kina ku rogo gu ba yo.

8I ki gedi pai kitabu yo nzunzu, rogo ga Mbori rugute, i ki yugu pa ha, si du aboro ki rugu tiyo na gu pai ko ageda ha.

9Nemaya, nangia baira abazogo, na Ezara nangia boromotumo ni bakeapai, na agu aRevi naaraba aboro ki ya fu aboro dunduko, “Gi uru re nga kparakpara uru fu Yekova nga gaoni Mbori; ka oni kpari nga na nunga na aume a ya.” Bambiko aboro akpari ni aume dunduko ho i agi sangba gi rugute ni re.

10Ko ki ya fu yo, “Oni ga, ki niri gu he nze anze nimbiri gu he nziri anzira ki nikedi ahe fu agu yo i ambakada nga he fu yo ya; bambiko gi uru re nga kparakpara uru fu gaani Gbia; ka si rungosi nga roni ya, bambiko ga Yekova ngbarago nga gaoni ome.”

11Si du aRevi azeresi aboro ti ni dunduko, niya, “Oni zeredi, bambiko gi uru re du ni kparakpara ha; ka si rungosi nga roni a ya.”

12Aboro ki ga dunduko ngba gayo gene ka ri riahe nimbiri he ki ta keda ahe ki ningi na ngbarago gbe, bambiko i arugu tiyo na agu apai i ayugu fu yo.

13Agu abaakumba naadu ku ri angbatunga abayo dagba aboro dunduko, adungura tiyo wa sa na aboromotumo na aRevi, ku bangiri Ezara ti ue uru ka wisiga agu apai du rugute yo.

14I ki bi pai ni keke he rugute yo nga gu Yekova arugu he ku ngba Mose, ya awiri aYisaraere sungu tii abasura rago gu pumbo nga ga saba diwi,

15i tungusi he ki taki pande he rogo gayo abaakporo dunduko na Yerusarema yo, ki ya “Oni ndu ku ri agangara yo ka dewa abe angua nga eraya, na eraya nvuo, na adasi, na sikisa, na be wikawika angua ka mbakada abasura na ni, wa du pa ha ni keke he.”

16Aboro ki guari ki ndu ka dewa ha ki nimbakadi abasura na ni, agu yo kina ku ri gayo abambu, na agu yo rogo gayo avurukporo yo, na rogo agu avurukporo nga ga ga Mbori bambu, na rogo gu kikii rago naadu pati Ngbadimo Ime, na rogo gu kikii rago naadu pati gu Ngbadimo Efuraima.

17Gbuu dunduko ambakadi abasura nangia agu yo naadu ni zizi yo ki niyega, i ki niraki tii abasura yo; bambiko awiri aYisaraere amanga nga gi pai re tona fuo rago Yesua nangia wiri Nuna ki da ti gu uru re te. I angi angi gbe.

18Ezara ageda gu kitabu nga ga ga Mbori rugute uru na uru, tona ha ti bambata uru dati digida uru. I ki mangi pumbo rame ki du saba; bakere irisiirisi gbuu ki du ti muambi uru, a wa rugute aringbisi pa ha.

← Chapter 7 Jump to: Chapter 9 →