Jeremiah 8

Amharic Dawro DFBE (ጌሻ ማጻፋ) No Year

← Chapter 7 Jump to: Chapter 9 →

1መና ጎዳይ ሀዋዳን ያጌ፤ “ሄ ዎድያን ይሁዳ ካተቱዋ መቀይ፥ ካፖቱዋ መቀይ፥ ቄሳቱ ዋ መቀይ፥ ትምቢትያ ኦድያዋንቱ መቀይነ የሩሳላመን ደእያ አሳቱዋ መቀይ ኡባይ ዱፉዋፐ ማጸቲደ ከሳና።

2ኡንቱንቱ ሲቄዳ፥ ኪተቴዳ፥ ካሌዳ፥ ዞርያ ኦቼዳነ ጎይኔዳ አዋዉ፥ አግናዉነ ሳሉዋ ጾልንትያ ኡባዉ ምጨታና። ኡንቱንቱ መቀይ ሺቀና ዎይ ሞገተና፤ ሽን ቢታ ቦላን ፕቱዋ ማላ ግዳናዋ።

3ላሌዳ ሳአቱዋን ደእያ፥ ሀ ኢታ ካዉተፐ አቴዳ አሳቱ ኡባይ ደኡዋፐ ሀይቁዋ ዶራና። ታን ኡባፐ ዎልቃማ መና ጎዳይ ሀዋ ኦዳይ” ያጌ።

4መና ጎዳይ ታና ሀዋዳን ያጌዳ፤ “አሳቶ ያጋ፤ ጾሳይ ሀዋዳን ያጌ፤ እት አሳይ ኩንዶፐ፥ ስሚደ ደንደኔየ? ዎይ እት አሳይ ዎራ ቦፐ፥ ጉየ ስመኔየ?

5ያትና፥ ሀ አሳይ አያዉ ዎራ ቤዴ? የሩሳላመ አያዉ ኡባ ገደ ዎራ ቤዴ? ኡንቱንቱ ጭሙዋ ባቂ ኦይቄድኖ፤ ሃ ስመናን እጼድኖ።

6ታን ምንሳደ ሀይዛድ፤ ሽን ኡንቱንቱ ቱሙዋ ሃሳይክኖ። ታ አያ ኦድታሻ? ጊደ ባረ ኢታ ኦሱዋ ፓጽያዌ እቱነ ባዋ። ኡባይካ ኦላዉ ፕሪጽያ ፓራዳን ባረዉ ባረዉ ዎጼ።

7ሀራይ አቶ፥ ሽማላ ግያ ካፎቱ ባረንቱ ዎድያ ኤሪኖ፤ ሀራጰቱ፥ ዳግጨቱነ ዋልያ ግያ ካፎቱ ባረንቱ ስምያ ዎድያ ናጊኖ፤ ሽን ታ አሳይ መና ጎዳ ዎጋ ኤረና።

8“ያትና፥ ዋኒደ፥ ‘ኑን አዳ ኤራንቻ፤ አያዉ ጎፐ፥ መና ጎዳ ህጊ ኑናና ደኤ’ ጋናዉ ዳንዳየቲ? ዎርዳንቻ ጻፈቱ ባረንቱ ቢርያን ታ ህግያ ዎርዱዋ ከሴዳዋ በእክቴየ?

9አዳ ኤራንቻቱ ዬላታና፤ ኡንቱንቱ ካዉሻናነ ኦይቀታና። ኡንቱንቱ መና ጎዳ ቃላ ኦል አግና፥ ኡንቱንቶ አይ ጭንጫተይ ደኢ?

10ሄዋ ድራዉ፥ ታን ኡንቱንቱ ማቼቱዋ ሀራቶ፥ ኡንቱንቱ ጋድያካ ኡንቱንታ ጾኔዳዋንቶ እማና። አያዉ ጎፐ፥ ጉይካ ዳሩካ ኡባይ ዎያ ማናዉ ይርገቲኖ። ትምቢትያ ኦድያዋንቱካ ቄሳቱ ካ ኡባይ አሳ ጭሚኖ።

11ኡንቱንቱ ታ አሳ ማዱ ሳከናባ ጊደ፥ ጉ ልያ ዎኖ። ሳሩ ባይናን፥ ‘ሳሮ፥ ሳራ!’ ያጊኖ።

12ሀ ሸነይያ ኦሱዋ ኦደ፥ ኡንቱንቱ ዬላቴድኖ? ቱይት፥ ኡንቱንቱ ሙለካ ዬላትበይክኖ። ኡንቱንቱ ዬላይ አየንቶካ ኤርክኖ። ሄዋ ድራዉ፥ ኡንቱንቱካ ኩንዴዳዋንቱ ግዶን ኩንዳና፤ ኡንቱንቱ ቃጻየትያ ዎደ ካዉሻና። መና ጎዳይ ሀዋ ኦዳድ” ያጌ ያጋ ያጌዳ።

13መና ጎዳይ ሀዋዳን ያጌ፤ “ታን ኡንቱንቱ ቱሙዋፐ ዳፋ አካና። ኡንቱንቱ ዎይንያ ቱራን አይፊ ያና፤ ባላስያ ግያ ምንካ አይፊ ያና። አዉ ቦንጪካ ሹላና፤ ታን ኡንቱንቶ እሜዳባይ ኡንቱንቱፐ አከት ክቻና” ያጌ።

14አሳቱ ሀዋዳን ያጊኖ፤ “ኑን ጮኡ ጊደ አያዉ ኡቲኖ? አነ እትፐ ሺቅተ፤ ህን ግምበቴዳ ካታማቱዋ ገሊደ፥ ያን ሀይቄቶ። መና ጎዳይ ኑ ጾሳይ ኑና ሀይቆ ፕርድ ድጌዳ፤ ኑን አ ቦላ ናጋራ ኦዳ ድራዉ፥ ኑዉ ኡሻናዉ ዎያ ሃ እም ድጌዳ።

15‘ሳአይ ሳሮ ግዳና’ ጊደ ናሸቻን ናጌዶ፤ ሽን ሎኦባይ ይቤና። ‘ኑን ፓጻና’ ጊደ ናጌዶ፤ ሽን ዳጋማ ግዴዳ።

16ኑ ሞርከቱ ፓራ ዳረይ ዳና ግያ ካታማን ስሰቴ፤ ኡንቱንቱ ዎታራ ፓራቱዋ ጫገን ቢታይ ኡባይ ቃጼ። ቢታነ ቢታን ደእያዋ ኡባ፥ ካታማነ ካታማን አሳ ኡባ ም ይሳናዉ ዬድኖ” ያጊኖ።

17መና ጎዳይ ሀዋዳን ያጌ፤ “በእተ፥ ታን ሾሻቱዋ ህንተ ግዶ የዳና። ሙሩንያዋንቱ ሙሩኑ ተአናዉ ዳንዳየና ሀሶቱዋ ህንተ ግዶ የዳና፤ ኡንቱንቱ ህንተና ዱካና” ያጌ።

18ፓጻናዉ ዳንዳየና ኬሻ ታን ካዮታድ፤ ታ ዎዛናይካ ታ ግዶን ሴሬ።

19ታ አሳይ ሃኮ ቢታን ዋስያ ዋሱዋ ስስተ። ኡንቱንቱ፥ “መና ጎዳይ ጽዮነን ባዌ? ሀ ጽዮነ ካቲ ላኤን ያን ደኤኔ?” ያጊደ ዋሲኖ። ጾሳይ ኡንቱንቱ ካቲ፥ “ኡንቱንቱ ባረንቱ ማሴዳ ምስለቱዋን፥ ባረንቱ ፓና አላጋ ኤቃቱዋን ዎን ታና አያዉ ይሎዬድኖ?” ያጌ።

20አሳይ፥ “ሄኮ ጫካ ዎዲነ አዳ፤ ቦኒነ ዉሬዳ፤ ኑንነ አትቦኮ” ያጊደ ዋሲኖ።

21ስም ታ አሳይ ማዱንጼዳ ድራዉ፥ ታ ዎዛናይካ ማዱንጼዳ። ታን ካዮታይ፤ ያሻይ ታና ኦይቄዳ።

22ጋላኣደን ትግያ ሊ ባዌየ? ያን አክሚ ደኤኔ? ያትና፥ ታ አሳ መኡ አያዉ ፓጸኔ?

← Chapter 7 Jump to: Chapter 9 →