Jeremiah 3

Amharic Dawro DFBE (ጌሻ ማጻፋ) No Year

← Chapter 2 Jump to: Chapter 4 →

1መና ጎዳይ ሀዋዳን ያጌ፤ “እት አሳይ ባረ ማቻቶ የድና፥ እዛ ባደ ሀራ አስና ገሎፐ፥ ሄ ብታኒ ላኤን እዞ ዛሪ? ዛሮፐ ሄ ቢታይ አዳ ቱና ቱኔ! ሽን ኔን ሻርሙጻዳን፥ ጮራ ላገቱዋና ደኣዳ፤ ያናደካ ሀእ ኔን ታኮ ስማኒ!

2አነ ቁ ጋደ፥ አያይነ ባይና ደረቱዋ ጼላ። ኔን ሻርሙጻዳን ግሳቤናሳይ ሄዋን ደኢ? አራብያ አሳይ ባዙዋን ኡቲደ ናግያዋዳን፥ ኔን ላገቱዋ ናጋደ ኦግያ ጋጻን ኡታዳ። ያታደ ነ ሻርሙጻንነ ነ ኢታተን ቢታ ቱንሳዳ።

3ሄዋ ድራዉ፥ ባሳይ ተኤቴዳ፤ ባልጉዋ እራይካ ቡከናን አጌዳ። ሄዋ ሀኖፐካ፥ ነዉ ሻርሙጽያ ማላይ ደኤ፤ ኔን ዬላተናን እጻዳ።

4“ሀእ ኔን ታና፥ ‘ታ አዎ፥ ታ ናአተደፐ ዶምና፥ ኔን ታና ሲቃሳ።

5ኔን ኡባ ገደ ታ ቦላ ይሎታይ? ነ ሀንቁ መናዉካ አገኔ?’ ያጋሳ። ኤ፥ ኔን ሀዋ ያጋሳ፤ ሽን ኔን ኦናዉ ዳንዳይያ ኢታ ኡባ ኦሳ” ያጌ።

6ካቲ እዮስያስ ካተቴዳ ላይ፥ መና ጎዳይ ታና ሀዋዳን ያጌዳ፤ “ሀና አማኑ ባይና እስራኤላታ ኦዳዋ ኔን በኣድ? አ ደርያ ኡባ ቦላነ ዳሻ ምቱ ኡባ ጋርሳ ባደ፥ ያን ሻርሙጻዱ።

7እዛ ሀዋ ኡባ ኦደካ፥ ታኮ ስማናኑ ጋደ ቆፓድ፥ ሽን ስማበይኩ። ቃይ እ ምቻታ፥ አማነተና ይሁዳካ ሄዋ በኣዱ።

8አማኑ ባይና እስራኤሊ ዳሮ ገደ ሻርሙጼዳ ድራዉ፥ ፓራማ እማደ እዞ የዳድ። ሄዋ ግድናካ እስራኤሊ ምቻታ፥ አማነተና ይሁዳ ያየናዋ ታን በኣድ፤ አካ ከሳደ ሻርሙጻዱ።

9ሻርሙጽያዌ እዉ ጺ ላፋባ ግድያ ድራዉ፥ ምናነ ሹቻና ሻርሙጻደ ቢታ ቱንሳዱ።

10ሄዋን ኡባንካ እ ምቻታ፥ አማነተና ይሁዳ፥ ጮ ስሜዳዋ ማላታዉፐ አትና፥ ኩመን ዎዛናፐ ታኮ ስማበይኩ። ታን መና ጎዳይ ሀዋ ኦዳድ” ያጌዳ።

11መና ጎዳይ ታዉ ሀዋዳን ያጌዳ፤ “አማነተና ይሁዳትፐ አማኑ ባይና እስራኤላታ ጽላ።

12ባ፤ ሁጲሳ ባጋዉ ሀዋዳን ያጋደ አዋያ፤ መና ጎዳይ ሀዋዳን ያጌ፤ ‘ሀነ፥ አማኑ ባይና እስራኤላቴ፥ ስማ! ታን ማሮታይ ኩሜዳዋ ግድያ ድራዉ፥ ታን ኔና ኢታ አይፍያን ጼልከ። መናዉ ሀንቀትከ።

13ግዶፐነ፥ ኔን፥ ታን መና ጎዳ ታ ጾሳ ቦላ ማካላድ። አላጋ ጾሳቱዋና ዳሻ ም ኡባ ጋርሳን ሻርሙጻድ። ነ ቃላዉ አዛዘታበይከ’ ጋደ ነ ባይዙዋ አማናናዉ ኮሼ። ታን መና ጎዳይ ሀዋ ኦዳድ” ያጌ ያጋ ያጌዳ።

14“ቃይካ መና ጎዳይ ሀዋዳን ያጌ፤ ‘ህንተኖ፥ አማነተና አሳቶ፥ ስምተ፤ አያዉ ጎፐ፥ ታን ህንተ አስና። ህንተና እቱዋ እት ካታማፐ፥ ላኡዋ እት ያራፐ ዶራደ አካና፤ ህንተና ጽዮነ አሀና።

15ሄዋፐ ጉይያን፥ ታን ታ ዎዛናዳን፥ ህንተና ሄምያ ሄንንቻቱዋ ህንተዉ እማና። ኡንቱንቱ ህንተና ኤራተንነ አኬካን ሄማና’ ” ያጌ።

16ቃይካ መና ጎዳይ፥ “ሄ ጋላሳቱዋን ህንተ ሄ ቢታን ጮራትያ ዎደ፥ አሳቱ፥ ‘መና ጎዳ ጫቁዋ ታቦታ’ ጊደ ሃሳይክኖ። እ ኡንቱንቶ ካርህነ ጌና፥ ዎይ ሀሳየተና፥ ዎይ ባይናዌካ ኡንቱንቶ ቆፈተና፤ ቃይ ሀራይ ኦሰተና።

17ሄ ዎድያን ኡንቱንቱ የሩሳላመ መና ጎዳ ካተቱዋ አራታ ጊደ ጼሳና። ካዉተ ኡባፐ አሳይ መና ጎዳ ሱን ቦንቻናዉ የሩሳላመ ሺቃና። ሄዋፐ ስንን ኡንቱንቱ እጼዳ ጊደ፥ ባረንቱ ኢታ ቆፋ ካልክኖ።

18ሄ ጋላሳቱዋን ይሁዳ አሳቱ እስራኤልያ አሳቱዋና እትፐ ጋከቲደ፥ ሁጲሳ ባጋ ቢታፐ ታን ካሰ ህንተ አዎቱዋ ላትሴዳ ቢታ እትፐ ያና” ያጌ።

19መና ጎዳይ፤ “ታን ህንተና አቱማ ናናቱዋዳን ዎታ ዎነንቶነ፥ ፓጻ ቢታ፥ ካዉተ ኡባፐ አደ፥ ሎእያ ቢታ ዎታ ላትሳነንቶነ ቆፓድ። ቃይ ታና፥ ‘ታ አቦ’ ጊደ ጼሳናነ ታና ካልያሳፐ ጉየ ስምክኖ ጋደ ቆፓድ።

20ሽን እስራኤልያ አሳቶ፥ ህንተ ባረ አስናዉ አማነተና ማቻቲዳን ታዉ አማነትበይክታ” ያጌ።

21አየንቶ ባይና ቃ ደረቱዋ ቦላን ኮሻይ ስሰቴ፤ ሄዌነ፥ እስራኤልያ አሳ ዬኩዋነ ዋትዋቱዋ። አያዉ ጎፐ፥ ኡንቱንቱ ባረንቱ ኦግያ ጌላዬድኖነ መና ጎዳ ባረንቱ ጾሳ ዶጌድኖ።

22ጾሳይ ኡንቱንታ፥ “ህንተኖ፥ አማኑ ባይና አሳቶ፥ ታኮ ስምተ። ህንተ አማነታና ማላ፥ ታን ህንተና ፓና” ያጌዳ። ኡንቱንቱ፥ “ኤኖ፥ ኑን ኔኮ ስማና። አያዉ ጎፐ፥ ኔን መና ጎዳ ኑ ጾሳ።

23ኑን ዞዘቱዋ ሁጲያንነ ደረቱዋ ሁጲያን ኤቃዉ ጎይንያዌ ቱሙዋፐ ጭሙዋ። ቱሙፐ ኑዉ፥ እስራኤላቶ አቶተይ መና ጎዳና፥ ኑ ጾሳና።

24ኑ ያላጋተደፐ ዶምና፥ ኑ አዎቱ ዳቡሪደ ደሜዳዋ፥ ኡንቱንቱ ዶርሳነ ሚዛ፥ ኡንቱንቱ ማጫነ አቱማ ናናቱዋ፥ ዬላይያ ኤቃቱ ም ይሴድኖ።

25ኑ ያላጋተደፐ ዶሚደ፥ ሀች ጋካናዉ፥ ኑንካ ኑ አዎቱካ መና ጎዳ ኑ ጾሳ ቦላ ናጋራ ኦዶ። መና ጎዳ ኑ ጾሳ ቃላዉ አዛዘትበይኮ። ሄዋ ድራዉ፥ አነ ኑን ዬላዉ ዱገ ጉፋኔቶ፤ ቃይ ካዉሻይ ኑና አፍላዳን ካሞ” ያጊኖ።

← Chapter 2 Jump to: Chapter 4 →