Jeremiah 37

Amharic Dawro DFBE (ጌሻ ማጻፋ) No Year

← Chapter 36 Jump to: Chapter 38 →

1ባብሎነ ካቲ ናቡካዳናጾር እዮአቄማ ናኣ ዮኣኪና ሳኣን እዮስያሳ ናኣ ሰደቅያሳ ይሁዳ ቢታን ካዉዳ።

2ሰደቅያስ፥ አናና ኦያ ካፓቱነ ሄ ቢታን ደእያ አሳይ ኡባይካ መና ጎዳይ ትምቢትያ ኦድያ ኤርማሳ ባጋና ኦዴዳ ቃላዉ አዛዘትበይክኖ።

3ሽን ካቲ ሰደቅያስ ሸሌምያ ናኣ የሁካላነ ማእሴያ ናኣ ቄስያ ጻፋንያ ሀዋዳን ያጊደ፥ ኤርማሳኮ ኪቴዳ፤ “ሀያና ኑ ድራዉ መና ጎዳ ኑ ጾሳ ዎሳ” ያጌዳ።

4ሄ ዎደ ኤርማስ ብሮ ቃሸት ቤና ድራዉ፥ አሳ ግዶን ስመረቴ።

5ግብጼ ካትያ ኦላንቻቱ፥ ግብጼፐ ከሲደ ይያዋ የሩሳላመ ዶዴዳ ባብሎነ ኦላንቻቱ ስሴዳ ዎደ፥ ኡንቱንቱ የሩሳላመፐ አጊደ፥ ጉየ ስሜድኖ።

6ሄዋፐ ጉይያን፥ መና ጎዳ ቃላይ ትምቢትያ ኦድያ ኤርማሳኮ ዬዳ።

7መና ጎዳይ እስራኤልያ ጾሳይ ሀዋዳን ያጌ፤ “ታና ህንተ ኦቻና ማላ፥ ህንተና ኪቴዳ ይሁዳ ካትያዉ ሀዋዳን ያግተ፤ ‘በእተ፥ ህንተና ማዳናዉ ከሴዳ ግብጼ ካትያ ኦላንቻቱ ባረንቱ ቢታ ስሚደ ባና።

8ቃይ ባብሎነ ኦላንቻቱ ስሚደ ያና፤ ኦለቲደ፥ ሀ ካታማ ኦይቃና፤ ታማንካ አ ጹጋና’ ያግተ” ያጌ።

9መና ጎዳይ ሀዋዳን ያጌ፤ “ ‘ባብሎነ ኦላንቻቱ ላኤን ስሚደ ዪክኖ’ ያጊደ ህንተና ህንተረካ ጭሞፕተ። አያዉ ጎፐ፥ ኡንቱንቱ ስሚደ ያናዌ ደኤና!

10ህንተ ባብሎነ ኦላንቻቱዋ ሙልያ ጾንንቶነ ኡንቱንቱፐ አቲደ፥ ኦላን ማዱጺደ፥ ዱንካንያ ግዶን ግሴዳዋንቱካ ደንዲደ፥ ሀ ካታማ ታማን ጹጋና” ያጌ።

11ግብጼ ካትያ ኦላንቻቱ ማቴዳ ድራዉ፥ ባብሎነ ኦላንቻቱ የሩሳላመ አጊደ፥ ባረንቱ ደእያ ሳኣፐ ጉየ ስሜድኖ።

12ሄ ዎደ ኤርማስ ባረና ጋክያ ጋድያ አካናዉ ቢንያማ ቢታ ባናዉ የሩሳላመፐ ደንዴ።

13ግዶ ሽን፥ እ ቢደ፥ ቢንያማ ፐንግያ ግያ ፐንግያ ጋክሽና፥ ፐንግያ ናግያዋንቱፐ እቱ፥ ሀናንያ ናኣ ሸሌምያ ናአይ፥ ዪርያ ግያዌ አ፥ “ነ ኑና ካዳደ ባብሎነ ባሳ ግድኪ?” ያጊደ ኦይቄዳ።

14ኤርማስ ዛሪደ፥ ሀዋዳን ያጌዳ፤ “ኔን ግያዌ ዎርዱዋ፤ ታን ባብሎነ ብያ አሳ ግድከ” ያጌዳ። ሽን ዪሪ እ ግያዋ ስሰናን እጼዳ፤ ኤርማሳ ኦይቂ አኪደ፥ ካፓቱዋኮ አፌዳ።

15ካፓቱካ ሎይ ሀንቀቲደ፥ ኤርማሳ ዋድኖ፤ ኡንቱንቱ ቃሾ ጎልያ ከሴዳ፥ ጻፍያ ዮናታና ጎልያን አፊደ ዎድኖ።

16ኤርማስ ሄዋን ቢታ ግዶን ደእያ ክፍልያን ዳሮ ዎድያ ጋምኤዳ።

17ሄዋፐ ጉይያን፥ ካቲ ሰደቅያስ አሳ ኪቲደ፥ ኤርማሳ ባረ ደኢያሳ ካትያ ጎልያ ጼስሴዳ፤ አሳይ ኤረናን አ፥ “መና ጎዳይ ነዉ ኦዴዳዌ አየንቶ ደኢ?” ያጊደ ኦቼዳ። ኤርማስ ዛሪደ፥ “ኤ ደኤ፤ ኔን ባብሎነ ካትያ ኩሽያን አአደ እመታና” ያጌዳ።

18ቃይካ ኤርማስ ካትያ ሰደቅያሳ ሀዋዳን ያጊደ ኦቼዳ፤ “ታና ህንተ ቃሾ ጎልያን የጋናዉ ታን ነ ቦላን፥ ነዉ ኦያ ካፖቱዋ ቦላን ዎይ ሀ አሳ ቦላን አያ ባይዙዋ ኦድታ?

19ቃይ፥ ‘ባብሎነ ካቲ ህንተ ቦላንነ ሀ ቢታ ቦላን ዪደ ኦለና’ ያጊደ ነዉ ትምቢትያ ኦዴዳ ነ ናባቱ ሀእ ሀቃን ደእኖ?

20ሄዋ ድራዉ፥ ታ ጎዳዉ ካትያዉ፥ ስሳ! ታን ኦችያዋ ኔን ፖላና ማላ፥ ኔና ዎሳይ። ታን ሄ ሳኣን ሀይቀናዳን፥ ቃሾ ጎልያ ግድያ ጻፍያ ዮናታና ጎልያዉ ታና ጉየ ዛሮፓ” ያጌዳ።

21ሄዋ ድራዉ፥ ካቲ ሰደቅያስ ናግያዋንቱ ዳባባን ኤርማሳ ዎና ማላ አዛዜዳ። ሄዋን አ ዎ ደእሽን፥ ካታማፐ ዳቡ ያና ጋካናዉ፥ ሀች ሀች እት እት ዳቡዋ ኡክያሳፐ አይ አሂደ፥ አዉ እሜድኖ። ሄዋ ድራዉ ኤርማስ ካትያ ዛባን ናጉዋን ጋምኤዳ።

← Chapter 36 Jump to: Chapter 38 →