Jeremiah 7

Amharic Dawro DFBE (ጌሻ ማጻፋ) No Year

← Chapter 6 Jump to: Chapter 8 →

1መና ጎዳፐ ኤርማሳኮ ዬዳ ቃላይ ሀዋ፤

2“መና ጎዳ ጌሻ ጎልያ ፐንገን ኤቃ። ሀ ቃላ ሀዋዳን ያጋደ አዋያ፤ ‘ህንተኖ፥ መና ጎዳዉ ጎይናናዉ ሀ ፐንገቱዋና ገልያ ይሁዳ አሳቶ፥ ኡባይካ መና ጎዳ ቃላ ስስተ!

3ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ “ህንተ ኦግያነ ህንተ ኦሱዋ ላምተ፤ ታን ህንተና ሀ ሳኣን ዎና።

4ጭሞ ቃላን፥ ሀዌ መና ጎዳ ጌሻ ጎልያ! ሀዌ መና ጎዳ ጌሻ ጎልያ! ሀዌ መና ጎዳ ጌሻ ጎልያ ያጊደ አማነቶፕተ።

5ህንተ ህንተ ኦግያነ ኦሱዋ ቱሙዋፐ ላሞፐ፥ እቱ እቶ ቱሙዋ ፕርዶፐ፥

6በተቱዋነ አዉ ባይና ናናቱዋ፥ አስናይ ሀይቄዳ አምኤ ማጫ አሳ ናቀናን አጎፐ፥ ሀ ሳኣን ጽሎ አሳቱዋ ሱ ጉሰናን አጎፐነ፥ ህንተ ቆሄተናዳን፥ ሀራ ጾሳቶ ጎይነናን አጎፐ፥

7ታን ህንተ ማይዛ አዋቶ መ መናዉ እሜዳ ቢታን ህንተና ዎና።

8በእተ! ህንተ አይነ ፓና ጭሙዋ ቃላን አማነቲታ” ያጌ’ ያጋ” ያጌ።

9ጾሳይ ሀዋዳን ያጌ፤ “ህንተ ዉኢታ፥ ዎታ፥ ሻርሙጺታ፥ ጫቂደ ዎርዱዋ ማርካቲታ፥ ባኣላ ግያ ኤቃዉ ያርሹዋ ያርሺታ፥ ሀዋፐ ካሰ ህንተ ኤረና ሀራ ጾሳቶ ጎይኒታ።

10ያቲደ ታ ሱንን ጼገቴዳ ጌሻ ጎልያ ዪደ፥ ታ ስንን ኤቂደ፥ ‘ኑን ሳሮ አቴዶ!’ ያጊታ። ሽን ሀ ሸነይያ ኦሱዋ ኡባ ኦናዉ ሳሮ አቴድቴ?

11ታ ሱንን ጼገቴዳ ሀ ጌሻ ጎሊ ህንተዉ ፓንጋቱ ቆሰትያ ጎንጎሎ ጌድቴየ? ህንተ ኦያዋ ኡባ ታን ታ ሁጲያን በኣድ” ያጌ መና ጎዳይ።

12ጾሳይ ሀዋዳን ያጌ፤ “ታን ታ ሱንዉ ደኢያሳ ኦደ ኮይሮ ዶሬዳ፥ ሴሎን ታ ሳኣ አነ ቢተ። ታ አሳ እስራኤልያ ኢታተ ድራዉ፥ ታን ሄ ሳኣ ዋቴደንቶ በእተ።

13ህንተ ሀ ኡባባ ኦድታ። ታን ህንተዉ ዛራ ዛራደ ኦዳድ፤ ሽን ስሰናን እጼድታ። ታን ህንተና ጼሳድ፤ ሽን ታዉ ኮይበይክታ ያጌ መና ጎዳይ።

14ሄዋ ድራዉ፥ ታን ሴሎ ቦላ ኦዳዋ፥ ሀዋን ህንተ አማነትያ፥ ታ ሱንን ጼገቴዳ ሀ ጌሻ ጎልያ ቦላካ ኦና። ህንተዉነ ካሰ ህንተ አዋቶ እሜዳ ሳኣን ሀዋን፥ ታን ሴሎ ቦላ ኦዳዋ ማላ ዛረደ ኦና።

15ህንተ ዳቦቱዋ፥ ኤፍሬማ ዘረቱዋ ታን ድጌዳዋዳን፥ ታ ስንፐ ህንተናካ ድጋና” ያጌ።

16ጾሳይ ሀዋዳን ያጌ፤ “ኤርማሳ፥ ሄዋ ድራዉ፥ ሀ አሳቶ ዎሶፓ፤ ኡንቱንቱ ግሻታ ኦቾፓ ዎይ ዋሶፓ፤ ኔን ኡንቱንቶ ጋናቶፓ። አያዉ ጎፐ፥ ታን ነዉ ስስከ።

17ኡንቱንቱ ይሁዳ ካታማቱዋንነ የሩሳላመ ኦገቱዋን ኦያዌ አየንቶ በእኪየ?

18ናናይ ም ምጺኖ፤ አዎቱ ታማ ኤኖ፤ ማጫ አሳቱ፥ ‘ሳሉዋ ካታቶ’ ግያ ጾሳትዉ ኡክ ኡካናዉ ልያ ሙናቂኖ። ኡንቱንቱ ታና ቆሀና ጊደ፥ ኡሻ ያርሹዋ ሀራ ጾሳቶ ጉሲኖ።

19ሀዋን ቱሙ ቆሄትያዌ ታኔ? ሀዋን ቆሄቲደ ዬላትያዌ ባረንቱ ሁጲያዉ ኡንቱንታ ግድክኖ?” ያጌ መና ጎዳይ።

20ሄዋ ድራዉ፥ ኡባ ሞድያ ጾሳይ ሀዋዳን ያጌ፤ “በእተ፥ ታ ይሉነ ታ ሀንቁ ሀ ሳኣ ቦላ፥ አሳ ቦላነ መህያ ቦላ፥ ጋደን ደእያ ም ቦላነ ቢታን ደእያ ካ ቦላ ጉካና። ጉኪደ ኤጻና፤ ቶአናዉካ ዳንዳየና” ያጌ።

21ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ “ህንተ ጹግያ ያርሹዋ ሀራ ያርሾቱዋና ጉጂደ፥ ሄ አሹዋ ህንተዉ ሚተ።

22ታን ኡንቱንታ ግብጼ ቢታፐ ከስያ ጋላስ፥ ጹግያ ያርሹዋባ ግድና፥ ሀራ ያርሾቱዋባ ግድና፥ ህንተ ማይዛ አዋቶ ኦዳበይከ ዎይ አዛዛበይከ።

23ሽን ታን ኡንቱንቶ ሀ አዛዙዋ እማድ፤ ‘ታዉ አዛዘትተ። ያቶፐ፥ ታን ህንተ ጾሳ ግዳና፤ ህንተካ ታ አሳ ግዳና። ህንተዉ ሎአና ማላ፥ ታን ህንተና አዛዝያ ኦግያ ኡባን ሀመትተ’ ያጋድ።

24ሽን ኡንቱንቱ ታዉ ስሰናን ዎይ ሀይዘናን እጼድኖ። ኡንቱንቱ ባረንቱ ኢታ ዎዛና ሙመተዳን ሀመቴድኖ፤ ኡንቱንቱ ስንዉ ብያዋ አጊደ፥ ጉየ ቤድኖ።

25ህንተ ማይዛ አዎቱ ግብጼ ቢታፐ ከሴዳ ጋላሳፐ ዶሚደ፥ ሀች ጋካናዉ፥ ታን ታ ቆማቱዋ፥ ትምቢትያ ኦድያዋንታ ዎንትና ዎንትና ህንተዉ ኪታደ ታካድ።

26ሽን ህንተ ታዉ ስሰናን ዎይ ሀይዘናን እጼድታ። ህንተ ሞርግያ ልሴድታነ ህንተ ማይዛ አዎቱዋፐካ አደ፥ ኢታባ ኦድታ።

27“ሀዋ ኡባ ኔን ኡንቱንቶ ኦዳና፤ ሽን ኡንቱንቱ ነ ግያዋ ስስክኖ። ኔን ኡንቱንታ ጼሳና፤ ሽን ኡንቱንቱ ነዉ ኮይክኖ።

28ሄዋ ድራዉ፥ ኤርማሳ፥ ኔን ኡንቱንቶ ሀዋዳን ያጋ፤ መና ጎዳዉ ባረ ጾሳዉ አዛዘተና ዎይ ሴርና ስመና ካዉተይ ሀዋ። ቱሙ ዬዳ፤ ቱማይ ኡንቱንቱ እንጻርሳፐ ባዬዳ።

29ህንተ ሁጲያ ሜዲደ ኦልተ። አያይነ ባይና ቃ ደረቱዋ ቦላ ከሲደ ዝላልተ። አያዉ ጎፐ፥ መና ጎዳይ ባረና ይሎዬዳ የለታ እጼዳነ አግ ባሼዳ ያጋ” ያጌ።

30ቃይካ መና ጎዳይ ሀዋዳን ያጌ፤ “ይሁዳ አሳቱ ታ ስንን ኢታባ ኦድኖ። ኡንቱንቱ ታ ሱንን ጼገቴዳ ጌሻ ጎልያ ቱንሳናዉ፥ ታና ሸነይያ ኤቃቱዋ አሂደ፥ አ ግዶን ዎድኖ።

31ኡንቱንቱ ባረንቱ አቱማ ናናቱዋነ ማጫ ናናቱዋ ታማን ጹጊደ ያርሻናዉ፥ ህኖማ ዛንጋራ ቃን ቶፌታ ግያ ያርሹዋ ሳኣ ግምቤድኖ። ሽን ሄዌ ታን ኡንቱንቱ አዛዛቤናባነ ታ ቆፋን ባይናዋ።

32ሄዋ ድራዉ፥ ሄ ሳአይ ህኖማ ዛንጋራ ዎይ ቶፌታ ጌተትያዌ አቲደ፥ ሹካ ዛንጋራ ያገቲደ ጼሰታና ጋላሳቱ ዪኖ ያጌ መና ጎዳይ። አያዉ ጎፐ፥ ሞግያ ሳአይ ባይና ድራዉ፥ ቶፌት ኡንቱንቱ ባረንቱ አሃ ሞግያ ሳኣ ግዳናዋ።

33ሄ ዎደ ሄ አሳቱዋ አሃይ ሳሉዋ ካፎቶነ ሳኣ ዶአቶ ቁማ ግዳና፤ ኡንቱንቱ ያሽሲደ የደርስያዌ ደኤና።

34ታን እልልሳነ ናሸቻ ኮሻይ፥ ቡላችያዋነ ቡላቼትያን ኮሻይ ይሁዳ ካታማቱዋንነ የሩሳላመ ኦገቱዋን ስሰተናዳን ድጋና። አያዉ ጎፐ፥ ቢታይ መላ አታና” ያጌ።

← Chapter 6 Jump to: Chapter 8 →