Jeremiah 5

Amharic Dawro DFBE (ጌሻ ማጻፋ) No Year

← Chapter 4 Jump to: Chapter 6 →

1ጾሳይ ሀዋዳን ያጌ፤ “አነ የሩሳላመ ኦግያ ፑደነ ዱገ ሀመትተ፤ አነ ዩይ አደ ጼልተነ አኬክተ፤ አ ጉታራንካ ኮይተ። ጽሉዋ ፕርድያነ ቱሙዋ ኮይያ እት አሳ ህንተ ደሞፐ፥ ታን የሩሳላመ ማራና።

2ሽን ኡንቱንቱ፥ ‘መና ጎዳይ ኤሮ’ ጎፐካ፥ ኡንቱንቱ ቱሙዋፐ ዎርዱዋን ጫቂኖ” ያጌ።

3አቤት መና ጎዳዉ፥ ነ አይፈቱ ቱሙዋ ጼልክኖየ? ኔን ኡንቱንታ ደቻዳ፥ ሽን ኡንቱንታ ሳክቤና። ኔን ኡንቱንታ ክንቼሬዳ፥ ሽን ኡንቱንቱ ሴራ አከናን እጼድኖ። ኡንቱንቱ ባረንቱ ሶምኡዋ ዛላፐ አ ምንሲደ፥ ባረንቱ ናጋራፐ ስመናን እጼድኖ።

4ሄዋፐ ጉይያን፥ ታን ሀዋዳን ያጋደ ቆፓድ፤ “ሀዋንቱ ህዬሳ ጻላላ፤ ሀዋንቱ ቦዛ። አያዉ ጎፐ፥ ኡንቱንቱ መና ጎዳ ኦግያ፥ ባረንቱ ጾሳ ህግያ ኤርክኖ።

5ስም ታን ዎልቃማ አሳቱዋኮ ባናነ ኡንቱንቶ ኦዳና። አያዉ ጎፐ፥ ኡንቱንቱ መና ጎዳ ኦግያ፥ ባረንቱ ጾሳ ህግያ ኤሪኖ” ያጋደ ቆፓድ። ሽን ኡንቱንቱ ኡባይካ እትፐ አ ሞርገ ም መንድኖነ ቃሹዋካ ዱድኖ።

6ሄዋ ድራዉ፥ ጋሙ ባረ ዎራፐ ከሲደ፥ ኡንቱንታ ዎና። ጄሪ ባዙዋፐ ከሲደ፥ ኡንቱንቱ ም ይሳና። ማሂ ኡንቱንቱ ካታማቱዋ ዙጊደ ናጋና። ሄ ካታማቱዋፐ ከስያ ኡባይ ፑዘት ዉራና። አያዉ ጎፐ፥ ኡንቱንቱ ማካላይ ዳልጌዳ፤ ኡንቱንቱ ቶሺካ ዳሬዳ።

7ጾሳይ ሀዋዳን ያጌ፤ “ታን ህንተ ናጋራ አያዉ አቶ ጎ? ህንተ ናናቱ ታና አጊደ፥ ዎርዶ ጾሳቱዋን ጫቄድኖ። ታን ኡንቱንታ ምዛደ ካልሳድ፤ ሽን ኡንቱንቱ ሻርሙጼድኖነ ሻርሙጻቱዋ ጎልያ ሲሬድኖ።

8ኡንቱንቱ ከቴዳ ኮሩማ ፓራዳን ዚቲደ፥ ሀራ አሳ ማቻቶ ዎሹማናዉ አሞቲኖ።

9ቱሙ ታን ሀ የዎቱዋ ድራዉ፥ ኡንቱንታ ሙራናዉ በስክታ? ሀዋ ማላ ካዉተዉ ታ ሀሉዋ ከስክታ?” ያጌ መና ጎዳይ።

10ቃይካ መና ጎዳይ ሀዋዳን ያጌ፤ “እ ዎይንያ ቱራ ማራ ግዱዋና ቢደ ባይዝተ፤ ሽን ዉርስ ይሶፕተ። እ ታሸቱዋ ፐንጊ ኦልተ፤ አያዉ ጎፐ፥ ኡንቱንቱ መና ጎዳሳ ግድክኖ።

11እስራኤልያ አሳቱነ ይሁዳ አሳቱ ሙለካ አማነትበይክኖ” ያጌ።

12ኡንቱንቱ ሀዋዳን ጊደ፥ መና ጎዳ ቦላ ዎርዱዋን ሃሳዬድኖ፤ “እ አይነ ኦና፤ ቆህያባይ አያይነ ኑ ቦላ ዬና። ሞርክያ ማሻ ዎይ ኮሻ ኑን ሙለካ በኦኮ።

13ትምቢትያ ኦድያዋንቱ ጫርኩዋ ማላ፤ ኡንቱንቱን ጾሳ ቃላይ ባዋ። ሄዋ ድራዉ፥ ኡንቱንቱ ግያዌ ኡባይ ኡንቱንታ ጋኮ” ያጊኖ።

14ሄዋ ድራዉ፥ መና ጎዳይ፥ ኡባፐ ዎልቃማ ጾሳይ እስራኤልያ አሳ ሀዋዳን ያጌ፤ “ኡንቱንቱ ሀ ቃላ ሃሳዬዳ ድራዉ፥ ታን ታ ቃላ ነ ዶናን ታማ ከሳና። ሀ አሳካ ም ከሳና፤ ሄ ታማይ ኡንቱንታ ም ይሳና” ያጌ።

15መና ጎዳይ ህንተና ሀዋዳን ያጌ፤ “ህንተኖ፥ እስራኤልያ አሳቶ፥ ታን ህንተ ቦላ ሃኮ ቢታፐ እት ካዉተ አሀና። እነ ዎልቃማነ በን ካዉተ። ኡንቱንቱ ቃላ ህንተ ኤረና፥ ኡንቱንቱ ሃሳያይካ ህንተዉ ገለና ካዉተ።

16ኡንቱንቱ ጩብያ ሾኩ ዶያ ዱፎ ማላ። ኡንቱንቱ ኡባይካ ዎልቃማ አሳ።

17ኡንቱንቱ ህንተ ካነ ቁማ ቦንቂደ ማና። ህንተ አቱማ ናናቱዋካ ማጫ ናናቱዋካ ዎና። ህንተ ዶርሳካ ሚዛካ ቦንቂደ ማና። ህንተ ዎይንያ ቱራ ቴራካ ባላስያ ግያ ም ቴራካ ቦንቂደ ማና። ህንተ አማነትያ፥ ግምበቴዳ ካታማቱዋካ ኡንቱንቱ ባረንቱ ማሻን ኦሊደ ባይዛና” ያጌ።

18መና ጎዳይ ኤርማሳ ሀዋዳን ያጌ፤ “ሽን ሄ ጋላሳቱዋን ግዶፐካ፥ ታን ታ አሳ ኡባና ዉርሳ ይስከ።

19አሳይ ኔና፥ ‘መና ጎዳይ ኑ ጾሳይ ኑ ቦላ ሀዋ ኡባ አያዉ ኦዴ?’ ጊደ ኦችያ ዎደ፥ ኔን ኡንቱንቶ፥ ‘ህንተ ታና፥ ጾሳ አጊደ፥ ህንተ ማታን እማ ጾሳቶ ኦዳዋዳን፥ ሄዋዳን ህንተካ አሳ ማታን እማ አሳቶ ኦና’ ያጋ” ያጌዳ።

20ቃይካ ጾሳይ፥ “ሀዋ ያቆባ አሳቶ ኦዳ፤ ይሁዳ ቢታንካ ሀዋዳን ያጋደ አዋያ፤

21‘ህንተኖ፥ አይፊ ደእሺና ጼለናዋንቶ፥ ሀይይ ደእሺና ስሰናዋንቶ፥ ኤያነ ዶንጭሎዋንታ አሳቶ፥ ሀዋ ስስተ!

22ላ ህንተ ታዉ አያዉ ያይክቴ? ያጌ መና ጎዳይ። ህንተ ታ ስንን አያዉ ኮኮርክቴ? አያዉ ጎፐ፥ ታን ሻፈቱዋ አባዉ ዛዋ፥ መናዉ አ ፕንና ድርሳ ኦድ። ቤታቱ ፑሻከቶፐካ ጾናናዉ ዳንዳይክኖ። ኡንቱንቱ ጉሞፐካ ፕናናዉ ዳንዳይክኖ።

23ሽን ሀ አሳቶ ሙመነ ማካላ ዎዛናይ ደኤ። ኡንቱንቱ እት ባጋ ስሚደ፥ ዎራ ቤድኖ።

24ኡንቱንቱ ባረንቱ ዎዛናን፥ “ኑዉ አድልያ እራነ አሱራ እራና ዎድያን ዎድያን እምያ፥ ኑና ኑ ካ ዳቡርስሰናን ሺሽስያ መና ጎዳዉ፥ ኑ ጾሳዉ፥ አነ ያዬቶ” ግበይክኖ።

25ህንተ ኢታ ኦሱ ሀዋንታ ተኤዳ። ህንተ ናጋራይ ህንተና ሎኦባፐ አሼዳ’ ያጋ” ያጌ።

26ጾሳይ ሀዋዳን ያጌ፤ “ታ አሳ ግዶን ኢታ አሳቱ ደኢኖ። ካፎቱዋ ኦይቃናዉ ናግያ አሳቱዋዳን ዙጊደ ናጊኖ። ኡንቱንቱ ግትያ የጊኖ፤ አሳቱዋ ኦይቂኖ።

27ኮን ካፉ ኩሜዳዋዳን፥ ኡንቱንቱ ጎልያን ጭሙ ኩሜዳ። ሄዋ ድራዉ፥ ኡንቱንቱ ዎልቃማነ ዱረ ግዴድኖ።

28ኡንቱንቱ ኦርደነ ሞ ግዲደ ድጬድኖ። ኡንቱንቱ ኢታ ኦሶ ዛዋይ ባዋ። ኡንቱንቱ አዉ ባይና ናናቱዋ ሻትንናዉ ኡንቱንቱ ድራዉ ሞተትክኖ፤ ህዬሳቱዋ ማታካ ናግበይክኖ።

29ያትና፥ ታን መና ጎዳይ ኡንቱንታ ሄዋ ድራዉ፥ ሙራናዉ በስክታ? ሀዋ ማላ ካዉተ ቦላ ታ ሀሉዋ ከሳናዉ በስክታ?” ያጌ።

30ቃይካ ጾሳይ ሀዋዳን ያጌ፤ “ዳሮ ኢታባይነ ዳጋንያባይ ቢታ ቦላን ሀኔዳ።

31ትምቢትያ ኦድያዋንቱ ዎርዱዋ ኦዲኖ፤ ቄሳቱ ካ ኡንቱንቱ ዞርያን አይሲኖ። ታ አሳይካ ሄዋ ማላባ ዶሴ! ሽን ዉርሰን ዋኒቴ?” ያጌ።

← Chapter 4 Jump to: Chapter 6 →