Jeremiah 1

Amharic Dawro DFBE (ጌሻ ማጻፋ) No Year

Jump to: Chapter 2 →

1ቢንያማ ቢታን አናቶታ ካታማን ደእያ ቄሳቱ ዋፐ እቱዋ ግድያ ህልቂያ ናኣ ኤርማሳ ቃላይ ሀዋ።

2አሞና ናአይ፥ ይሁዳ ካቲ እዮስያስ ካተቴዳ ታማነ ሄዘን ላይን መና ጎዳ ቃላይ ኤርማሳዉ ዬዳ።

3ቃይ እዮስያሳ ናአይ፥ ይሁዳ ካቲ እዮአቄም ካተቴዳ ላይቱዋን ጾሳ ቃላይ ኤርማሳዉ ዬዳ። ቃይካ እዮስያሳ ናአይ፥ ሰደቅያስ ካተትና፥ ታማነ እት ላይ ጋካናዉ፥ ጾሳ ቃላይ ዳሮ ገደ አዉ ዬዳ። ሄ ላይ እቼሻን አግናን የሩሳላመ አሳይ ኦሞደቲደ ቤዳ።

4መና ጎዳ ቃላይ ታኮ ሀዋዳን ያጊደ ዬዳ፤

5“ታን ኔና ነ አት ኡሉዋን አታናፐ ካሰ ኤራድ። ኔን ኡሉዋፐ የለታናፐ ካሰ ታን ኔና ጌሻደ ዱማያ ዎድ። ቃይ ካዉተቶ ትምቢትያ ኦድያዋ ኦደ ኔና ሱንድ” ያጌዳ።

6ታን፥ “ሀእ ኡባ ሞድያ መና ጎዳዉ፥ ታን ናኣ። ታን ዎት ሃሳይንቶካ ኤርከ” ያጋድ።

7ሽን መና ጎዳይ ታና ሀዋዳን ያጌዳ፤ “ ‘ታን ናኣ’ ጎፓ። ታን ኔና ኪትያ አሳ ኡባኮ ባ። ታን አዛዝያዋ ኡባካ ኦዳ።

8ኡንቱንቶ ያዮፓ። አያዉ ጎፐ፥ ታን ኔና አሻናዉ ኔናና እትፐ ደአና። መና ጎዳይ ሀዋ ኦዳድ” ያጌዳ።

9መና ጎዳይ ባረ ኩሽያ የዲደ፥ ታ ዶና ቦቼዳ። ያቲደ፥ “በአ፤ ታን ታ ቃላ ነ ዶናን ዎድ።

10ኔን ሾዳናዉነ ኮላናዉ፥ ይሳናዉነ አ የጋናዉ፥ ኬጻናዉነ ቶካናዉ፥ ደርያ አሳ ቦላነ ካዉተቱዋ ቦላ ታን ሀች ኔና ሱንድ” ያጌዳ።

11መና ጎዳ ቃላይ ታኮ ዪደ፥ “ኤርማሳ፥ ነዉ አያይ ቤቲ?” ያጌዳ። ታን ዛራደ፥ “ላዉዝያ ግያ ምፐ ከሴዳ ጋትማይ ቤቴ” ያጋድ።

12መና ጎዳይ ታና፥ “ኔን ልከ በኣዳ። አያዉ ጎፐ፥ ታንካ ታ ቃላይ ፖለትና፥ ሄዋዳን በአናዉ ናጋይ” ያጌዳ።

13ላኤንዋካ መና ጎዳ ቃላይ ታኮ ዪደ፥ “ሀራባይ ቃይ አያይ ቤቲ?” ያጌዳ። ታን ዛራደ፥ “እት ፐንትያ ጻሩ ሁጲሳ ባጋፐ ሃ ስሚደ፥ ኩንዳናዉ ማት ኡቴዳዌ ቤቴ” ያጋድ።

14መና ጎዳይ ታና፥ “ሁጲሳ ባጋፐ ባሻይ ፖደ፥ ቢታን ደእያ አሳ ኡባ ቦላ ጉካና።

15ታን ሁጲሳ ባጋ ካዉተቱዋን ደእያ አሳ ኡባ ጼሳና ሀናይ። ታን መና ጎዳይ ሀዋ ኦዳድ። ኡንቱንቱ ካተቱ ዪደ፥ የሩሳላመ ገልያ ፐንገቱዋን፥ ድርሳ ዩሹዋ ኡባንነ ይሁዳ ካታማቱዋ ኡባን ባረንቱ አራታቱዋ ዎና።

16ይሁዳ አሳይ ታና አጊደ፥ ሀራ ጾሳቶ ያርሺደነ ባረንቱ ኩሽያን ኡንቱንቱ ኦዳባዉ ጎይኒደ፥ ኦዳ ኡንቱንቱ ኢታተ ኡባ ድራዉ፥ ታን ታ ፕርዳ ኡንቱንቱ ቦላ ኦዳና።

17“ሽን ኔን ነ ሁጲያዉ ጊጋ! ደንዳ ኤቃደ፥ ታን ኔና አዛዝያዋ ኡባ ኡንቱንቶ ኦዳ። ኡንቱንቶ ያዮፓ። ኔን ኡንቱንቶ ያዮፐ፥ ታን ኔና ኡንቱንቱ ስንን ጉጃ ያሽሳና።

18ሀች ታን ኔና ሀ ቢታ ኡባ ቦላ፥ ይሁዳ ካተቱ ቦላ፥ ካፖቱዋ ቦላ፥ ቄሳቱ ዋ ቦላነ ሀ ቢታ አሳ ቦላ ግምበቴዳ ካታማዳን፥ ብራታ ቱሳዳንነ ናሃስያ ብራታን ድሬዳ ድርሳዳን ኦደ ምንሳድ።

19ኡንቱንቱ ኔናና ኦለታና። ሽን ታን አሻናዉ ኔናና እትፐ ደእያ ድራዉ፥ ኔና ጾንክኖ። መና ጎዳይ ሀዋ ኦዳድ” ያጌዳ።

Jump to: Chapter 2 →